સ્ટેચ્યુ ઓફ યુનિટી જોવા આવેલા બિહારના ડે. સીએમ સુશીલ મોદી લિફ્ટમાં ફસાયા

સ્ટેચ્યુ જોવા આવનારાને હાલાકી

વડોદરા: સ્ટેચ્યુ ઓફ યુનિટીને જોવા માટે મોટી સંખ્યામાં લોકો આવી રહ્યા છે, પરંતુ વિશ્વના આ સૌથી ઉંચા સ્ટેચ્યુને જોવા આવી રહેલા લોકોને ભારે હાલાકી ભોગવવી પડી રહી છે. ન્યૂઝ ચેનલ ટીવી 9ના અહેવાલ અનુસાર, આજે સ્ટેચ્યુ ઓફ યુનિટી જોવા આવેલા બિહારના ડેપ્યુટી સીએમ પોતાના સ્ટાફ સાથે લિફ્ટમાં ફસાઈ ગયા હતા.
અમારા ન્યૂઝ Whatsapp પર મેળવવા માટે ક્લિક કરો

લિફ્ટ ઓવરલોડ થઈ ગઈ

પ્રાપ્ત વિગતો અનુસાર, સ્ટેચ્યુ ઓફ યુનિટીની વ્યુઅર્સ ગેલેરી સુધી લઈ જતી લિફ્ટમાં બિહારના ડે. સીએમ સુશીલ મોદી અને તેમની સાથે ઊર્જા મંત્રી સૌરભ પટેલ પણ મોજુદ હતા. જોકે, ઓવરલોડ થઈ જવાના કારણે આ લિફ્ટ માત્ર પાંચ ફુટ ઉપર ચઢીને ફસાઈ ગઈ હતી. લિફ્ટ ફસાઈ જવાના કારણે પાંચ મિનિટ સુધી સુશીલ મોદી પોતાની પત્ની સાથે લિફ્ટમાં ફસાઈ રહ્યા હતા.

વ્યુઅર્સ ગેલેરી સુધી જવા બે લિફ્ટ

ટીવી નાઈનના અહેવાલ અનુસાર, લિફ્ટમાં ફસાઈ જવાના કારણે સુશીલ મોદી પરસેવે રેબઝેબ થઈ ગયા હતા. મહત્વનું છે કે, સ્ટેચ્યુ ઓફ યુનિટીમાં વ્યુઅર્સ ગેલેરી બનાવવામાં આવી છે. જ્યાં સુધી જવા માટે બે લિફ્ટ છે. આ લિફ્ટમાં એક સાથે 15-20 લોકો સમાઈ શકે છે.

દિવાળીની રજા હોવાથી જોરદાર ધસારો

હાલ દિવાળીની રજાઓ હોવાના કારણે સ્ટેચ્યુ ઓફ યુનિટી જોવા માટે રોજના હજારો લોકો આવી રહ્યાં છે, જેના કારણે ઘણીવાર અફરાતફરીનો માહોલ સર્જાઈ રહ્યો છે. સોમવારે પણ સ્ટેચ્યુ ઓફ યુનિટી બંધ હોવા છતાં મોટી સંખ્યામાં લોકો પહોંચ્યા હતા, પરંતુ ટિકિટ બારી બંધ હોવાથી તેમને પ્રવેશ નહોતો મળ્યો. બીજી તરફ, ઓનલાઈન ટિકિટ લઈ આવેલા લોકોને પ્રવેશ અપાતા પણ બબાલ થઈ હતી.

સ્ચેય્યુ ઓફ યુનિટીની ગેલેરીમાંથી દેખાતો નજારો