અમદાવાદ ફ્લાવર શો 2019 થયો શરૂ, જોવા મળશે ‘બુલેટ ટ્રેન’ અને ઘણું બધું

ફ્લાવર શો 2019

અમદાવાદઃ દર વર્ષની જેમ આ વર્ષે પણ અમદાવાદ મ્યુનિસિપલ કોર્પોરેશન દ્વારા ફ્લાવર શો 2019નું આયોજન કરવામાં આવ્યું છે. બુધવારે મુખ્યમંત્રી વિજય રૂપાણીના હસ્તે ફ્લાવર શોનો શુભારંભ કરવામાં આવ્યો. 16 થી 22 જાન્યુઆરી સુધી ફ્લાવર ગાર્ડન, ટાગોર હોલની પાછળ આ ફ્લાવર શોની મુલાકાત લઈ શકો છો.

અમારા ન્યૂઝ Whatsapp પર મેળવવા અહીં ક્લિક કરો

ફ્લાવર શો માટેનો સમય

-16 જાન્યુઆરીએ બપોરે 2.00થી રાત્રે 9.00 વાગ્યા સુધી
-17 જાન્યુઆરીએ પીએમ મોદી કાર્યક્રમ માટે રિવરફ્રન્ટ પર આવવાના હોવાથી સવારે 10.00થી બપોરે 12.00 વાગ્યા સુધી
-18થી 22 જાન્યુઆરી 2019 સુધી સવારે 10.00થી રાત્રે 9.00 સુધી મુલાકાતીઓ આ ફ્લાવર શોની મુલાકત લઈ શકશે.

ચૂકવવા પડશે 10 રૂપિયા

અમદાવાદ મ્યુનિસિપલ કોર્પોરેશન દ્વારા છેલ્લા સાત વર્ષથી આ ફ્લાવર શોનું આયોજન કરવામાં આવે છે. આ આઠમું વર્ષ છે. જોકે આ વર્ષે પહેલી વખત મુલાકાતીઓ પાસેથી રૂપિયા 10 એન્ટ્રી ફી તરીકે લેવામાં આવશે. AMCના અધિકારીઓનું કહેવું છે કે 15 લાખથી વધુ લોકો ફ્લાવર શોની મુલાકાત લેશે.

જોવા મળશે અલગ અલગ સ્કલપચર

ફ્લાવર શોમાં અલગ-અલગ પ્રકારના ફ્લાવર્સ જોવા મળશે. ઓર્કીડ, ઈંગ્લીશ ગુલાબ, કાર્નેશન તેમજ અન્ય ફુલોમાંથી બનાવેલ જીરાફ, બટરફ્લાય, ક્લસ્ટર, હરણ, ફ્લેમિંગો, મોર, વાઈબ્રન્ટ ગુજરાત ગ્લોબ, સી-પ્લેન, બુલેટ ટ્રેન, ગાંધીજી, ચરખો, ચશ્મા વગેરે જેવી કુલ ૫૦થી વધુ લાઈવ સ્કલપચર જોવા મળશે.