સાયન્સ સિટીમાં હવે તમને ચા-નાસ્તો કરાવશે રોબોટ્સ, બની રહી છે રોબોટિક ગેલેરી

અમદાવાદમાં આવી રહ્યા છે રોબોટ્સ

અમદાવાદ: તમે કોઈ રેસ્ટોરામાં ઓર્ડર આપીને બેઠા હો, અને થોડી વારમાં તમને કોઈ વેઈટર નહીં પરંતુ રોબોટ આવીને તમને ફુડ સર્વ કરે તો? આ કોઈ સાયન્સ ફિક્શન ફિલ્મનો સીન નથી, પરંતુ હવે અમદાવાદમાં આવેલી સાયન્સ સિટીમાં હવે રોબોટ્સ આ રીતે જ ફરતા જોવા મળશે.

વાયબ્રન્ટ સમિટમાં દેખાશે રોબોટ્સ

સાયન્સ સિટીમાં રોબોટિક્સ ગેલેરી બની રહી છે, અને તેનું 70 ટકા કામ પૂરું થઈ ચૂક્યું છે. જાન્યુઆરી મહિનાથી જ તેને લોકો માટે ખૂલ્લી મૂકી દેવાશે. જોકે, રેસ્ટોરાંની માફક લોકોને ફુડ સર્વ કરતા રોબો જાન્યુઆરી 2019માં થનારી વાયબ્રન્ટ ગુજરાત સમિટ દરમિયાન સાયન્સ સિટીમાં જોવા મળશે.

વીડિયો થયો વાયરલ

હાલમાં જ બે રોબોટ્સ સરકારી ઓફિસમાં મહેમાનોને ચા સર્વ કરતા હોય તેવો એક વીડિયો વાયરલ થતાં લોકોમાં પણ તેને લઈને ઉત્સુકતા ખાસ્સી વધી છે. પ્રાપ્ત માહિતી અનુસાર, આ રોબોટ્સ કમાન્ડને કેટલી ચોકસાઈથી ફોલો કરે છે તે ચેક કરવા માટે એક ડેમો યોજવામાં આવ્યો હતો, અને તેનો જ આ વીડિયો છે.

શું છે રોબોટ્સની ખાસિયત?

સાયન્સ સિટીના એક્ઝિક્યુટિવ ડિરેક્ટર એસડી વોરાના જણાવ્યા અનુસાર, આ રોબોટ્સ ફિલિંગ્સ દર્શાવી શકે તેવા ચહેરા, કમાન્ડ પેનલ તેમજ પ્લેટ પકડી શકે તેવા બે હાથ ધરાવે છે. તેઓ તેમનામાં પ્રોગ્રામ કરાયેલા પાથ અનુસાર જે-તે જગ્યાએ હરી-ફરી શકે છે. આ સમગ્ર પ્રોજેક્ટ પાછળનો હેતુ રોબોટિક્સ કેટલું એડવાન્સ થયું છે તે બતાવવાનો છે.

126 કરોડનો પ્રોજેક્ટ

સાયન્સ સિટીમાં 10,00 ચોરસ મીટર વિસ્તારમાં 126 કરોડ રુપિયાના ખર્ચે રોબોટિક્સ ગેલેરી બનાવાઈ રહી છે. જેમાં રોબોટ્સ વિઝિટર્સનું સ્વાગત કરશે, તેમના માટે ચા-નાસ્તો લાવશે તેમજ તેમની સાથે વાતો પણ કરશે. આ ઉપરાંત, અહીં રોબોટ્સ એર હોકી જેવી ગેમ્સ પણ રમશે, મ્યુઝિકની બીટ પર ડાન્સ કરશે તેમજ પેઈન્ટિંગ કરવા ઉપરાંત મૂર્તિઓ પણ બનાવશે.