નવી દિલ્હી:ડિપાર્ટમેન્ટ ઓફ ટેલિકોમ (DoT)એ રિલાયન્સ કોમ્યુનિકેશન્સ અને રિલાયન્સ જિયો ઇન્ફોકોમને જણાવ્યું છે કે, સ્પેક્ટ્રમ ટ્રેડ માટે બંનેએ કરેલો સોદો સરકારે નક્કી કરેલા સ્પેક્ટ્રમ ટ્રેડિંગનાં ધારાધોરણો સાથે બંધ બેસતો નથી. આ સોદાને માન્યતા ન મળવાને કારણે અનિલ અંબાણીની ટેલિકોમ કંપનીઓ દ્વારા ક્રેડિટર્સને પૈસા ચૂકવવાના તથા નાદારીની પ્રક્રિયા ટાળવાના પ્રયાસોને મોટો ફટકો પડ્યો છે.
મુકેશ અંબાણીની રિલાયન્સ જિયો દ્વારા DoTને પત્ર લખીને ખાતરી માંગવામાં આવી હતી કે, આરકોમે ભૂતકાળના નહીં ચૂકવેલા સ્પેક્ટ્રમ સંબંધિત પેમેન્ટ માટે રિલાયન્સ જિયો પાસેથી પેમેન્ટની માંગણી નહીં કરવામાં આવે. તેના આ પત્ર બાદ DoT દ્વારા અંબાણીબંધુની કંપનીઓ વચ્ચેના સોદાને રદ કરવામાં આવ્યો છે.
શુક્રવારે મોકલેલા પત્રમાં જિયોએ જણાવ્યું હતું કે, “સ્પેક્ટ્રમ ટ્રેડિંગ એગ્રીમેન્ટ (જેમાં આરકોમ દ્વારા 122.4 મેગાહર્ટ્ઝનું સ્પેક્ટ્રમ જિયોને વેચવામાં આવશે.) સ્પષ્ટપણે દર્શાવે છે કે, મુકેશના નાના ભાઈ અનિલની કંપની જે ક્લેમ્સને લઈને વિવાદો ચાલી રહ્યા છે તેના માટે ટેલિકોમ ડિપાર્ટમેન્ટને બેન્ક ગેરન્ટી પૂરી પાડશે. જો સ્પેક્ટ્રમ ટ્રેડિંગ સોદા બાદ કોઈ ક્લેમ કરવામાં આવે તો જ રિલાયન્સ જિયોને તેના માટે જવાબદાર ગણવામાં આવે અને સોદા પહેલાંના જે ક્લેમ્સ છે તેના માટે જિયો જવાબદાર નહીં રહે.”
સરકારનાં સ્પેક્ટ્રમ ટ્રેડિંગ ધારાધોરણો પ્રમાણે, વેચાણકાર દ્વારા ભૂતકાળના જે ક્લેમ્સ ચૂકવવામાં આવ્યા ન હોય તેના માટે ખરીદદાર જવાબદાર ગણાય છે. “ટ્રેડિંગના નિયમો સ્પષ્ટપણે કહે છે કે, DoT પૈસા પાછા લેવા માટે બંને ઓપરેટર્સને અથવા કોઈ એકને આદેશ આપી શકે છે. જિયોએ પત્રમાં જે શરતો સાથે સોદો મંજૂર કરવાની માંગણી કરી છે તેના માટે અમે ધારાધોરણોની વિરુદ્ધમાં જઈને સોદો સ્વીકારી શકીએ નહીં.” એમ DoTના સિનિયર અધિકારીએ જણાવ્યું હતું.
“હવે નિર્ણય તેમણે લેવાનો છે અને આગળ શું કરવું તે નક્કી કરીને અમને જવાબ આપવાનો છે. ત્યાં સુધી તો આ સોદો અટકેલો રહેશે.” એમ અધિકારીએ ઉમેર્યું હતું.
સ્પેક્ટ્રમ ટ્રેડિંગ સોદો થઈ જાય તો, આરકોમ દ્વારા સ્વિડનની ટેલિકોમ ઇક્વિપમેન્ટ કંપની એરિક્સનને ₹550 કરોડનું પેમેન્ટ કરવાનું નીકળે છે તે પણ થઈ જાય. આના માટે સુપ્રીમ કોર્ટે 15 ડિસેમ્બરની ડેડલાઇન નક્કી કરી હતી અને આરકોમ તેને પણ ચૂકી ગઈ છે.
હવે કાં તો આરકોમને ફરી નાદારીની કોર્ટમાં ઢસડી જવામાં આવશે અથવા તો આરકોમના ચેરમેન અનિલ અંબાણી સામે કોર્ટનો અનાદર કરવાની પિટિશન દાખલ થઈ શકે છે કારણ કે, એરિક્સનને સમયસર પેમેન્ટ કરવા માટે તેમણે જ ગેરન્ટી લીધી હતી.
આરકોમ દ્વારા સ્પેક્ટ્રમ વેચવાનો સોદો ઘણા સમયથી વિલંબમાં પડ્યો છે અને જિયોએ લખેલા પત્રને કારણે જે અડચણ ઊભી થઈ છે તેનો જલદી નીવેડો આવે તેવું પણ લાગતું નથી, આથી જ DoT દ્વારા સોમવારે મંજૂરી મળવાની શક્યતા હતી પરંતુ તેણે આ પત્ર અંગે વિચારણા કર્યા બાદ નિર્ણય લીધો હતો.
ઉલ્લેખનીય છે કે, સ્પેક્ટ્રમ યુજર ચાર્જ (SUC)ના ₹2,947 કરોડના ક્લેમને કવર કરવા માટે આરકોમની પેટાકંપની તરફથી જમીન અને બેન્ક ગેરન્ટી સ્વીકારવા કરતાં ₹1,400 કરોડની કોર્પોરેટ ગેરન્ટી સ્વીકારવા માટે સુપ્રીમ કોર્ટે DoTને આદેશ આપ્યો હતો. DoT એવો મત ધરાવતું હતું કે, જો કોર્પોરેટ ગેરન્ટી અથવા જમીન અંગે વિવાદ થાય તો જિયો ખરીદદાર હોવાથી તેણે પેમેન્ટની જવાબદારી સ્વીકારવી પડશે. પરંતુ જિયો આ જવાબદારી લેવા તૈયાર નથી.
“આરકોમની ભૂતકાળની કોઈ પણ જવાબદારી જિયોના માથે નાખવામાં ન આવે તે વાતને DoT સ્વીકારે તો જ જિયો આ સોદો કરવા માટે સહમત થશે.” એમ આ બાબતથી પરિચિત એક વ્યક્તિએ જણાવ્યું હતું.
from Page Array – I Am Gujarat https://ift.tt/2EDvDMO
No comments:
Post a Comment