અમદાવાદના સૌથી ફેમસ રોડ પર જાવ એટલે ભગવાનને પ્રાર્થના કરવી કે એક્સિડેન્ટ ન થાય

અમદાવાદીઓનો આ પ્રિય રોડ બની રહ્યો છે કાળમૂખો

અમદાવાદઃ 21 માર્ચના રોજ શહેરના ફેમસ S.G હાઈવે પર રાતના સવા વાગ્યાના સુમારે ઇસ્કોન ફ્લાયઓવર તરફથી પૂરપાટ ઝડપે આવતી એક કાર અચાનક ડિવાઈડર પર ચડી ગઈ અને સામેથી આવતી SUV કાર સાથે જઈ અથડાઈ. આ ગમખ્વાર અકસ્માતમાં શહેરના યુવા બિલ્ડર વિપુલ પટેલ(37)નું મોત થયું હતું. જ્યારે તેમની સાથે કારમાં બેઠેલા પ્રતિક બ્રહ્મભટ્ટને એક હાથ ગુમાવવો પડ્યો હતો. શહેરના આ રોડ અને તેમાં પણ ખાસ કરીને ઇસ્કોન ચાર રસ્તાથી લઈને પકવાન ચાર રસ્તા સુધીના પટ્ટા પર પ્રતિ સપ્તાહમાં ઓછામાં ઓછા 5 નાના-મોટા અકસ્માત સર્જાતા હોય છે.

હવે એક મેસેજ મોકલી Whatsapp પર મેળવો ન્યૂઝ, શરુ કરવા માટે અહીં ક્લિક કરો

પ્રતિ સપ્તાહ ઓછામાં ઓછા 5 એક્સિડેન્ટ

ઈમર્જન્સી સર્વિસ 108ના ડેટા અનુસાર સપ્ટેમ્બર 2018થી અત્યાર સુધીમાં આ બે ક્રોસ રોડ વચ્ચેના લગભગ દોઢ કિમીના રોડ પર જ 150 જેટલા એક્સિડેન્ટ નોંધાયા છે. જેની એવરેજ પ્રતિ સપ્તાહ 5 એક્સિડેન્ટ નીકળે છે. નિષ્ણાંતો મુજબ આ તો ફક્ત નોંધાયેલા કેસ છે જેમાં પીડિતને સારવારની જરુર પડી હોય સામાન્ય અકસ્માતની ગણતરી જ નથી. ત્યારે સૌથી પહેલા તો સવાલ એ થાય કે શહેરમાં બીજા પણ ઘણા રોડ છે જ્યારં મોટા પ્રમાણમાં ટ્રાફિક રહેતો હોય છે તો ફક્ત આ જ રોડ અને તેમાં પણ એક દોઢ કિમી જેટલો જ વિસ્તાર કેમ હાઈ એક્સિડેન્ટલ ઝોન બની ગયો છે.

SG હાઈવેનો આ દોઢ કિમીનો પટ્ટો એક્સિડેન્ટ માટે કુખ્યાત

રોડ સેફ્ટી નિષ્ણાંતો આ અંગે વાત કરતા કહે છે કે, SG હાઈવેના આ પટ્ટો યુનિક છે. આમ તો SG હાઈવે જ કોઈ સામાન્ય હાઈવે નથી. તે અમદાવાદ શહેરના વિકાસની ધૂરી બની ગયો છે. આ રોડ પરથી શહેરના પરા બની ગયેલા બોપલ અને ગોતા તરફથી શહેર આવતો અને જતો ટ્રાફિક અહીંથી જ પસાર થાય છે. પરંતુ રાજ્યના સૌરાષ્ટ્ર સહિતના અન્ય વિસ્તારમાંથી પાટનગર ગાંધીનગર અને ઉત્તર ગુજરાત તરફ જવા માટે પણ હજુ આ જ રોડનો ઉપયોગ વધારે પ્રમાણમાં થાય છે. જ્યારે આવા વાહનોના ટ્રાફિકને ડાઇવર્ટ કરવા માટે SP રિંગ રોડ બનાવવામાં આવ્યો છે.

નિષ્ણાંતોના મતે આ છે કારણો

નિષ્ણાંતો મુજબ આવા ટ્રાફિકની મિક્સ યુઝની સાથે SG હાઈવેની બંને તરફ વસી ગયેલા અમદાવાદના પગપાળા લોકો, તેમજ તેમના ટૂ વ્હિલર અને ઓટો રિક્ષાનો ટ્રાફિક પણ ભળે છે. તો SG રોડની બંને તરફ આવેલ સર્વિસ રોડ પરની નાસ્તાની લારીઓ અને ફૂડ કાફેમાં આવતા લોકો પણ સર્વિસ રોડની જગ્યાએ મેઈન રોડનો ઉપયોગ કરે છે, જેથી આ રોડ પર ટ્રાફિકની સમસ્યા વધી છે. આ અંગે ટ્રાફિક વિભાગના અધિકારીએ જણાવ્યું કે, ‘મોટાભાગના એક્સિડેન્ટ પણ સાંજે અને મોડી રાત્રે કે પછી વહેલી સવારે નોંધાયા છે. જેથી આ સમય દરમિયાન પેટ્રોલિંગ પણ વધારી દેવામાં આવ્યું છે. તેમજ સર્વિસ રોડ પર હવે ટૂ વે ટ્રિફિકની જગ્યાએ એક જ ડાયરેક્શનમાં ટ્રાફિક રાખવામાં આવી રહ્યો છે જેથી કરીને મેઈન રોડ પર પણ ટ્રાફિક ઓછો થાય.’

એક્સિડેન્ટ ઝોન જાહેર કરી સર્વેલ્સ વધારવા સૂચન

આ સાથે જ શહેરના ટ્રાફિક નિષ્ણાંતોનું માનવું છે કે SG હાઈવે પર વાહનો ઝડપી ચાલી શકે તે માટે ઓછી સંખ્યામાં રાખવામાં આવેલ સ્પીડ બ્રેકર પણ એક્સિડેન્ટ માટે જવાબદાર છે. માટે રોડ પર થોડા થડો અંતરે સ્પીડ બ્રેકર રાખવા જરુરી છે. તેમજ હાઈસ્પીડમાં ચાલતા વાહનોને પકડીને દંડ કરવાની વ્યવસ્થા તેમજ સર્વેલન્સ પણ વધારવું જોઈએ.

from Page Array – I Am Gujarat https://ift.tt/2TGTnTb