Q3 પરિણામો અને મેક્રો ડેટા શેરબજારને દોરશે

67405470

રોહિત વૈદ

મુંબઈ: બજાર નિષ્ણાતોના મતે આગામી સપ્તાહે શેરબજારની ચાલનો આધાર ત્રીજા ક્વાર્ટરના નાણાકીય પરિણામો, મેક્રો ડેટા તેમજ વેપાર ક્ષેત્રે રક્ષણવાદને લગતા વૈશ્વિક ઘટનાક્રમ પર નિર્ભર રહે તેવી શક્યતા છે.

તેમણે ઉમેર્યું હતું કે, ક્રૂડના આંતરરાષ્ટ્રીય ભાવ, ડોલર સામે રૂપિયાની ચાલ, વિદેશી ભંડોળનો પ્રવાહ વગેરે જેવા વૈશ્વિક પરિબળો આ સપ્તાહે રોકાણકારોની જોખમ લેવાની ક્ષમતા પર અસર કરે તેવી શક્યતા છે.

આગામી સપ્તાહે કંપની પરિણામોની મોસમ શરૂ થવાની હોવાથી રોકાણકારો સાવચેતીભર્યો અભિગમ અપનાવી રહ્યા છે. આ સપ્તાહે TCS અને ઈન્ફોસિસના પરિણામો સાથે ડિસેમ્બર ક્વાર્ટરના કંપની પરિણામોની મોસમના શ્રીગણેશ થશે. જોકે, શેરબજારમાં હજુ પણ વોલેટિલિટી જળવાઈ રહેવાની સંભાવના છે, તેમ SMC ઈન્વેસ્ટમેન્ટ એન્ડ એડવાઈઝર્સના CMD ડી કે અગરવાલે જણાવ્યું હતું.

સંસદના શિયાળુ સત્રની કામગીરી ઉપરાંત આ સપ્તાહે અમેરિકન ડોલર સામે રૂપિયાની ચાલ અને ક્રૂડ ઓઈલના આંતરરાષ્ટ્રીય ભાવની વધ-ઘટ વગેરે જેવા પરિબળો બજારને ભાવિ દિશા આપે તેવી સંભાવના છે.

આગામી સપ્તાહે કંપનીઓ તેમના ત્રિમાસિક પરિણામોની ઘોષણા કરવાનું શરૂ કરશે. સૌથી પહેલા આગામી તારીખ 10 જાન્યુઆરીના રોજ IT ક્ષેત્રની અગ્રણી કંપની TCS તેના નાણાકીય પરિણામો જાહેર કરશે.

શેરબજારમાં પ્રીમિયમ વેલ્યૂએશન અને સ્થાનિક અર્થતંત્રમાં મંદીના ભણકારા વચ્ચે નજીકના ભવિષ્યમાં વોલેટિલિટી જળવાઈ રહેવાની સંભાવના છે. આગામી બે ક્વાર્ટરમાં કંપનીઓનો વૃદ્ધિ દર મંદ પડવાની આશંકા તેમજ ગ્રામિણ તેમજ શહેરી માર્કેટમાં તરલતાની તંગ સ્થિતિની નકારાત્મક અસર જોવા મળે તેવી શક્યતા છે, તેમ જિઓજિત ફાઈનાન્શિયલ સર્વિસિસના રિસર્ચ હેડ વિનોદ નાયરે જણાવ્યું હતું.

“આગામી સમયમાં લોકસભાની ચૂંટણીઓને લગતી ટૂંકાગાળાની અસરો પણ બજાર પર જોવા મળશે. ચૂંટણીઓ નજીક આવી હોવાથી લોકપ્રિય પગલાંઓનું જોખમ અને વૈશ્વિક અનિશ્ચિતતાઓ નજીકના ગાળામાં બજારને વોલેટાઈલ રાખે તેવી શક્યતા છે. આગામી સપ્તાહે યોજાનારી અમેરિકા-ચીન વચ્ચેની વેપાર મંત્રણાઓ અને Q3 પરિણામોની પણ શેરબજાર પર અસર જોવા મળશે.”

