સ્કીન અને વાળ માટે વરદાન સમાન છે લીંબોળીનું તેલ, ઘરની સફાઈમાં પણ ઉપયોગી

લીંબોળીની તેલના ફાયદા

લીમડો આપણા માટે પ્રકૃતિનું વરદાન છે. લીમડાના વૃક્ષના પાનથી લઈને ડાળી સુધી દરેક વસ્તુ ઉપયોગી છે. લીમડો સ્વાસ્થ્ય અને સૌંદર્ય બંને પૂરા પાડે છે. ઘણી બ્યુટી પ્રોડક્ટમાં લીમડાનો મુખ્ય વસ્તુ તરીકે ઉપયોગ થાય છે. લીમડાના પાન-ડાળીની જેમ તેનું પીળું ફળ લીંબોળી પણ સ્વાસ્થ્ય માટે લાભકારક છે. આયુર્વેદમાં લીંબોળીના તેલને ખૂબ ગુણકારી માનવામાં આવે છે. શરીરના ઘણા રોગો અને પરેશાનીઓમાં લીંબોળીના તેલથી આરામ મળે છે. જાણો લીંબોળીના તેલના વિવિધ ફાયદા.

અમારા ન્યૂઝ WhatsApp પર મેળવવા અહીં ક્લિક કરો

ડ્રાય સ્કીન

પ્રદૂષણના કારણે સ્કીન ડેમેજ થાય છે. લીંબોળીનું તેલ હાઈડ્રોફોબિક પ્રકૃતિ ધરાવે છે એટલે પાણીમાં મિક્સ ન કરી શકાય. લીંબોળીના તેલમાં નારિયેળનું તેલ મિક્સ કરીને સ્કીન પર લગાવો તો ડ્રાય સ્કીનમાં રાહત મળશે.

કંડિનશર

લીંબોળીના તેલમાં ફેટી એસિડ રહેલું છે. તેમાંથી નીકળતું મોઈશ્ચરથી ડ્રાયનેસ દૂર થાય છે. વાળમાં લીંબોળીનું તેલ લગાવીને થોડી વાર મસાજ કરો. ત્યાર બાદ વાળને બરાબર ધોઈ નાખો. વાળ ધોયા પછી એકદમ સ્મૂધ લાગશે. વાળનો ગ્રોથ સારો થાય તેવું ઈચ્છતા હો તો પહેલા સ્કાલ્પનું ધ્યાન રાખો. સ્કાલ્પ હેલ્ધી હશે તો જ ગ્રોથ સારો થશે. સ્કાલ્પને હેલ્ધી રાખવા લીંબોળીનું તેલ શ્રેષ્ઠ છે.

વાળમાંથી જૂ દૂર કરે

વાળમાં જૂ પડવાની સમસ્યા મોટી ઉંમરના લોકો કરતાં બાળકોમાં વધારે જોવા મળે છે. જૂથી છૂટકારો મેળવવા જો તમારે કેમિકલવાળા શેમ્પૂનો ઉપયોગ ન કરવો હોય તો લીંબોળીનું તેલ માથામાં નાખો. આખી રાત તેલ નાખી રાખ્યા પછી સવારે વાળ ધોશો ત્યારે જૂ નીકળવા લાગશે.

બે મોઢાવાળા વાળ

તમારા વાળમાં સ્પ્લીટ એન્ડ્સ (બે મોઢાવાળા વાળ)ની સમસ્યા હોય તો લીંબોળીનું તેલ લગાવો. આ તેલથી મૂળમાંથી તમારા વાળને મજબૂતી મળશે. અઠવવાડિયામાં બે વખત ઓછામાં ઓછા એક કલાક માટે વાળમાં લીંબોળીનું તેલ લગાવો. ધીરે ધીરે વાળમાંથી સ્પ્લીટ એન્ડ્સ ઓછા થઈ જશે.

બ્લેકહેડ્સ

સામાન્ય રીતે બ્લેકહેડ્સ દૂર કરવા માટે પાર્લરમાં જઈને ક્લિન અપ કરાવીએ છીએ. પરંતુ જો તમારે ક્લિન અપનો ખર્ચ ન કરવો હોય તો ઘરે જ બ્લેકહેડ્સથી છૂટકારો મેળવો. લીંબોળીના તેલમાં પાણી ઉમેરીને આ મિશ્રણ ચહેરા પર લગાવો. એક મહિના સુધી આ પ્રયોગ કરો તમને ફરક જણાશે.

