સેન્સેક્સમાં છેલ્લા બે સેશનમાં 977 પોઈન્ટ્સનું ધોવાણ

મુંબઈ: અમેરિકા-ચીન વચ્ચે વધુ તીવ્ર બની રહેલી ટેરિફ વોરને કારણે મંગળવારે સતત બીજા સેશનમાં ભારતીય શેરબજારમાં મોટું ગાબડું પડ્યું હતું. BSE સેન્સેક્સ આજે વધુ 509 પોઈન્ટ્સ ગગડ્યો હતો.
આ સાથે સેન્સેક્સમાં છેલ્લા બે સેશનમાં જ 977 પોઈન્ટ્સનું જંગી ધોવાણ થઈ ગયું હતું. એશિયાના અન્ય બજારો પણ સતત નવમાં સેશનમાં ઘટાડા તરફી રહેતાં ભારતીય શેરબજારમાં પણ તેની અસર જોવા મળી હતી.
દિવસ દરમિયાન BSE સેન્સેક્સ ઉપરમાં 38043.27 અને નીચામાં 37361.20 પોઈન્ટ્સની વચ્ચે ટ્રેડ થયા બાદ 509.04 પોઈન્ટ્સ અથવા 1.34 ટકાના ધોવાણ સાથે 37,413.13 પોઈન્ટ્સની સપાટીએ બંધ રહ્યો હતો.
નેશનલ સ્ટોક એક્સચેંજનો નિફ્ટી ઉપરમાં 11,479.40 અને નીચામાં 11,274.00 પોઈન્ટ્સની રેન્જમાં અથડાયા બાદ 150.60 પોઈન્ટ્સ અથવા 1.32 ટકા ગગડીને 11,287.50 પોઈન્ટ્સની સપાટીએ બંધ રહ્યો હતો. આજે ટેલીકોમ, કન્ઝ્યુમર ડ્યુરેબલ્સ તેમજ ITC સહિતના FMCG શેર્સમાં ધૂમ વેચવાલી જોવા મળી હતી.
BSE મિડકેપ અને BSE સ્મોલકેપ ઈન્ડેક્સ અનુક્રમે 1.36 ટકા અને 1.37 ટકા ઘટીને બંધ રહ્યા હતા.
આજે અન્ય સેક્ટોરલ ઈન્ડાઈસિસમાં BSE કન્ઝ્યુમર ડ્યુરેબલ્સ ઈન્ડેક્સ 2.47 ટકા, BSE FMCG ઈન્ડેક્સ 2.25 ટકા, BSE ટેલીકોમ ઈન્ડેક્સ 2.20 ટકા, BSE રિયલ્ટી ઈન્ડેક્સ 1.78 ટકા, BSE મેટલ ઈન્ડેક્સ 1.66 ટકા ઘટીને બંધ રહ્યા હતા. આજે સતત બીજા સેશનમાં તમામ સેક્ટોરલ ઈન્ડાઇસિસ રેડ ઝોનમાં બંધ રહ્યા હતા.