મેક્રો ડેટા તેમજ ક્રૂડના ભાવ બજારને દોરશે

66575423

રિતુરાજ બરુઆ

મુંબઈ: બજાર નિષ્ણાતોના મતે આગામી સપ્તાહે ફુગાવા તેમજ ફેક્ટરી આઉટપુટ સહિતના મેક્રો ડેટા તેમજ ક્રૂડ ઓઈલના આંતરરાષ્ટ્રીય ભાવ શેરબજારને દોરશે.

ગયા સપ્તાહની રેન્જબાઉન્ડ મુવમેન્ટ બાદ આ સપ્તાહે 12 નવેમ્બરથી શરૂ થઈ રહેલી વિધાનસભાની ચૂંટણીની પણ શેરબજારના સેન્ટિમેન્ટ પર અસર જોવા મળે તેવી શક્યતા છે.

આ સપ્તાહે સરકાર ઓક્ટોબર મહિનાના કન્ઝ્યુમર પ્રાઈસ ઈન્ડેક્સ (CPI) તેમજ હોલસેલ પ્રાઈસ ઈન્ડેક્સ (WPI)ના ડેટા જાહેર કરશે. રિટેલ ફુગાવો ઓગસ્ટ 3.69 ટકાથી વધીને સપ્ટેમ્બરમાં 3.77 ટકા થયો હતો જ્યારે જથ્થાબંધ ભાવાંક આધારિત ફુગાવાનો દર ઓગસ્ટમાં 4.53 ટકા હતો તે વધીને સપ્ટેમ્બરમાં 5.13 ટકા નોંધાયો હતો.

છત્તીસગઢમાં 12 નવેમ્બરથી વિધાનસભાની ચૂંટણીના પ્રથમ તબક્કાની શરૂઆત થશે અને ત્યારબાદ નવેમ્બર અને ડિસેમ્બરમાં મધ્યપ્રદેશ, રાજસ્થાન, છત્તીસગઢ, તેલંગણા તેમજ મિઝોરમ વિધાનસભાની ચૂંટણી યોજાશે.

હાલમાં મધ્યપ્રદેશ, રાજસ્થાન અને છત્તીસગઢમાં સત્તારૂઢ ભારતીય જનતા પક્ષ જો આ રાજ્યોમાં ફરીથી સત્તા પર આવશે તો લોકસભાની આગામી વર્ષે યોજાનારી ચૂંટણીમાં વડાપ્રધાન નરેન્દ્ર મોદીના વિજયની શક્યતાઓ ઉજળી બનશે.

બજાર નિષ્ણાતોના મતે ગયા સપ્તાહે થોડા નરમ બનેલા ક્રૂડના ભાવ પર વિશેષ નજર રહેશે અને ક્રૂડના ભાવ આગામી દિવસોમાં બજારને દિશા આપશે.

9 નવેમ્બરે પૂરા થયેલા સપ્તાહે ક્રૂડના ભાવ તાજેતરની ઊંચી સપાટીથી ખાસ્સા રિકવર થયા હતા. ઓક્ટોબરના બેરલદીઠ 86 ડોલરની સરખામણીમાં 9 નવેમ્બરે બ્રેન્ટ ક્રૂડ બેરલદીઠ 70ની આસપાસ ટ્રેડ થયું હતું.

ભારત તેની કુલ જરૂરિયાતના 80 ટકા ક્રૂડની આયાત કરે છે અને તેથી ક્રૂડના આંતરરાષ્ટ્રીય ભાવમાં વધારાથી એશિયાના સૌથી મોટો અર્થતંત્ર સામે ફુગાવો વકરવાની સમસ્યાનું જોખમ સર્જાયું હતું.

ભારતીય ઈકવિટી માર્કેટ માટે અમેરિકન ડોલર સામે રૂપિયાની ચાલ પણ એક મહત્ત્વનું પરિબળ સાબિત થઈ શકે છે. શુક્રવારે (9 નવેમ્બરે) ડોલર સામે ભારતીય રૂપિયો 51 પૈસાના સુધારા સાથે 72.49ની સપાટીએ બંધ રહ્યો હતો.

જાહેર રજાઓ સાથેના ટૂંકા ટ્રેડિંગ સપ્તાહ દરમિયાન ગત શુક્રવારે BSE સેન્સેક્સ 146.9 પોઈન્ટ્સ અથવા 0.41 ટકા વધીને 35,158.55 પોઈન્ટ્સની સપાટીએ બંધ રહ્યો હતો.

નેશનલ સ્ટોક એક્સચેંજનો નિફ્ટી પણ 32 પોઈન્ટ્સ અથવા 0.30 ટકા વધીને 10,585.20 પોઈન્ટ્સની સપાટીએ બંધ રહ્યો હતો.

બુધવારે શેરબજાર લક્ષ્મી પૂજન નિમિત્તે બંધ રહ્યું હતું જોકે, સાંજે 5.30થી 6.30 સુધી બજારમાં મૂહુર્ત ટ્રેડિંગ યોજાયું હતું. પ્રોવિઝનલ આંકડા અનુસાર 9 નવેમ્બરના રોજ પૂરા થયેલા ટ્રેડિંગ સપ્તાહ દરમિયાન ફોરેન ઈન્સ્ટીટ્યૂશનલ ઈન્વેસ્ટર્સે (FIIs)₹157.79 કરોડના શેર્સની લેવાલી કરી હતી. ડોમેસ્ટિક ઈન્સ્ટટ્યૂશનલ ઈન્વેસ્ટર્સે (DIIs)₹813.42 કરોડના શેર્સની વેચવાલી કરી હતી.

HDFC સિક્યુરિટીઝના રિટેલ રિસર્ચ હેડ દીપક જસાણીએ કહ્યું હતું કે, નિફ્ટીમાં 10,755 પ્રતિકાર સપાટી છે જ્યારે 10,444 મહત્ત્વની ટેકાની સપાટી જણાય છે.

]]>

from Page Array – I Am Gujarat https://ift.tt/2Ffvjoh