26 વર્ષથી કેન્સરનું પ્રમાણ સ્થિર
નવી દિલ્હી: આ વાંચીને તમને નવાઈ જરૂર લાગશે પરંતુ ભારતની ઈન્સ્ટિટ્યૂશન્સના 100 જેટલા ટોપ મેડિકલ એક્સપર્ટે કરેલા સ્ટડીમાં ખુલાસો થયો છે કે છેલ્લા 26 વર્ષથી (1990-2016) સુધી બ્રેસ્ટ કેન્સર સિવાયના કોમન કેન્સરનું પ્રમાણ સ્થિર રહ્યું છે. દેશની વસ્તીના ઉંમરમાં થતા ફેરફારોના કારણે કેન્સરગ્રસ્તોની સંખ્યા વધી છે. લોકો લાંબુ જીવી રહ્યા છે જેના કારણે મોટી ઉંમરના લોકોમાં કેન્સરનું પ્રમાણ વધુ જોવા મળે છે.
સ્ટડીમાં થયો ખુલાસો
ધ લેન્સેટમાં પ્રકાશિત થયેલા સ્ટડી પ્રમાણે, સર્વાઈકલ કેન્સર સિવાયના કેન્સરના બનાવો દેશમાં મિઝોરમને બાદ કરતાં ઘટ્યા છે, બ્રાઝિલ, રશિયા, ચીન અને સાઉથ આફ્રિકા જેવા દેશો જ્યાં રોગચાળો આપણા દેશ જેટલો જ હોવાનું માનવામાં આવે છે. જો કે આ દેશો કરતાં ભારતમાં કેન્સરનું પ્રમાણ વધારે છે કારણકે કેન્સરની જાણ મોડી થાય છે, સારવાર સમય પર થઈ શકતી નથી અને ગરીબોને સારવાર પરવડતી નથી.
‘જો વહેલા જાણ થાય તો 80% દર્દીઓને બચાવી શકાય’
કેન્સરમાંથી ઉગરી જનારા દર્દીઓ વિશે ડોક્ટર્સનું કહેવું છે કે, આવા દર્દીઓની સંખ્યા 20-30 ટકા છે. મોટાભાગના દર્દીઓ સારવાર માટે ત્યારે આવે છે જ્યારે કેન્સર ત્રીજા-ચોથા અથવા એડવાન્સ સ્ટેજમાં પહોંચી ગયું હોય. એઈમ્સ કેન્સર સેન્ટરના ચીફ ડૉ. જી.કે. રથે કહ્યું કે, “જો કેન્સરની જાણ શરૂઆતના જ તબક્કામાં થઈ જાય તો 80 ટકા દર્દીઓને બચાવી શકાય છે.” સ્ટડી પ્રમાણે ભારતમાં 2016માં કેન્સરના પ્રકારના પ્રમાણની વાત કરીએ તો પેટનું કેન્સર (9%), બ્રેસ્ટ કેન્સર (8.2%), ફેફસાનું કેન્સર (7.5%), હોઠ અને ઓરલ કેવિટી કેન્સર (7.2%), ફેરેક્સ કેન્સર (6.8%), કોલન અને રેક્ટમ કેન્સર (5.8%), લ્યુકેમિયા (5.2%) અને સર્વાઈકલ કેન્સર (5.2%) છે.
બ્રેસ્ટ કેન્સરનું પ્રમાણ વધ્યું
રિસર્ચર્સના મતે, છેલ્લા 26 વર્ષમાં એક નિશ્ચિત ઉંમરની મહિલાઓમાં કેન્સરનું પ્રમાણ 39.1 ટકા વધ્યું છે, આ વધારામાં દરેક રાજ્યનો સમાવેશ થાય છે. બીજી તરફ એક નિશ્ચિત ઉંમરે થતાં સર્વાઈકલ કેન્સરમાં 1990થી 2016માં નોંધપાત્ર 39.7 ટકાનો ઘટાડો થયો છે. મુંબઈના ટાટા મેમોરિયલ સેન્ટરના પ્રોફેસર ડૉ. રાજેશ દીક્ષિતના મતે, ઓબેસિટી, મોટી ઉંમરે ગર્ભધારણ કરવો, ઓરલ કોન્ટ્રાસેપ્ટિવનો વધુ પડતો ઉપયોગ બ્રેસ્ટ કેન્સરની વધતી સંખ્યા માટે જવાબદાર છે. તો જેનિટલ હાઈજિનના કારણે સર્વાઈકલ કેન્સરનું પ્રમાણ ઘટ્યું છે.
No comments:
New comments are not allowed.