મહિલા T20 વર્લ્ડકપઃ આજે ભારત અને પાકિસ્તાન વચ્ચે જામશે રોમાંચક જંગ

ભારત-પાકની ટક્કર જોવા રહો તૈયાર

ગુયાના (વેસ્ટ ઈન્ડીઝ): મહિલા ટી20 વર્લ્ડકપમાં આજે ભારત અને પાકિસ્તાનની હાઈ વોલ્ટેજ મેચ છે. પાકિસ્તાનની ટીમ સામે સૌથી મોટો પડકાર જબરજસ્ત ફોર્મમાં ચાલી રહેલી હરમનપ્રીત કૌર હશે. ટૂર્નામેન્ટની પહેલી જ મેચમાં હરમને ધમાકેદાર સદીથી સૌ કોઈને ચોંકાવી દીધા હતા. ક્રિકેટના જાણકાર ભારતીય ટીમને ભારે માની રહ્યા છે. આંકડાની વાત કરીએ તો તે પણ ભારતના પક્ષમાં છે. ભારત અને પાકિસ્તાનની મહિલા ટીમો અત્યાર સુધી 10 વખત આમને સામને ટકરાઈ છે. જેમાં 8 વખત ભારત અને 2 વખત પાકિસ્તાન જીત્યું છે. તો ટી20 વર્લ્ડકપમાં બંને ટીમો અત્યાર સુધી 5 વખતે ટકરાઈ છે, જેમાં 3 મેચ ભારતે જીતી છે. મેચ ભારતીય સમય અનુસાર રાત્રે 8.30 કલાકે શરૂ થશે.

હરમનપ્રીતને રોકી શકશે પાક ટીમ?

મહિલા ક્રિકેટ ટીમની કેપ્ટન હરમનપ્રીત કૌર ટી20 ઈન્ટરનેશલન ક્રિકેટમાં સદી ફટકારનારી પહેલી મહિલા ભારતીય ખેલાડી છે. 29 વર્ષની હરમનપ્રીતે આઈસીસી મહિલા ટી20 વર્લ્ડકપમાં ન્યૂઝીલેન્ડ સામે આ ઉપબલ્ધિ હાંસેલ કરી હતી. તેણે 51 બોલમાં 103 રનની ઈનિંગમાં સાત ચોગ્ગા અને આઠ છગ્ગા ફટકાર્યા હતા.

T-20 WCમાં સદી ફટકારનારી ત્રીજી ખેલાડી

કેપ્ટન હરમનપ્રીતે પહલા 50 રન 33 બોલમાં અને બીજા 50 રન માત્ર 16 બોલમાં જ કરી નાખ્યા. હરમનપ્રીતની આ સદીની મદદથી ભારતે 20 ઓવરમાં પાંચ વિકેટે 194 રનનો સ્કોર બનાવ્યો. મહિલા ટી20 વર્લ્ડકપમાં કોઈ ટીમ દ્વારા આ સર્વોચ્ચ સ્કોર છે. જ્યારે હરમનપ્રીત ટી-20 વર્લ્ડકપમાં સદી કરનારી દુનિયાની ત્રીજી મહિલા ક્રિકેટર બની ગઈ છે.

વર્લ્ડકપમાં ગ્રુપ Bમાં છે ભારત

મહિલા ટી-20 વર્લ્ડકપમાં ભારત ગ્રુપ બીમાં છે. તેમાં ઓસ્ટ્રેલિયા, ન્યૂઝીલેન્ડ, આયરલેન્ડ અને પાકિસ્તાનની ટીમો પણ છે. બીજી તરફ ગ્રુપ એમાં વેસ્ટ ઈન્ડીઝ, ઈંગ્લેન્ડ, સાઉથ આફ્રિકા, શ્રીલંકા અને બાંગ્લાદેશની ટીમો છે. બંને ગ્રુપની ટોપ-2 ટીમો સેમીફાઈનલમાં પહોંચશે. એંટિગામાં 22 નવેમ્બરે સેમીપાઈનલ મુકાબલો અને 24મી નવેમ્બરે ફાઈનલ મેચ રમાશે.

from Cricket News in Gujarati, ક્રિકેટ સમાચાર, Cricket Updates – Page Array – I Am Gujarat https://ift.tt/2ROIC0C