ગોવાની સુંદરતા બીચ સુધી જ નથી, આ જગ્યાઓ પણ છે જોવાલાયક

અનેકવાર ગોવા જવાવાળાઓને પણ આ નહીં ખબર હોય

ગોવા એટલે મોજમસ્તી અને કુદરતના ખોળે મન મુકીને આનંદ માણવાનું સ્થળ. ગોવા જવા માટે કોઈ બહાનું શોધવાની જરુર નથી. એકલા ગયા હોવ કે ગ્રુપમાં ગોવામાં મોજમસ્તીના ઘણા ઓપ્શન છે. આમ તો ગોવા જાવ એટલે ફરવા માટે તમે સૌથી પહેલા જુદા જુદા બીચનું લિસ્ટ હાથમાં રાખો છો. પરંતુ જો તમારે કંઈક હટકે કરવું હોય તો એવા કેટલાક સ્થળો છે જે આજે પણ મોટાભાગના પ્રવાસીઓની નજરોથી દૂર પોતાનું કુદરતી સૌંદર્ય અકબંધ રાખીને બેઠા છે.

હવે એક મેસેજ મોકલી Whatsapp પર મેળવો ન્યૂઝ, શરુ કરવા માટે અહીં ક્લિક કરો

નેત્રાવલી બબલિંગ લેક

ગોવામાં જઈને જો કંઈક અલગ અને હટકે અનુભવ કરવો હોય તો નેત્રાવલી બબલિંગ લેક પરફેક્ટ ઓપ્શન છે. સાઉથ ગોવામાં આવેલું આ બબલિંગ લેક તેના નામ પ્રમાણે જ તળાવમાં ઊઠતા બબલ્સને કારણે પ્રસિદ્ધ છે. કુદરતી ગૅસને કારણે સતત આ તળાવમાં બબલ્સ આવતા હોય છે. શાંત વાતાવરણમાં તળાવમાં ઊભરાતા બબલ્સ જોવાનો અનુભવ એકદમ અલગ જ છે. ઉપરાંત ઠંડા અને ચોખ્ખા પાણીમાં પગ ડૂબાડીને ફ્રી ફિશ સ્પાનો આનંદ પણ પર્યટકો ઉઠાવે છે.

સલીમ અલી બર્ડ સેન્ચ્યુરી

મોટાભાગના લોકોની ગોવા ટ્રિપ બીચ સુધી જ સિમિત હોય છે પરંતુ જો તમે ગોવાને ખૂબ સારી રીતે એક્સપ્લોર કરવા માગો છો તો સલીમ અલી બર્ડ સેન્ચ્યુરી જરુર જવું જોઈએ. મેંગ્રોવના જંગલોથી ઘેરાયેલ આ સેન્ચ્યુરીમાં તમે એક સાથે અનેક પ્રકારના પક્ષીઓને જોઈ શકો છો. જેમાં બ્લેક બિટરન, રેડ નોટ, પાઇડ એવોકેટ તેમજ ઘડિયાળ પણ ખૂબ સારી એવી સંખ્યામાં અહીં જોવા મળે છે. આખી સેન્ચ્યુરી ફરવા માટે ફેરી રાઈડ લેવી એક ઉત્તમ ઓપ્શન છે.

માયમ લેક

જો ગોવાના બીચથી તમારું દીલ ભરાઈ ગયું હોય તો અહીં આવેલ માયમ લેક જોવા આવો. નોર્થ ગોવામાં સ્થિત માયમ લેકની સુંદરતાને જોવામાં સમય ક્યાં ચાલ્યો જશે તેની ખબર જ નહીં પડે. પ્રકૃતિના સૌંદર્યને તમે અહીં એકદમ નજીકથી પી શકશો. આ લેક પર બોટ રાઇડ માટે પણ સુવિધા છે.

બમનબુડો વોટરફોલ

પણજીથી લગભગ 60 કિમી દૂર સ્થિત કોટીગાઓ વાઇલ્ડલાઇફ સેન્ચ્યુરી જ્યાં તમે બાયસન, પેંગોલિન, કાળો ચિત્તા, જેવા અનેગ જંગલી જાનવરો જોઈ શકશો. આ ઉપરાંત અહીં બીજી જગ્યા છે બમનબુડો વોટરફોલ. એડવેન્ચર ટ્રાવેલના શોખીનો માટે આ જગ્યા સ્વર્ગ સમાન લાગશે.

અર્વલેમ ગુફા

આ ગુફાને પાંડવ ગુફા તરીકે પણ ઓળખવામાં આવે છે. કહેવાય છે કે પાંડવો અજ્ઞાતવાસ દરમિયાન અહીં જંગલોમાં રોકાયા હતા. આ ગુફા 6-7 સદીની હોવાનું અનુમાન છે. જ્યારે કેટલાક મુજબ આ ગુફા બુદ્ધ સંન્યાસીઓ દ્વારા બનાવવામાં આવી છે. ગુફાની નજકી અર્વલેમ ઝરણું છે જેના કારણે જ આ ગુફાને નામ મળ્યું છે. આસપાસનું સૌંદર્ય તમને મંત્રમુગ્ધ કરી દેશે.

બટરફ્લાય કંઝર્વેટરી

ગોવાની એકદમ મોસ્ટ ઍક્સાઈટિંગ અને ઓછી જાણીતી જગ્યાઓમાં આ કંઝર્વેટરીનો સમાવેશ થાય છે. પતંગિયાની લુપ્ત થઈ રહેલી પ્રજાતિઓને બચાવવા માટે આ કંઝર્વેટરીની સ્થાપના કરવામાં આવી હતી. હાલમાં અહીં ૧૧૩ પ્રજાતિઓ જોવા મળે છે. હવે ખાલી કલ્પના કરો કે તમે જંગલમાં ચાલી રહ્યા છો અને તમારી આસપાસ નાના-નાના રંગબેરંગી પતંગિયાઓ ઊડી રહ્યા છે. ફોટોગ્રાફર્સ અને કુદરતને પ્રેમ કરનારાઓ માટે આ એકદમ અલગ અને અનોખો અનુભવ પુરવાર થશે.

from Lifestyle Tips in Gujarati, જીવનશૈલી ટીપ્સ, Daily Lifestyle Tips – Page Array – I Am Gujarat https://ift.tt/2OxuxnU