ભારતીયોમાં બહાર ખાવાપીવાનો શોખ વધતાં રેસ્ટોરન્ટ કંપનીઓ પાર્ટીના મૂડમાં

66651180

રત્ના ભૂષણ

નવી દિલ્હી: એક વર્ષથી મુશ્કેલીનો સામનો કરી રહેલી રેસ્ટોરન્ટ કંપનીઓને હવે વૃદ્ધિમય ભવિષ્યની અપેક્ષા છે. ઈનપુટ ટેક્સ ક્રેડિટ પાછી ખેંચી લેવાનો નિર્ણય, વધતો ફુગાવો અને નીતિવિષયક મર્યાદાઓને કારણે રેસ્ટોરન્ટ સેક્ટરની નફાકારકતાને ફટકો પહોંચ્યો હતો પરંતુ હવે તમામ ફોર્મેટની રેસ્ટોરન્ટ કંપનીઓને સારા ભાવિની આશા છે.

“ઈનપુટ ટેક્સ ક્રેડિટ પાછી ખેંચવાનો નિર્ણય આદર્શ પરિસ્થિતિ ન કહેવાય પરંતુ તેનાથી અમને તમામ સ્તરે અસરકારકતા વધારવાની ફરજ પડી હતી. હવે ગ્રાહકોનું સેન્ટિમેન્ટ સુધર્યું છે અને લોકો ક્વિક સર્વિસથી લઈને ફાઇન ડાઇનિંગથી લઈને ડિલિવરી સહિતના તમામ ફોર્મેટમાં મન માણીને પેજપૂજા કરી રહ્યા છે, જે સારી બાબત છે.” એમ ક્વિક સર્વિસ ચેઇન KFC ઇન્ડિયાના MD સમીર મેનને કહ્યું હતું.

જુલાઈ-સપ્ટેમ્બર ક્વાર્ટરમાં KFCએ વાર્ષિક ધોરણે 25 ટકા જ્યારે પિત્ઝા હટે સિસ્ટમ સેલ્સમાં 20 ટકા વૃદ્ધિ હાંસલ કરી છે. સિસ્ટમ સેલ્સ એટલે તમામ આઉટલેટ પર જે-તે બ્રાન્ડનો ઉપયોગ કરીને થયેલું કુલ વેચાણ.

“નોટબંધી, હાઈવે પર શરાબના વેચાણ પર પ્રતિબંધ અને ઈનપુટ ટેક્સ ક્રેડિટ નહીં આપવાના નિર્ણયોને કારણે ઊભી થયેલી પરિસ્થિતિનો સામનો કર્યા બાદ અમારો ઉદ્યોગ કૂદકો મારવા સજ્જ છે અને હવે સારા સંજોગોથી ફાયદો થવાની આશા સેવી રહ્યો છે.

બહાર ખાણી-પીણી કરનારા ગ્રાહકોની સંખ્યા વધવાથી તેમજ ઓર્ડર આપીને ખાવાનું મંગાવતા લોકોની સંખ્યા વધવાથી સંગઠિત રેસ્ટોરન્ટ સેક્ટરે સપ્ટેમ્બર ક્વાર્ટરમાં બે આંકડામાં વૃદ્ધિ હાંસલ કરી છે.” એમ 5,000 રેસ્ટોરન્ટ બ્રાન્ડ્સનું પ્રતિનિધિત્વ કરતા નેશનલ રેસ્ટોરન્ટ એસોસિયેશન ઓફ ઇન્ડિયાના પ્રેસિડન્ટ રાહુલ સિંઘે જણાવ્યું હતું. સિંઘ પોતાની બિયર ચેઇન ધી બિયર કાફે પણ ચલાવે છે.

‘મેઇનલેન્ડ ચાઇના’ અને ‘Oh! Calcutta’ નામથી રેસ્ટોરન્ટ ચલાવતી કંપની સ્પેશિયાલિટી રેસ્ટોરન્ટ્સના સ્થાપક અને MD અંજતન ચેટરજીએ જણાવ્યું હતું કે, “બહાર ખાવા જનારા ગ્રાહકોની સંખ્યા વધી રહી છે. ગ્રાહકોની પ્રોફાઇલ પણ ઝડપથી બદલાઈ રહી છે. હવે યુવા ગ્રાહકોની સંખ્યા વધારે હોય છે અને તેમના બેકગ્રાઉન્ડ્સ પણ વિવિધતાસભર હોય છે. આથી, વેચાણ વધારવામાં અને નફો વધારવામાં મદદ મળી છે.”

પશ્ચિમ અને દક્ષિણ ભારતમાં મેક્‌ડોનાલ્ડ્સ રેસ્ટોરન્ટનું સંચાલન કરતી કંપની વેસ્ટલાઇફ ડેવલપમેન્ટે સપ્ટેમ્બર ’18 ક્વાર્ટરમાં છ ગણી વૃદ્ધિ સાથે ₹7.9 કરોડનો નેટ પ્રોફિટ કર્યો છે જ્યારે તેની આવક 32 ટકા વધીને ₹350 કરોડ થઈ હતી. તનો સેમ-સ્ટોર સેલ્સ ગ્રોથ 25.7 ટકા હતો.

ઉત્તર અને પૂર્વ ભારતમાં મેક્‌ડોનાલ્ડ્સ રેસ્ટોરન્ટનું સંચાલન કરતી કંપની કનોટ પ્લાઝા રેસ્ટોરન્ટ્સ (CRPL)ના MD વિક્રમ બક્ષી કહે છે કે, “ગ્રાહકો મૂલ્ય અને ગુણવત્તાના ભૂખ્યા હોય છે. અમારો સેમ-સ્ટોર સેલ્સ ગ્રોથ 25 ટકા થયો છે.” ડોમિનોસ પિત્ઝા અને ડન્કિન ડોનટ્સનું સંચાલન કરતી જુબિલન્ટ ફૂડવર્ક્સે પણ સેમ-સ્ટોર સેલ્સમાં 20.5 ટકા વૃદ્ધિ કરી છે જ્યારે તેનો નેટ પ્રોફિટ ₹77.7 કરોડ થયો છે.

]]>

from Page Array – I Am Gujarat https://ift.tt/2Bfh8f1