ખીલ મટાડે

લીમડામાં એન્ટી બેક્ટિરિયલ ગુણો રહેલા છે. આ જ કારણ છે કે લીંબોળીનું તેલ ડાઘા મટાડવામાં, ઘાના ડાઘ દૂર કરવામાં, ખંજવાળમાં રાહત આપે છે. લીંબોળીના તેલમાં રહેલું ફેટી એસિડ સ્કીન ઈન્ફેક્શન સામે લડવામાં મદદરૂપ છે.

સ્કીન પિગ્મનટેશન

મેલેનિનનું વધુ પડતું ઉત્પાદન થવાથી સ્કીનમાં પિગ્મનેટશન થાય છે. આનાથી છૂટકારો મેળવવા રૂનું પૂમળું લઈ લીંબોળીના તેલમાં ડૂબાડો અને જ્યાં પિગ્મન્ટેશન હોય તે ભાગ પર લગાવો. લીંબોળીના તેલથી મેલેનિનનું ઉત્પાદન ઘટે છે. એક મહિના સુધી આ પ્રયોગ કરવાથી ફરક લાગશે.

નેચરલ સનસ્ક્રીન

તડકામાં વધુ સમય સુધી રહેવાથી સ્કીનને નુકસાન થાય છે અને ચામડીમાં કોલાજનનું ઉત્પાદન ખોરવાય છે. જેના કારણે ચહેરા પર ડાઘ-ધબ્બા અને કરચલીઓ દેખાવા લાગે છે. એટલે બહાર જતી વખતે કેમિકલયુક્ત સનસ્ક્રીનનો ઉપયોગ કરવા કરતાં લીંબોળીનું તેલ લગાવો. સ્કીનની નીચે રહેલા કોલાજન લેયર રિપેર કરવામાં લીંબોળીના તેલમાં રહેલા ફેટી એસિડ અને એન્ટી ઓક્સિડન્ટ્સ મદદ કરશે.

ખોડો દૂર કરે

ડેન્ડ્રફની સમસ્યા હોય તો લીંબોળીનું તેલ એકદમ અસરકારક છે. કેમિકલયુક્ત એન્ટી-ડેન્ડ્રફ શેમ્પૂનો ઉપયોગ કરવાને બદલે સ્કાલ્પમાં લીંબોળીનું તેલ લગાવો. બાદમાં પાણીથી માથું ધોઈ લો. માથું ધોયા બાદ વાળમાં નારિયેળનું તેલ લગાવો.

પેટ સંબંધી બીમારીઓ

પેટ સંબંધી પરેશાનીઓમાં રાહત મેળવવા માટે લીમડાનો ઉપયોગ કરો. પેટના બેક્ટિરિયાનો નાશ કરવા લીમડાના પાનના રસમાં મધ અને મરી પાઉડર ભેળવીને સેવન કરો. આ સિવાય ઝાડા થયા હોય તો લીમડાના પાન સૂકવીને ખાંડ મેળવીને ખાવાથી રાહત થશે.

એક્ઝિમા

એક્ઝિમાના કારણે ત્વચા પર સોજો અને ખંજવાળ આવે છે. ત્યારે લીંબોળીનું તેલ રાહત આપે છે. લીંબોળીનું તેલ ડ્રાય અને ક્ષતિગ્રસ્ત ત્વચાની સારવારમાં મદદરૂપ થાય છે.

મચ્છર ભગાડવા માટે

લીંબોળીના તેલમાં પાણી ઉમેરીને મચ્છર હોય તે જગ્યાએ સ્પ્રે કરો. આ ગંધ મચ્છરોને દૂર ભગાડશે. મચ્છર સિવાય અન્ય જીવાણુઓને ભગાડવા માટે પણ લીંબોળીનું તેલ કારગત છે.

છોડ પર છંટકાવ કરો

લીંબોળીનું તેલ અને વાસણ ધોવા માટે વપરાતા લિક્વિડને સરખી માત્રામાં લઈને સ્પ્રે બોટલમાં ભરો. તમારા ઘરમાં રહેલા છોડના પાંદડા પર છંટકાવ કરવાથી તેમાં થતી જીવાત નાશ પામશે.

સફાઈ માટે

ગાલીચા અને ગાદલાની સફાઈ માટે લીંબોળીનું તેલ ઉપયોગી છે. જાણીને નવાઈ લાગશે પરંતુ આ સાચું છે. ગાલીચા સાફ કરવા માટે ઉપયોગમાં લેવાતા લિક્વિડમાં લીંબોળીનું તેલ ઉમેરો. લીંબોળીના તેલનો ગાદલા પર છંટકાવ કરો એટલે તેમાંથી બધા જ બેક્ટિરિયા, ધૂળનો નાશ થશે.

from Health News in Gujarati: Latest Health News, Read Breaking Health News on Iamgujarat.com – Page Array – I Am Gujarat http://bit.ly/2sJF3y3