બટાકાંથી ઊભરાયા કોલ્ડ સ્ટોરેજ, નીચો ભાવ મળતાં ડીસાના ખેડૂતો પરેશાન

ખેડૂતોને આવ્યો પાક ફેંકવાનો વારો

પાલનપુર: ડીસાના ખેડૂતો પાસે ભરપૂર પ્રમાણમાં બટાકાંનો ભરાવો થયો છે જેના કારણે પાક ફેંકવાની ફરજ પડી છે. થોડા વર્ષો પહેલા પણ આ જ પ્રકારે ખેડૂતોએ બટાકાંનો મોટો જથ્થો ડીસાની ગલીઓમાં ફેંક્યો હતો અથવા ઢોરને ખવડાવી દીધો હતો કારણકે બટકાંના ભાવ ખૂબ ઓછા મળતા હતા. આ વર્ષે પણ મહારાષ્ટ્ર, તમિલનાડુ અને કર્ણાટક જેવા રાજ્યોમાં છેલ્લા 15 દિવસથી બટાકાંની માગ ઘટી છે અને બટાકાંના ભાવ 20-30 ટકા ગગડ્યા છે.

40 લાખ કોથળા કોલ્ડ સ્ટોરેજમાં

પરિણામ સ્વરૂપે આશરે 40 લાખ કોથળા (દરેકમાં 50 કિલો બટાકા) ડીસા અને તેની આસપાસના 200 કોલ્ડ સ્ટોરેજમાં રાખવામાં આવ્યા છે. કોલ્ડ સ્ટોરેજ ઓનર અસોસિએશનના પ્રમુખ ગણપત કછવાએ કહ્યું કે, “બટાકાંના ભાવ પહેલા 1000 રૂપિયા પ્રતિ ક્વિન્ટલ હતા જે ઘટીને 700-800 રૂપિયા પ્રતિ ક્વિન્ટલ થયા છે. છેલ્લા 15 દિવસમાં આ ઘટાડો નોંધાયો છે. જો આ જ સ્થિતિ રહી અને ડિસેમ્બરના અંત સુધીમાં બટાકાંનો સ્ટોક ન વેચાયો તો ભાવ હજુ ઘટશે. જેના પગલે ખેડૂતો આંદોલન કરશે અને બટાકાંને ફેંકી દેશે અથવા ગૌશાળામાં દાન કરી દેશે.”

કોલ્ડ સ્ટોરેજે પાળ્યો હતો બંધ

આંદોલનના ભાગરૂપે 18 નવેમ્બરે તમામ કોલ્ડ સ્ટોરેજે બંધ પાળ્યો હતો. ખેતીવાડી વિભાગના સૂત્રો તરફથી મળેલી માહિતી પ્રમાણે, આ વખતે ખેતી 2017 જેટલી નહીં થાય, તે વખતે 66000 હેક્ટર વિસ્તારમાં વાવણી થઈ હતી. આ વર્ષે વાવણીની શરૂઆત થઈ અને 22 નવેમ્બર સુધીમાં 37,755 હેક્ટર વિસ્તારમાં ખેતી થઈ. ગયા વર્ષે આ જ સમયગાળામાં બનાસકાંઠા જિલ્લામાં 40,000 હેક્ટર વિસ્તારમાં ખેતી થઈ હતી. એગ્રિકલ્ચરના ડેપ્યુટી ડિરેક્ટર પી.કે. પટેલે કહ્યું કે, ડિસેમ્બરના પ્રથમ અઠવાડિયા સુધીમાં સામાન્ય રીતે ખેતી થઈ જાય છે.