ગાંધીનગરઃ હોસ્પિટલથી 32 કિમી દૂર બેસીને ડોક્ટરે દર્દીના હાર્ટનું ઓપરેશન કર્યું

ડોક્ટરે હોસ્પિટલથી દૂર બેસીને કર્યું દર્દીનું ઓપરેશન

ગાંધીનગરઃ ગાંધીનગરના અક્ષરધામ સ્વામિનારાયણ મંદિરે ઈતિહાસ રચ્યો છે. અહીંના વરિષ્ઠ કાર્ડિયોલોજિસ્ટ ડો. તેજસ પટેલે મંદિરના પરિસરમાં બેસીને જ એક મહિલાની સફળ હાર્ટ સર્જરી કરી. ડો. પટેલે મંદિરના પરિસરથી ઈન હ્યુમન ટેલિરોબોટિક કોરોનરી પ્રક્રિયા દ્વારા એન્જિયોપ્લાસ્ટી સર્જરી કરી. જ્યારે મહિલા દર્દી ત્યાંથી લગભગ 32 કિમી દૂર એસ.જી હાઈવે પરની એપેક્સ હોસ્પિટલના ઓપરેશન થિયેટરમાં એડમીટ હતી.

દુનિયાનું પહેલું આ પ્રકારનું ઓપરેશન

ડો. પટેલે દાવો કર્યો છે કે આ દુનિયાનું પહેલું ‘ઈન હ્યુમન ટેલિરોબોટિક કોરોનરી ઈન્ટરવેન્શન’ છે જે દૂર જગ્યાએ બેસીને કરાયું છે. આ પ્રક્રિયા ઓપરેશન થિયેટરના કેથ લેબમાં ઉપસ્થિત ઈન્ટરનેટ ઈનેબલ રોબોટિક આર્મ દ્વારા થઈ શકી, જેને ડો. પટેલ મંદિરના પરિસરમાં રિમોટ દ્વારા ઓપરેટ કરી રહ્યા હતા.

માત્ર 10 મિનિટમાં હાર્ટમાં સ્ટેન્ટ મૂકાયો

મહિલાને હાલમાં હાર્ટ એટેક આવ્યો હતો, તેની લોહીની નળીઓ બ્લોક થઈ ગઈ હતી. રોબોટિક પ્રક્રિયા દ્વારા આ બ્લોકેજને દૂર કરવામાં આવ્યું. અક્ષરધામ મંદિર સંકુલમાં બેઠા બેઠા ડો. પટેલે જોયસ્ટીકની મદદથી માત્ર 10 મિનિટથી પણ ઓછા સમયમાં સ્ટેન્ટ મુકી દીધો હતો. ડો. પટેલે જણાવ્યું કે ટેલિરોબોટિક કોરોનરી દ્વારા રિમોટ એરિયામાં દર્દીને એડવાન્સ સ્વાસ્થ્ય સુવિધાઓ આપવાની સંભાવના છે.

મુખ્યમંત્રીએ પણ નિહાળી સમગ્ર સર્જરીની પ્રક્રિયા

ડો. પટેલે સર્જરી બાદ કહ્યું કે, આજે દર્દી 32 કિમી દૂર હતો, કાલે આ ટેકનોલોજી દ્વારા એક્સપર્ટ રાજ્ય અથવા અન્ય દેશમાં બેસીને કોઈપણ દર્દીની સફળતાપૂર્વક સર્જરી કરી શકશે. આ દરમિયાન રાજ્યના મુખ્યમંત્રી વિજય રૂપાણી મંદિરમાં ઉપસ્થિત હતા. તેમણે આ સર્જરીની તસવીરો શેર કરી અને તેને રાજ્યની ઉપલબ્ધિમાં ગૌરવપૂર્ણ બાાબત બતાવી હતી.

from Page Array – I Am Gujarat https://ift.tt/2romAqo