લોન પર લીધેલી કારમાં CNG કિટ ફીટ કરવવી હોય તો? આવી હોય છે સમગ્ર પ્રોસેસ

કારમાં CNG કિટ ફીટ કરાવવી હોય તો?

અત્યારના સમયમાં કારમાં પેટ્રોલ અને ડીઝલ ઓપ્શન કરતા પણ વધારે સસ્તું CNG ઓપ્શન પડે છે. હજુ પાછલા વર્ષે જ પેટ્રોલ અને ડીઝલની કિંમત અનુક્રમે 80 રૂપિયા અને 75 રૂપિયાના સ્તરે પહોંચી ગઈ હતી. પેટ્રોલ અને ડીઝલ ફ્યૂલ ઓપ્શનની સરખામણીમાં CNGથી કારની માઈલેજ વધારવા ઉપરાંત તેની કિંમત પણ બંનેના મુકાબલે ઘણી સસ્તી પડે છે. એવામાં રોજ કારનો ઉપયોગ કરતા લોકો માટે CNG કિટ વધારે સસ્તી પડે છે. પરંતુ કંપની ફીટેડ CNG કિટ વધારે પડતી મોંઘી હોવાના કારણે ઘણીવાર ગ્રાહક બહારથી જ તેને નખાવવાનું પસંદ કરે છે. ઘણા લોકો માનતા હશે કે કારમાં કિટ ફીટ કરાવવા માટે ગેરેજ પર જઈને કહી દીધું એટલે તેમનું કામ પતી ગયું. પરંતુ હકીકતમાં આવું નથી હોતું. તમારે કિટ ફીટ કરાવતા સમયે ત્રણ ખાસ પ્રોસેસ કરવી પડે છે. આ પ્રોસેસ વિશે તમને માલુમ ન હોવાના કારણે મુંઝવણમાં મુકાઈ શકો અથવા તો પછી ઘણીવાર ધક્કા ખાવા પડતા હોય છે. આથી અમે તમને આજે તેની સંપૂર્ણ પ્રોસેસ જણાવીશું…

RTOમાં રજીસ્ટ્રેશન

જો તમે કારમાં CNG કિટ નખાવો છો તો તમારે આ માટે RTO ઓફિસમાં તેનું રજીસ્ટ્રેશન કરાવવું પડે છે. મોટાભાગના કિસ્સામાં ગેરેજમાં કિટ નાખનાર આ વ્યક્તિ તમને આ કામ કરાવી આપતો હોય છે, પરંતુ જો તે ન કરાવી આપે તો તમારે જ રજીસ્ટ્રેશન કરાવીને તેનું સર્ટિફિકેટ મેળવવું પડે છે. આ માટે RTOમાં ફોર્મ અને ફી ભરવાની હોય છે, ત્યારબાદ RTO ઈન્સ્પેક્ટર દ્વારા તમારી CNG કિટની ચકાસણી કરવામાં આવે છે.

કારનો ઈન્સ્યોરન્સ

કારમાં થર્ડ પાર્ટી ઈન્સ્યોરન્સ કવર લેવું ફરજિયાત હોય છે. કાર ખરીદતા સમયે તમે ચૂકવેલી કિંમતમાં ડિલર ઈન્સ્યોરન્સના પૈસા પણ ગણી લે છે. પરંતુ કારમાં પાછળથી કિટ નખાવી હોય તો તેને ઈન્સ્યોરન્સ કવરમાં એડ કરવું જરૂરી ગણાય છે. જો આમ નહીં કર્યું હોય તો CNG કિટના કારણે કાર ભવિષ્યમાં ક્યારેય આગ લાગવાની અથવા અન્ય કોઈ નુકસાન માટે કંપની તમારો ઈન્સ્યોરન્સ ક્લેઈમ નહીં કરે. આથી તમે જે પણ કંપનીનું કવર લીધું હોય તેમાં થોડી વધારાનો ચાર્જ ભરીને CNG કિટને પણ એડ કરાવવી જરૂરી છે.

બેંકનો NOC લેટર

જો તમે કારને લોન પર લીધી હોય અને તેના હપ્તા ભરવાના હજુ ચાલું હોય તો તમારે તેમાં CNG કિટ ફીટ કરાવતા પહેલા બેંકમાંથી NOC લેટર લેવો પડે છે. જ્યાં સુધી તમે કારની સંપૂર્ણ લોન ચૂકવી ન દીધી હોય ત્યાં સુધી કાર સંપૂર્ણ રીતે તમારી માલિકીની ગણાતી નથી. આવામાં સંજોગોમાં જો બેંકનો NOC લેટર ન લીધો હોય તો મુશ્કેલીમાં મુકાઈ શકો છો. આ NOC લેટર તમે બેંકમાં જઈને માગી શકો છો. આ માટે બેંક દ્વારા સામાન્ય ચાર્જ લેવામાં આવતો હોય છે.

from Automobile News in Gujarati, ઓટોમોબાઇલ ન્યૂઝ ગુજરાતીમાં, Latest Automobiles News – Page Array – I Am Gujarat http://bit.ly/2Vw8WPN