જાણવા જેવું: છોકરીઓના જીન્સની ડિઝાઈન કેમ આવી હોય છે?

લેડીઝ જીન્સ બોય્ઝના જીન્સથી અલગ

તમે ઘણીવાર કપડાં ખરીદતી વખતે તેમાં પોકેટ આપેલું છે કે નહીં, તેની સાઈઝ કેટલી છે, વગેરે જેવી બાબતો પણ ચેક કરતા હશો. કપડાંમાં જો પોકેટ ન હોય તો તમે તેને પહેરવાનું પસંદ નહીં કરો. 15મી સદીમાં કપડાંમાં ખીસ્સા નહોતા આપવામાં આવતા. પરંતુ અલગથી એક પોટલી રાખવામાં આવતી જેમાં લોકો પૈસા સહિતની અન્ય વસ્તુઓ રાખતા. જોકે ત્યારબાદ 18મી સદીમાં દરજીઓ દ્વારા પુરુષો માટેના જેકેટ્સ અને પેન્ટ્સમાં ખીસ્સા આપવામાં આવતા, જોકે મહિલાઓ હજુ પણ પાઉચ રાખતી હતી. પરંતુ હવે મહિલાઓ પણ પેન્ટ પહેરવાનું શરૂ કરી દીધું છે. પરંતુ પુરુષોના પેન્ટની તુલનામાં લેડીઝના કપડાંમાં વધારે નાના ખીસ્સા આપવામાં આવે છે.

બોય્ઝની તુલનામાં નાની હોય છે પોકેટની સાઈઝ

હવેના સમયમાં લેડીઝને ખીસ્સું તો મળી ગયું, પરંતુ તેમની જરૂરિયાતની વસ્તુઓ તેમાં રાખવી હજુ પણ એક મુશ્કેલીભર્યું કાર્ય છે. પછી તે સ્કર્ટ હોય, ટાઈટ્સ હોય કે પછી કોઈ ફેન્સી જીન્સ ઘણીબધી બ્રાન્ડ્સ ખીસ્સાનું ઓપ્શન નથી આપતી. ઘણીવાર ખીસ્સાની ખાસ ડિઝાઈન કપડામાં આપવામાં આવે છે, પરંતુ અંદર ખીસ્સું નથી હોતું.

મોબાઈલ રાખવો પણ મુશ્કેલ

આટલા નાના ખીસ્સાના કારણે ઘણીવાર લેડીઝને તેમાં મોબાઈલ ફોન રાખવો પણ એક મુશ્કેલ કાર્ય સમાન બને છે. હાલની એક રિસર્ચ દરમિયાન સામે આવ્યું કે, લેડીઝના જીન્સની પોકેટની સાઈઝ પુરુષો કરતા 48 ટકા નાની અને 6.5 ટકા સાંકળી હોય છે. જેના કારણે રોજિંદા જીવનની કોઈપણ વસ્તુઓ તેમાં રાખવી ગર્લ્સ માટે એક પડકાર રૂપ કાર્ય બને છે.

સ્ટડીમાં થયો આ બાબતે ખુલાસો

આ સ્ટડીમાં અંદાજિત 80 જેટલી જીન્સની જોડીનો ઉપયોગ કરાયો અને તેમાં જાણવા મળ્યું કે પુરુષોના જીન્સના ખીસ્સા 9.1 ઈંચ લંબાઈ અને 6.5 ઈંચની પહોળાઈના હતા. સ્ટડીમાં એમપણ જાણવા મળ્યું કે લેડીઝના પોકેટ પુરુષોની સરખામણીમાં 5.6 ઈંચની લંબાઈ અને 6 ઈંચની પહોળાઈના હતા. આટલા નાના ખીસ્સાના કારણે ગર્લ્સ માટે તેમાં હાથ નાખવો પણ ખુબ મુશ્કેલ છે.