IndVsAus ત્રીજી ટેસ્ટ : 7 વર્ષનો ટેણિયો બન્યો ઑસ્ટ્રેલિયાનો કેપ્ટન, કોહલીએ આપી સ્પેશિયલ ગિફ્ટ

હૃદયની બીમારીથી પીડાતા બાળકનું સપનું પૂરું થયું

ભારત અને ઑસ્ટ્રેલિયા વચ્ચે 26 ડિસેમ્બરે મેલબોર્નમાં ત્રીજી ટેસ્ટની શરૂઆત થઈ. ‘બૉક્સિંગ ડે ટેસ્ટ’માં સાત વર્ષના આર્ચી શિલરને ઑસ્ટ્રેલિયાનો સહાયક કેપ્ટન બનાવવામાં આવ્યો. લેગ સ્પિનર આર્ચીનું ગ્રીન કેપ પહેરાવી સ્વાગત કરવામાં આવ્યું, જે ખૂબ જ ભાવુક ક્ષણ હતી. આર્ચી હૃદય સંબંધિત બીમારી સામે ઝઝૂમી રહ્યો છે. તેનું સપનું હતું કે, તે ઑસ્ટ્રેલિયન ટીમનો કેપ્ટન બને, જેને બુધવારે ક્રિકેટ ઑસ્ટ્રેલિયા દ્વારા પૂરું કરવામાં આવ્યું. આ દરમિયાન ભારતીય કેપ્ટન વિરાટ કોહલી દ્વારા તેને સ્પેશિયલ ગિફ્ટ આપવામાં આવી. કોહલીએ ઑસ્ટ્રેલિયાની ટીમ શીટ પર સિગ્નેચર કરી આર્ચીને તે ભેટમાં આપી.

પ્રથમ દિવસે ભારત સંગીન સ્થિતિમાં

જણાવી દઈએ કે, ભારતે મેલબૉર્ન ક્રિકેટ ગ્રાઉન્ડ (MCG)માં ઑસ્ટ્રેલિયા વિરુદ્ધ રમાઈ રહેલી ત્રીજી ટેસ્ટના પ્રથમ દિવસના અંત સુધીમાં 2 વિકેટ ગુમાવી 215 રન બનાવી લીધા છે. રમત પૂરી થઈ ત્યારે ચેતેશ્વર પૂજારા 68 અને વિરાટ કોહલી 47 રને રમતમાં હતા. ભારતીય કેપ્ટન કોહલીએ ટૉસ જીતીને પહેલા બેટિંગ કરવાનો નિર્ણય લીધો, નવી ઓપનિંગ જોડી મયંક અગ્રવાલ (76) અને હનુમા વિહારી (8)એ પ્રથમ વિકેટ માટે 40 રન જોડ્યા. બાદમાં વિહારી પેટ કમિન્સની બોલિંગમાં આઉટ થયો.

It was the most beautiful gesture by @CricketAus and @MakeAWishAust, as 7 year old Archie lived out his dream of captaining Australia in a Boxing Day Test #AUSvIND #FoxCricket pic.twitter.com/VgnKFR4b2A

— Fox Cricket (@FoxCricket) December 26, 2018

ડેબ્યૂ ટેસ્ટમાં છવાયો મયંક

પોતાની પ્રથમ મેચ રમી રહેલા મયંકે અડધી સદી ફટકારી બધાને પ્રભાવિત કર્યા. તે બીજી વિકેટના સ્વરૂપે આઉટ થયો. તે પણ કમિન્સની બોલિંગમાં જ આઉટ થયો. 161 બોલની પોતાની ઈનિંગમાં મયંકે 8 ચોગ્ગા અને 1 છગ્ગો ફટકાર્યા. તેણે પૂજારા સાથે બીજી વિકેટ માટે 83 રનની ભાગીદારી કરી.

પૂજારા-કોહલી ક્રિઝ પર

બાદમાં પૂજારા-કોહલીની જોડીએ દિવસના અંત સુધી અન્ય કોઈ વિકેટ પડવા ન દીધી. બંને વચ્ચે ત્રીજી વિકેટ માટે 92 રનની ભાગીદારી થઈ ચૂકી છે. પૂજારા અત્યાર સુધી 200 બોલ રમી ચૂક્યો છે જ્યારે કોહલીએ 107 બોલનો સામનો કર્યો છે.