દિવાળી બગડતાં અટકી પણ માર્કેટમાં મંદીનું જોખમ બરકરાર

66521320

ભાર્ગવ ત્રિવેદી

અમદાવાદ:વૈશ્વિક બજારોમાં અટકેલા ઘટાડાને પગલે સ્થાનિક બજારમાં જોવા મળેલા બાઉન્સ પાછળ ટ્રેડર્સની દિવાળી વણસતી અટકી છે જોકે બજારમાં તેજી પાછી ફરી છે એવું એનાલિસ્ટ્સ નથી માનતા.

છેલ્લાં છ-એક ટ્રેડિંગ સત્રોમાં માર્કેટે લોંગ ટ્રેડર્સને માત્ર રાહત જ નહીં પરંતુ સાહસ કરનારાઓને કમાણીની નોંધપાત્ર તક પૂરી પાડી છે. આનાથી ઊલટું, સપ્તાહ અગાઉ તળિયાના ભાવે પોઝિશન છોડી બેઠેલાઓ અથવા નિફ્ટીમાં 10,000નો સ્તર તૂટશે તો વધુ કડાકો જોવા મળશે એવા ગભરાટથી માલ વેચી ચૂકેલાઓ પસ્તાઈ પણ રહ્યા છે.

એનાલિસ્ટ્સના મતે માર્કેટ હાલમાં સ્થિરતા મેળવવાનો પ્રયત્ન કરી રહ્યું છે પરંતુ તે એકતરફી ચાલ દર્શાવે તેવી સંભાવના ઓછી છે. જોકે નવેમ્બર મહિનો સપ્ટેમ્બર અને ઓક્ટોબરની જેટલો ખરાબ રહેવાની શક્યતા ઓછી છે.

“છેલ્લાં કેટલાંક સત્રોમાં નોંધપાત્ર બાઉન્સ બાદ બજાર હાલમાં કોન્સોલિડેટ થઈ રહ્યું છે. કેટલોક સમય તે રેંજમાં ટ્રેડ થાય તેવું બની શકે છે પરંતુ સરવાળે વધુ સુધારાની સંભાવના વધુ છે.” એમ એચડીએફસી સિક્યોરિટીઝના સિનિયર એનાલિસ્ટ વિનય રાજાણી જણાવે છે. તેમના મતે બીજા ક્વાર્ટરનાં અર્નિંગ્સ સારાં રહ્યાં છે અને ક્રૂડમાં નોંધપાત્ર ઘટાડો જોવા મળ્યો છે. જેની પાછળ રૂપિયો પણ રિકવરી તરફ છે. આ સ્થિતિમાં બજારનું સેન્ટિમેન્ટ ધીમે-ધીમે પોઝિટિવ બનશે અને ટ્રેડર્સ પણ માર્કેટમાં પરત ફરશે.

જોકે બજારમાં મોટી લોંગ પોઝિશન લેવાથી દૂર રહેવાની સલાહ તેઓ આપે છે. તેમના મતે ચાલુ મહિનો છેલ્લા બે મહિના જેટલો ખરાબ નહીં હોય. આમ પણ દિવાળીના તહેવારોને કારણે બજારમાં કામકાજ પર સાધારણ અસર થઈ શકે છે. જે આગામી સપ્તાહથી રાબેતા મુજબ બનશે. સોમવારે માર્કેટ મોટા ભાગનો સમય સાંકડી રેંજમાં અથડાતાં રહ્યાં હતાં અને સેન્સેક્સ અને નિફ્ટી નરમાઈ સાથે બંધ આવ્યા હતા. જોકે નિફ્ટીએ 10,500નો સ્તર જાળવી રાખ્યો છે, જે એક મહત્ત્વનો સેન્ટિમેન્ટલ સપોર્ટ છે. આ સ્તર તૂટે તો નિફ્ટી પુન: 10,200 સુધી ગગડી શકે છે અને માંડ માર્કેટમાં પરત ફરેલા ટ્રેડર્સ ફરીથી ગભરાટ અનુભવી શકે છે.

અમદાવાદ સ્થિત પ્રુડન્ટ બ્રોકિંગના સિનિયર એનાલિસ્ટ પ્રદીપ હોતચંદાણીના મતે જોકે માર્કેટમાં લોંગ પોઝિશન કરતાં શોર્ટ પોઝિશનમાં જોખમ ઓછું રહેલું છે. “મને લાગે છે કે ટેક્‌નિકલી માર્કેટ તેની અગાઉની બોટમને ટેસ્ટ કરવાનો પ્રયત્ન કરશે અને તેથી વર્તમાન સ્તરે લોંગ પોઝિશન લેવામાં જોખમ વધુ છે.” એમ હોતચંદાણી જણાવે છે.

તેઓના કહેવા મુજબ નિફ્ટીમાં 10,000-10,765ની એક ટ્રેડિંગ રેંજ રહેશે. 10,765નો સ્તર એ 200 દિવસની સરેરાશ મૂવિંગ એવરેજ છે. આમ વર્તમાન સ્તરેથી બજારમાં સુધરવાની જગ્યા 200 પોઇન્ટની જ્યારે ઘટવા માટે 500-550 પોઇન્ટ રહેલા છે. સોમવારે કેશ નિફ્ટી 10,524ના સ્તરે બંધ રહ્યો હતો.

શુક્રવારે એક તબક્કે નિફ્ટી ઇન્ટ્રા-ડે દરમિયાનો સ્તર પણ કુદાવ્યું હતું. સોમવારે જોકે તે આ સ્તર નજીક પણ નહોતો પહોંચી શક્યો. આમ માર્કેટમાં ટ્રેડર્સ સાવચેતી દાખવી રહ્યાનું પુરવાર થાય છે. ચાલુ સપ્તાહે બુધવારે સામાન્ય ટ્રેડિંગને સ્થાને મુહૂર્ત ટ્રેડિંગ ચાલુ રહેશે. જ્યારે ગુરુવારે વિક્રમ સંવતના નવા વર્ષ નિમિત્તે રજા રહેશે. આમ સપ્તાહ નાનું છે.

]]>

from Page Array – I Am Gujarat https://ift.tt/2F13Ma6