અમદાવાદ: શિક્ષિકાએ મારેલી લાકડી વાગી જતા સરકારી સ્કૂલમાં ભણતા એક વિદ્યાર્થીને આંખ ગુમાવવાનો વારો આવ્યો છે. શહેરના નરોડા ફ્રુડ માર્કેટ પાસે આવેલી નરોડાનગર સરકારી શાળામાં આઠમા ધોરણમાં ભણતા કરણ ઠાકોર નામના વિદ્યાર્થીને 18 જાન્યુઆરીના રોજ શિક્ષિકાએ લાકડી મારતા ઈજા થઈ હતી. જોકે, શિક્ષિકાએ પોતે રમતા-રમતા પડી ગયો હોવાનું કહેવા માટે ધમકાવ્યો હતો.
સમગ્ર ઘટનાની વિગત એવી છે કે, નરોડાનગર સરકારી શાળામાં આઠમા ધોરણમાં ભણતા કરણની બાજુમાં બેઠેલો એક વિદ્યાર્થી તોફાન કરી રહયો હતો. જેને કૃપાબેન નામના શિક્ષિકા લાકડી ફટકારવા ગયા હતા, પરંતુ તે વિદ્યાર્થી ખસી જતા લાકડી બાજુમાં બેઠેલા કરણની આંખમાં વાગી ગઈ હતી. કૃપાબેન તેને સારવાર માટે પણ લઈ ગયા હતા, અને તેને કહ્યું હતું કે જો તે ઘરે લાકડી વાગી હોવાનું કહેશે તો તેની સારવાર નહીં કરાવાય.
આંખમાં લાકડી વાગવાના કારણે કરણને આંખમાં ખૂબ જ દુ:ખાવો થઈ રહ્યો હતો. જેના કારણે તેને પરિવાજનો હોસ્પિટલ લઈ ગયા હતા. બાદમાં ફરી 22 જાન્યુઆરીના રોજ કરણને દુ:ખાવો થતાં તેને ફરી હોસ્પિટલ લઈ જવો પડ્યો હતો, અને 23 જાન્યુઆરીએ તેને મોતિયાનું ઓપરેશન કરાવવું પડ્યું હતું.
ડૉક્ટર દ્વારા કરણના પરિવારજનોને જણાવાયું હતું કે, તેની આંખની કીકી જ ફુટી ગઈ હોવાથી તે એક આંખે જોઈ શકતો નથી. આ અંગે વિદ્યાર્થીને પૂછતા તેણે સ્કૂલમાં શિક્ષિકાએ લાકડી મારી હોવાની હકીકત જણાવી હતી. જેના આધારે કરણના પિતાએ શહેર કોટડા પોલીસ સ્ટેશનમાં શિક્ષિકા કૃપાબેન સામે ફરિયાદ નોંધાવી છે.
from Page Array – I Am Gujarat http://bit.ly/2Ww6vNI
No comments:
Post a Comment