શ્રેણીબદ્ધ ઇવેન્ટથી બજારની કસોટી થશે

66918707

સનમ મીરચંદાની

મુંબઈ:ભારતનાં બજારો ડિસેમ્બરમાં સંખ્યાબંધ ઇવેન્ટનો સામનો કરવો પડશે. પાંચ રાજ્યોમાં ચૂંટણીનાં પરિણામ, રિઝર્વ બેન્કની બેઠક અને ક્રૂડ ઓઇલના ભાવ જેવી ઇવેન્ટ બજારની નવેમ્બરમાં મળેલી મજબૂતાઈની કસોટી કરશે.

બે મહિના સુધીના ઘટાડા બાદ સેન્સેક્સ અને નિફ્ટી નવેમ્બરમાં આશરે પાંચ ટકા વધ્યા હતા, જે જુલાઈ પછીનો સૌથી મોટો માસિક વધારો હતો. ક્રૂડ ઓઇલના ભાવમાં ઘટાડો, ડોલર સામે રૂપિયામાં મજબૂતાઈ, અમેરિકામાં ફેડરલ રિઝર્વ બેન્કના વડાના વ્યાજદર અંગે હળવા વલણ તથા અમેરિકા અને ચીન વચ્ચે વેપારયુદ્ધમાં સુલેહની આશાથી બજારને મજબૂત ટેકો મળ્યો હતો. વિદેશી રોકાણકારોએ ₹6,000 કરોડના શેરો ખરીદ્યા હતા અને તેઓ બજારમાં પરત આવ્યા હતા.

કોટક મહિન્દ્રા એસેટ મેનેજમેન્ટ કંપનીના સીઆઇઓ (ઇક્વિટી) હર્ષ ઉપાધ્યાયે જણાવ્યું હતું કે, “બે મહત્ત્વની ઇવેન્ટમાં ઓપેકની બેઠક અને ચૂંટણીના પરિણામનો સમાવેશ થાય છે. ઓપેકની બેઠકમાં ક્રૂડ ઓઇલના ઉત્પાદનમાં ઘટાડાની ચર્ચા થશે અને રાજ્ય વિધાનસભાની ચૂંટણીના પરિણામ ૧૧ ડિસેમ્બરે આવશે. આ બંને ઇવેન્ટ બજારની દિશા નક્કી કરશે.”

ઉત્પાદનકાપની વિચારણા કરવા ઓપેક અને તેના સાથી દેશો 6-7 ડિસેમ્બરે બેઠક યોજશે. રિઝર્વ બેન્કની નાણાનીતિની સમીક્ષા બુધવારે પૂરી થશે અને બજારમાં ધારણા છે કે રિઝર્વ બેન્ક રેપો રેટને 6.5 ટકાના સ્તરે જાળવી રાખશે.

સોમવારે બજાર ખૂલશે ત્યારે તેમાં જીડીપીના ડેટાની પ્રતિક્રિયા આવશે. ભારતનો જીડીપી વૃદ્ધિદર સપ્ટેમ્બર ક્વાર્ટરમાં અગાઉના ક્વાર્ટરના 8.2 ટકાથી ઘટીને 7.1 ટકા થયો હતો. જોકે મની મેનેજર્સે જણાવ્યું હતું કે જીડીપી વૃદ્ધિમાં ઘટાડાને કારણે બજારમાં કોઈ નોંધપાત્ર વેચવાલી આવવાની શક્યતા નથી.

અમેરિકા અને ચીનના વડા વચ્ચેની બેઠકમાં વેપારયુદ્ધમાં ઘટાડાનો સંકેત મળ્યો છે, જે બજાર માટે પોઝિટિવ છે. જોકે બજારમાં તમામની નજર રાજ્ય વિધાનસભાની ચૂંટણીના રિઝલ્ટ પર રહેશે, કારણ કે લોકસભાની આગામી ચૂંટણી પહેલાં રાજકીય વલણનો સંકેત મળશે. છત્તીસગઢ, મધ્યપ્રદેશ, મિઝોરમ, રાજસ્થાન અને તેલંગણાની ચૂંટણીનાં પરિણામ જાહેર થશે.

ઇલેરા સિક્યોરિટીઝના હેડ (ઇન્સ્ટિટ્યૂશનલ રિસર્ચ) રવી મુથુક્રિષ્નને જણાવ્યું હતું કે, “રાજ્ય વિધાનસભાની ચૂંટણીના અંદાજિત પરિણામ અને વાસ્તવિક પરિણામ વચ્ચેના તફાવતને આધારે બજારની દિશા નક્કી થશે. તેનાથી 2019માં લોકસભાની ચૂંટણીના રિઝલ્ટ અંગેનો પણ સંકેત મળી શકે છે. નિર્મલ બંગના સીઇઓ (ઇન્સ્ટિટ્યૂશનલ ઇક્વિટીઝ) રાહુલ અરોરાએ જણાવ્યું હતું કે, “જો રાજ્યોની ચૂંટણીનાં પરિણામ બજાર માટે પ્રતિકૂળ આવશે તો પણ નિફ્ટી 10,000થી નીચે નહીં જાય.”

from Page Array – I Am Gujarat https://ift.tt/2QtI7vY