દેશમાં ઝડપથી વધી રહ્યા છે કેન્સરના કેસ, છ વર્ષમાં 15 ટકા કેસ વધ્યા

કેન્સર કેસમાં 15 ટકાનો વધારોઃ

મુંબઈઃ છેલ્લા છ વર્ષમાં આખી દુનિયામાં કેન્સરના કેસમાં 15.7 ટકાનો વધારો જોવા મળ્યો છે. ઈન્ડિયન કાઉન્સિલ ઑફ મેડિકલ રિસર્ચના નેશનલ ઈન્સ્ટિટ્યુટ ઑફ કેન્સર પ્રિવેન્શન એન્ડ રિસર્ચે બુધવારે ડેટા જાહેર કર્યો હતો. એ મુજબ 2012માં કેંસરના કેસ 10 લાખ જેટલા હતા જે 2018માં વધીને 11.5 લાખ જેટલા થઈ ગયા છે.

કેન્સરમાં મોતના કિસ્સામાં 12 ટકાનો વધારોઃ

મુંબઈના પરેલમાં આવેલી ટાટા મેમોરિયલ હોસ્પિટલના નિષ્ણાંતોના જણાવ્યા મુજબ વસ્તી વધારો અને નિદાનની ટેક્નોલોજીમાં થયેલા સુધારા મુજબ આ વધારો ચિંતાજનક ન કહેવાય. જો કે ડેટા મુજબ કેન્સરમાં થતા મોતની સંખ્યામાં 12 ટકાનો વધારો થયો છે. વર્ષ 2012માં કેન્સરથી થતા મૃ્ત્યુની સંખ્યા 7 લાખ હતી ત્યારે 2018માં તે વધીને 7 લાખ 80 હજાર થઈ ગઈ છે.

ઓરલ કેન્સરમાં 114%નો વધારોઃ

2012થી 2018 વચ્ચે 6 વર્ષમાં કેન્સરને કારણે થનારા મોતમાં 80 હજારની વૃદ્ધિ તમને સામાન્ય લાગતી હશે પણ ICMRના કેન્સર સેન્ટરના ડાયરેક્ટર રવિ મહરોત્રાની માનીએ તો હોઠ અને ઓરલ કેવિટી કેન્સરમાં છેલ્લા 6 વર્ષમાં 114 ટકાનો વધારો થયો છે. 2012માં આવા 56000 કેસ હતા જ્યારે 2018માં તે વધીને 1 લાખ થઈ ગયા હતા. આ ઉપરાંત શહેરી લાઈફસ્ટાઈલને કારણે બ્રેસ્ટ કેન્સરના કિસ્સામાં 11 ટકાનો વધારો થયો છે. 2012માં આવા કેસ 1.4 લાખ હતા જ્યારે 2018માં વધીને 1.6 લાખ થઈ ગયા છે.

સર્વાઈકલ કેન્સર ઘટ્યુંઃ

ડો. મહરોત્રા જણાવે છે, જાગૃતિ વધતા અને સ્ક્રીનિંગ તથા ટ્રીટમેન્ટ ફેસિલિટી સુધરતા, મોટી ઉંમરે લગ્ન, પ્રેગ્નેન્સીની ઘટતી સંખ્યા અને સ્વચ્છતામાં વધારો થતા ઈન્ફેક્શનની સંખ્યા ઘટી ગઈ છે. આ કારણે સર્વાઈકલ કેન્સર સાથે જોડાયેલા કેસ ઘટી ગયા છે. 2012માં 1.23 લાખ સર્વાઈકલ કેન્સરના કેસ હતા જે ઘટીને 96 હજાર થઈ ગયા છે. અર્થાત્ 21 ટકા ઘટ્યા છે.