આવી રહ્યા છે નવા નિયમ, બંધ થઈ જશે આ ગાડીઓનું પ્રોડક્શન

મારુતિની બે ગાડીઓ બંધ થશે

કેતન ઠક્કર, મુંબઈ: અનેક કાર કંપનીઓ પોતાના ફેમસ મોડેલ બંધ કરી રહી છે. બીએસ-5 ફરજિયાત થતાં તેમજ સેફ્ટીના નિયમોમાં પણ મોટા ફેરફાર થતાં આ મોડેલને હવે ચાલુ રાખવા શક્ય નથી. આ મોડેલ્સમાં 1984માં લોન્ચ થયેલી મારુતિની બેસ્ટ-સેલિંગ વાન ઓમ્ની તેમજ SUV જિપ્સીનો પણ સમાવેશ થાય છે.

હ્યુન્ડાઈ, હોન્ડાની પણ સ્મોલ કાર બંધ

આ ઉપરાંત, એક સમયે દુનિયાની સૌથી સસ્તી ગાડી તરીકે વિખ્યાત થયેલી ટાટા નેનો પર પણ હવે પૂર્ણવિરામ મૂકાઈ જવાનું લગભગ નક્કી છે. ફિયાટની પુન્તો કાર પણ નવા નિયમોને કારણે આઉટ ઓફ પ્રોડક્શન થઈ જવાની છે. હ્યુન્ડાઈની ઈયોન અને હોન્ડાની બ્રિઓ જેવી સ્મોલ કાર્સ પણ આ લિસ્ટમાં સામેલ છે. કેટલીક ગાડીઓનું પ્રોડક્શન તો બંધ થઈ પણ ચૂક્યું છે.

આ કાર્સનો અવતાર બદલવો પડશે

ટાટા નેનો અને મહિન્દ્રાની ઈલેક્ટ્રીક કાર E20ના પ્રોડક્શન પર એપ્રિલ 2019થી પૂર્ણવિરામ મૂકાઈ જવાી શક્યતા છે. નિસ્સાનની ટેરાનો, ફિઆટ લિનિયા, ફોક્સવેગન એમિઓ જેવી ગાડીઓને જો નવા અવતારમાં રજૂ કરવામાં ન આવી તો તેમનું પ્રોડક્શન પણ હોલ્ટ પર મૂકાય તેવી પૂરી શક્યતા છે.

કેમ બંધ કરવું પડશે આ ગાડીઓનું પ્રોડક્શન?

એપ્રિલ 2019થી કારમાં અમુક પ્રકારના સેફ્ટી ફીચર્સ ફરજિયાત થઈ રહ્યા છે. જેનો હેતુ અકસ્માતોમાં થતી જાનહાનિને ઘટાડવાનો છે. આ ફીચર્સ હાલ જે અમુક મોડેલ્સની કાર છે તેમાં લાગુ કરવા ઘણા મુશ્કેલ અથવા તો અશક્ય છે. જેમાં એરબેગ તેમજ એન્ટિલોક બ્રેકિંગ સિસ્ટમનો પણ સમાવેશ થાય છે.

કેમ ઘડાયા કડક નિયમો?

ભારતનો સમાવેશ દુનિયાના સૌથી પ્રદૂષિત દેશોમાં થાય છે, આ ઉપરાંત 2017માં દેશમાં અકસ્માતોમાં 1,46,000 લોકોના મોત થયા હતા જે દુનિયાભરમાં સૌથી વધુ હતા. આ બંને પર કાબૂ મેળવવા માટે સરકારે કાર દ્વારા ફેલાતા પ્રદૂષણ અને અકસ્માતોમાં થતી જાનહાનિને કાબૂમાં લેવા માટે કડક નિયમ ઘડ્યા છે, જેનો આવતા વર્ષથી અમલ થવા જઈ રહ્યો છે.