રૂપિયો 51 પૈસા વધ્યો: PMની સમીક્ષા બેઠકના સમાચારે મોટી રિકવરી

કોલકાતા/મુંબઈ:સતત ઘટી રહેલા રૂપિયા અને અન્ય આર્થિક બાબતોની સમીક્ષા માટે વીક-એન્ડમાં વડાપ્રધાન મોદીની બેઠકના અહેવાલથી રૂપિયામાં લાંબા સમયે મોટી રિકવરી આવી છે. જોકે, એ પહેલાં રૂપિયો બુધવારે 72.92ની અત્યાર સુધીની નીચી સપાટીને સ્પર્શ્યો હતો. વડાપ્રધાનની બેઠકમાં RBI દ્વારા વ્યાજદરમાં વૃદ્ધિની પણ અટકળો થઈ રહી છે. રૂપિયો બુધવારે ડોલર સામે 72.19ના સ્તરે બંધ રહ્યો હતો, જે મંગળવારના 72.70ની તુલનામાં 51 પૈસાનો સુધારો દર્શાવે છે.
રૂપિયામાં રિકવરી સાથે શેરો પણ નીચા મથાળેથી સુધર્યા હતા. 10 દિવસમાં રૂપિયો ડોલર સામે 4 ટકા અને ચાલુ વર્ષે 11.5 ટકા ઘટ્યો છે. તેમાંથી અડધો ઘટાડો પહેલી ઓગસ્ટ પછી નોંધાયો છે અને એટલે તે ઊભરતાં બજારોમાં સૌથી ખરાબ પ્રદર્શન કરનારી કરન્સી બની છે.
રૂપિયો 72.19ના સ્તરે બંધ રહ્યા પહેલાં 71.86થી 72.91ની રેન્જમાં ટ્રેડ થયો હતો. નાણામંત્રાલયે બુધવારે જણાવ્યું હતું કે, “રૂપિયો વધુ પડતા નીચા સ્તરે ન ગબડે એ માટે સરકાર અને રિઝર્વ બેન્ક બનતા તમામ પ્રયાસ કરશે.” આર્થિક બાબતોના સચિવ સુભાષ ચંદ્ર ગર્ગે ટ્વિટ કર્યું હતું કે, “મંગળવારથી રૂપિયામાં જે ઘટાડો નોંધાયો તેનું કોઈ ફંડામેન્ટલ કારણ જણાતું નથી. માર્કેટ ઓપરેટર્સનું રિએક્શન વધુ પડતું જણાય છે.”
બ્લૂમબર્ગ ઇમ્પ્લાઇડ વોલેટિલિટી ઇન્ડેક્સ બુધવારના ટ્રેડિંગને અંતે ઘટીને 8.19ના સ્તરે બંધ રહ્યો હતો. સોમવારે તે 8.51 ટકાની ત્રણ વર્ષની ટોચને સ્પર્શ્યો હતો. ઓગસ્ટ મહિનાથી ઇમ્પ્લાઇડ વોલેટિલિટી ઇન્ડેક્સમાં બે ટકા ઉછાળો નોંધાયો છે.
વડાપ્રધાન નરેન્દ્ર મોદી રૂપિયાના મૂલ્યમાં સતત થઈ રહેલો ઘટાડો અટકાવવા વીક-એન્ડમાં સમીક્ષા બેઠક કરે તેવી શક્યતા છે. સૂત્રોના જણાવ્યા અનુસાર સરકાર પેટ્રોલ-ડીઝલના ભાવવધારાને અંકુશમાં લેવા પગલાં પણ જાહેર કરી શકે. ઉલ્લેખનીય છે કે, ચાલુ ખાતાની ખાધમાં વધારો અને અમેરિકા-ચીન વચ્ચે ટ્રેડ વોરની પ્રતિકૂળ અસરને કારણે રૂપિયો દબાણમાં છે.
ચાલુ નાણાકીય વર્ષમાં ભારતની ચાલુ ખાતાની ખાધ બીજા ક્વાર્ટરમાં 15.8 અબજ ડોલરની ચાર ક્વાર્ટરની ઊંચી સપાટીએ પહોંચી છે. અગાઉ મીડિયાના અહેવાલ મુજબ રૂપિયાના મૂલ્યને અટકાવવા સરકાર વિદેશી રોકાણપ્રવાહ આકર્ષવા RBI સાથે મળીને NRIs માટે ડિપોઝિટ સ્કીમની જાહેરાત કરે તેવી શક્યતા છે.
રૂપિયામાં તીવ્ર ઘટાડાને કારણે કોમોડિટીના ભાવમાં વધારો થઈ રહ્યો છે. તેની અસર RBIની ઓક્ટોબર મહિનાની ધિરાણનીતિમાં જોવા મળશે. જોકે, ઓગસ્ટમાં CPI ફુગાવો 3.69 ટકાની 10 મહિનાની નીચી સપાટીએ પહોંચ્યો છે, જે રાહતની વાત છે. રિઝર્વ બેન્કે ઓગસ્ટમાં રેપો રેટ 0.25 ટકા વધાર્યા હતા.