આ સપ્તાહે TCS અને ઈન્ફોસિસ જેવી અગ્રણી IT કંપનીઓ ઉપરાંત બજાજ કોર્પ અને ઈન્ડસઈન્ડ બેન્ક જેવી કંપનીઓ તેના ત્રિમાસિક પરિણામો જાહેર કરશે. રોકાણકારો આ સપ્તાહે 11 જાન્યુઆરીના રોજ જાહેર થનારા IIP અને CPI ડેટા પર પણ વિશેષ નજર રાખે તેવી શક્યતા છે.

કરન્સીના મોરચે પણ સ્થિતિ સારી જણાતી નથી. ક્રૂડના ભાવ અને બોન્ડની ઈલ્ડ વધુ દબાણ સર્જે તેવી શક્યતાને ધ્યાનમાં લેતા રૂપિયો વોલેટાઈલ રહેવાની આશંકા છે, તેમ એડલવાઈસ સિક્યુરિટીઝના હેડ (ફોરેક્સ અને રેટ્સ) સજલ ગુપ્તાએ જણાવ્યું હતું.

ચીનમાં લિક્વિડિટી વધવાને કારણે પણ હવે એશિયાના અન્ય ચલણો પર દબાણ જોવા મળે તેવી શક્યતા છે અને તેમા પણ વૈશ્વિક મંદી બળતામાં ઘી હોમવાનું કામ કરી શકે છે.

4 જાન્યુઆરીના રોજ પૂરા થયેલા સપ્તાહે અમેરિકન ડોલર સામે રૂપિયો 43 પૈસાના સુધારા સાથે 69.72 થયો હતો. અગાઉના સપ્તાહે ડોલર સામે રૂપિયો 70.15ની સપાટીએ હતો.

આ સપ્તાહે વિદેશી રોકાણકારોનું વલણ કેવું રહે છે તેના પર પણ શેરબજારની ચાલનો આધાર રહે તેવી શક્યતા છે. તાજેતરમાં પૂરા થયેલા સપ્તાહે ફોરન ઈન્સ્ટીટ્યૂશનલ ઈન્વેસ્ટર્સ (FIIs) દ્વારા ₹2,000 કરોડના શેર્સનું વેચાણ થયું હતું.

ટેકનિકલી જોતાં હાલમાં નેશનલ સ્ટોક એક્સચેંજના નિફ્ટી-50 ઈન્ડેક્સનો અંડરટોન ફ્લેટ જણાઈ રહ્યો છે. નિફ્ટી હાલમાં સાંકડી વધઘટ વચ્ચે અથડાઈ ગયો છે તે જોતાં આગામી સમયમાં પણ તે રેન્જબાઉન્ડ રહેવાની ધારણા છે, તેમ HDFC સિક્યુરિટીઝના રિટેલ રિસર્ચ હેડ દીપક જસાણીએ જણાવ્યું હતું.

“આગામી સપ્તાહે નિફ્ટી 10,534-10,924 પોઈન્ટ્સની રેન્જમાં ટ્રેડ થવાની ધારણા છે.”

ગયા સપ્તાહે વૈશ્વિક મંદીની ચિંતાઓ અને ઘરઆંગણે ચાવીરૂપ ઉદ્યોગોના નરમ ડેટાના કારણે રોકાણકારોનું સેન્ટિમેન્ટ ખરડાયું હતું અને ભારતીય શેરબજારમાં ઘટાડો જોવા મળ્યો હતો. વિતેલા સપ્તાહે BSE બેન્ચમાર્ક સેન્સેક્સ 381.62 પોઈન્ટ્સ અથવા 1.05 ટકા ઘટી 35,695.10 પોઈન્ટ્સની સપાટીએ બંધ રહ્યો હતો.

નેસનલ સ્ટોક એક્સચેંજનો નિફ્ટી-50 ઈન્ડેક્સ પણ 132.55 પોઈન્ટ્સ અથવા 1.22 ટકા ગગડીને 10,727.35 પોઈન્ટ્સની સપાટીએ બંધ રહ્યો હતો.

from Page Array – I Am Gujarat http://bit.ly/2C8lSSO