ઈરફાનની આ ટેવથી પરેશાન હતો પરિવાર, પિતા કહેતા- ‘પઠાણના ઘરે બ્રાહ્મણ જન્મ્યો છે’

હેપ્પી બર્થ ડે ઈરફાન ખાન

બોલિવુડથી લઈને હોલિવુડ સુધી અભિનયની છાપ છોડનાર એક્ટર ઈરફાન ખાને દરેક વર્ગના દર્શકને પ્રભાવિત કર્યા છે. ઈરફાન ખાનનો આજે એટલે કે 7 જાન્યુઆરીએ 52મો જન્મદિવસ છે. ઈરફાનનો જન્મ 1967માં જયપુરના એક મુસ્લિમ પઠાણ પરિવારમાં થયો હતો. ઈરફાનનું આખું નામ સાહબજાદે ઈરફાન અલી ખાન છે. તેના પિતા ટાયરનો વેપાર કરતા હતા.

અમારા ન્યૂઝ WhatsApp પર મેળવવા અહીં ક્લિક કરો

‘પઠાણના ઘરે બ્રાહ્મણ જન્મ્યો’

જાણીને નવાઈ લાગશે કે પઠાણ પરિવારના હોવા છતાં બાળપણથી જ ઈરફાન શાકાહારી છે. પિતા તેને હંમેશા એમ કહીને ચીડાવતા હતા કે પઠાણ પરિવારમાં બ્રાહ્મણ જન્મ્યો છે. ઈરફાનને શરૂઆતના વર્ષોમાં ખૂબ સંઘર્ષ કર્યો. ઈરફાને NSDમાં એડમિશન મેળવ્યું તે વખતે જ પિતાનું નિધન થયું. ત્યાર બાદ ઈરફાનને ઘરેથી રૂપિયા મળવાના બંધ થઈ ગયા. NSDમાંથી મળતી ફેલોશિપની મદદથી કોર્સ પૂરો કર્યો.

લગ્ન માટે ધર્મ બદલવા તૈયાર હતો એક્ટર

ઈરફાન ખાને પોતાની ક્લાસમેટ સુતપા સિકંદર સાથે 23 ફેબ્રુઆરી 1995ના રોજ લગ્ન કર્યા. ઈરફાનના સંઘર્ષના દિવસોમાં સુતપા હંમેશા સાથે ઊભી રહી. ઈરફાને જ્યારે સુતપા સાથે લગ્ન કર્યા તો તે ધર્મપરિવર્તન માટે પણ તૈયાર હતો. જો કે, સુતપાનો પરિવાર આ લગ્ન માટે તૈયાર થઈ જતાં ધર્મ બદલવાની જરૂર ન પડી.

હોલિવુડમાં પણ વાગે છે ડંકો

ઈરફાને પોતાના કરિયરમાં ઘણી યાદગાર ફિલ્મો કરી છે. બોલિવુડની સાથે ઈરફાન હોલિવુડમાં પણ સક્રિય છે. ઈરફાને હોલિવુડની ‘સ્પાઈડર મેન’, ‘જુરાસિક વર્લ્ડ’ અને ‘ઈન્ફર્નો’ જેવી ફિલ્મોમાં કામ કર્યું છે. હાલમાં જ હોલિવુડ એક્ટર ટોમ હેક્સને ઈરફાનના વખાણ કરતાં કહ્યું હતું કે, ઈરફાનની આંખો પણ અભિનય કરે છે.

પદ્મશ્રીથી સન્માનિત અભિનેતા

ઈરફાને પહેલીવાર 2005માં આવેલી ફિલ્મ ‘રોગ’માં મહત્વપૂર્ણ ભૂમિકા નિભાવી. ફિલ્મ ‘હાસિલ’ માટે ઈરફાનને બેસ્ટ વિલનનો ફિલ્મફેર અવોર્ડ મળ્યો છે. ઈરફાને ‘લંચબોક્સ’, ‘ગુંડે’, ‘હૈદર’, ‘પીકૂ’ અને ‘હિંદી મીડિયમ’ જેવી સફળ ફિલ્મોમાં કામ કર્યું છે. ઈરફાન ખાનની ફિલ્મ ‘પાનસિંહ તોમર’ને નેશનલ અવોર્ડ મળ્યો છે. વર્ષ 2011માં ઈરફાનને ભારત સરકારે પદ્મશ્રીથી સન્માનિત કર્યો.

લંડનમાં સારવાર કરાવી રહ્યો છે ઈરફાન

ગયા વર્ષે ઈરફાનને ન્યૂરો એન્ડોક્રાઈન નામની બીમારી થઈ. જેની સારવાર માટે ઈરફાન ઘણા મહિનાઓથી લંડનમાં છે. બીમારીના કારણે એક વર્ષથી ઈરફાને કોઈ ફિલ્મમાં કામ નથી કર્યું. ‘હિંદી મીડિયમ’ માટે ઈરફાનને બેસ્ટ એક્ટરનો અવોર્ડ મળ્યો છે. ઈરફાનની દમદાર એક્ટિંગ અને શાનદાર ડાયલોગ ડિલીવરીના ફેન્સ દિવાના છે.

from Entertainment News in Gujarati: Latest Entertainment News, Read Breaking Entertainment News – Page Array – I Am Gujarat http://bit.ly/2C2EW52