પેટ્રોલ-ડીઝલના ભાવ હજુ ઘટવાના સંકેત

66744759

નવી દિલ્હી:ક્રૂડના ભાવ ઓક્ટોબરમાં 86 ડોલરની ઊંચી સપાટીથી ઘટીને 63 ડોલર સુધી આવી જતાં સ્થાનિક ઈંધણના ભાવમાં હજુ ઘટાડો થવાની સંભાવના છે. 17 ઓક્ટોબરથી ઈંધણના ભાવ ઘટાડાનો ટ્રેન્ડ શરૂ થયા પછી પેટ્રોલમાં ₹6.45 અને ડીઝલમાં ₹4.42નો ઘટાડો થયો છે. બુધવારે અમદાવાદમાં પેટ્રોલનો ભાવ ₹73.64 અને ડીઝલનો ભાવ ₹74.55 હતો, જ્યારે નવી દિલ્હીમાં પેટ્રોલનો ભાવ ₹76.38 અને ડીઝલનો ભાવ ₹71.27 હતો.
ઉલ્લેખનીય છે કે મંગળવારે ડબલ્યુટીઆઇ અને બ્રેન્ટ ક્રૂડના ભાવમાં ચાર ટકાનો ઘટાડો થયો હતો. જોકે, બુધવારે ક્રૂડમાં તેજી હતી. આ લખાય છે ત્યારે ડબલ્યુટીઆઇ ક્રૂડ 1.76 ટકા વધીને 54.37 ડોલર અને બ્રેન્ટ ક્રૂડ 1.3 ટકા વધીને 63.34 ડોલર ચાલી રહ્યું છે.
સરકારી માલિકીની ઓઇલ કંપનીઓ ક્રૂડના ભાવઘટાડાનો લાભ પાસ કરે તો ભાવ હજુ ઘટી શકે છે. પેટ્રોલ અને ડીઝલના સ્થાનિક ભાવ દૈનિક નક્કી થાય છે અને તેનો આધાર છેલ્લા 15 દિવસના આંતરરાષ્ટ્રીય ક્રૂડ ભાવ તથા એક્સ્ચેન્જ રેટ છે. અલબત્ત, સ્થાનિક ભાવ નિર્ધારણમાં હંમેશા આંતરરાષ્ટ્રીય ટ્રેન્ડનું પાલન નથી કરવામાં આવતું કારણ કે પ્રાઇસિંગ પ્રોસેસમાં ઓઇલ કંપનીઓ ઈંધણના ભાવમાં જરૂરિયાત કરતાં વધુ ‌વધારો કે ઓછો ઘટાડો કરતી હોય છે. ક્યારેક સરકારના નિર્દેશનું પણ પાલન કરવું પડે છે.
પુરવઠામાં વધારો થવાને કારણે અને માગની સંભાવના ઘટવાને કારણે ક્રૂડ ઓઇલના ભાવ ઘટી રહ્યા છે. અમેરિકા, રશિયા અને સાઉદી અરેબિયામાંથી પુરવઠો વધવાને કારણે તથા ઓપેકના દેશો તથા સાથી દેશો દ્વારા ઉત્પાદન કાપ બાદ મંત્રણા શરૂ થવાના અહેવાલે પુરવઠો વધવાની ભીતિ વધી ગઈ છે.
જોકે, અમેરિકન પ્રમુખ ડોનાલ્ડ ટ્રમ્પે નીચા ભાવ પર ભાર મૂકતાં ઓપેકના નેતા સાઉદી અરેબિયાને ઉત્પાદન ઘટાડો કરતાં અટકવાની ફરજ પડે તેવી સંભાવના છે.
અમેરિકન-ચીન ટ્રેડ વોર અને કેટલાંક વિકસિત અર્થતંત્રોમાં વૃદ્ધિ મંદ પડવાને કારણે પણ આગામી દિવસોમાં માગ નરમ થવાની ભીતિ છે.

]]>