અમદાવાદ: રોંગ સાઈડમાં વાહન ચલાવનારા સાત લોકોના લાઈસન્સ સસ્પેન્ડ

નિયમ ભંગ કરનારાને સીધા RTO લઈ જવાયા

અમદાવાદ: ટ્રાફિકના નિયમોનું પાલન ન કરનારા અમદાવાદીઓ પાઠ ભણાવવા ટ્રાફિક પોલીસ અને આરટીઓએ હાથ મિલાવ્યો છે. મંગળવારે રોંગ સાઈડ ડ્રાઈવ કરનારા સાત લોકોના લાઈસન્સ તાત્કાલિક અસરથી આરટીઓ દ્વારા સસ્પેન્ડ કરી દેવામાં આવ્યા હતા. આગામી દિવસોમાં પણ ટ્રાફિકના નિયમ તોડનારા લોકો સામે કડક પગલાં લેવાની કામગીરી પોલીસ અને આરટીઓ દ્વારા ચાલુ રાખવામાં આવશે.

31 લોકો સામે થઈ FIR

મંગળવારે રોંગ સાઈડમાં વાહન ચલાવતા સાત અમદાવાદીઓને પોલીસ આરટીઓ લઈ ગઈ હતી અને તેમના ડ્રાઈવિંગ લાઈસન્સને સાત દિવસ માટે તાત્કાલિક ધોરણે સસ્પેન્ડ કરાવી દીધું હતું. માધુપુરા અને રાણીપ પોલીસ સ્ટેશન વચ્ચે જોખમી રીતે વાહન ચલાવતા 31 લોકો સામે FIR દાખલ કરવામાં આવી હતી.

છ મહિના કેદ, રોકડ દંડની જોગવાઈ

બી ડિવિઝન ટ્રાફિક એસીપી આકાશ પટેલે અમદાવાદ મિરર સાથે વાત કરતા જણાવ્યું હતું કે, પોલીસ દ્વારા રોંગ સાઈડમાં વાહન ચલાવી, જોખમી ડ્રાઈવિંગ કરી રાહદારીઓ તેમજ વાહનચાલકો સામે જોખમ સર્જનારા લોકો સામે કલમ 279 હેઠળ કેસ કરવામાં આવી રહ્યા છે. આ કલમમાં છ મહિનાની કેદ અને એક હજાર રુપિયાના દંડની જોગવાઈ છે.

જોખમી ડ્રાઈવિંગ બદલ થઈ શકે લાઈસન્સ સસ્પેન્ડ

તેમણે જણાવ્યું હતું કે, અકસ્માત થાય તે રીતે વાહન ચલાવનારાનું લાઈસન્સ આરટીઓ કલમ 19 (એફ) હેઠળ સસ્પેન્ડ થઈ શકે છે. જોખમી ડ્રાઈવિંગને લીધે અકસ્માત થાય તે પહેલા આવા વાહનચાલકોનું લાઈસન્સ સસ્પેન્ડ કરાવવાનું પોલીસે નક્કી કર્યું છે.

આરટીઓના ધક્કા ખાવા પડશે

અમદાવાદના એઆરટીઓ એસ મોજણીદારે પણ જણાવ્યું હતું કે, પોલીસની ભલામણ પર આરટીઓ દ્વારા સાત લોકોના લાઈસન્સ ત્રણ મહિના માટે સસ્પેન્ડ કરવામાં આવ્યા છે. અમદાવાદ વેસ્ટના ટ્રાફિક ડીસીપી સંજય ખરાટે જણાવ્યું હતું કે, લાઈસન્સ રદ્દ થતા આરટીઓમાં ધક્કા ખાવામાં સમય વેડફાશે તેનાથી લોકો સબક લઈને ટ્રાફિકના નિયમોનું પાલન કરતા થશે તેવી આશા છે.

from Page Array – I Am Gujarat https://ift.tt/2EF8xW7