વૉર્નર-બેરસ્ટોનું તોફાન, હૈદરાબાદે કોલાકાતાને 9 વિકેટે કચડ્યું

SRHએ પાંચ ઓવર બાકી રહેતા જ જીતી લીધી મેચ

સનરાઈઝર્સ હૈદરાબાદે ઓપનર ડેવિડ વૉર્નર (67) અને જ્હોની બેરસ્ટો(80)ની તોફાની ઈનિંગની મદદથી કોલકાતા નાઈટ રાઈડર્સને 9 વિકેટે આસાનીથી હરાવી દીધું. KKRના 8 વિકેટે 159 રનના જવાબમાં SRHએ 15 ઓવરમાં માત્ર 1 વિકેટ ગુમાવી જીત મેળવી લીધી હતી. મેચમાં દરેક સમયે હૈદરાબાદ મજબૂત દેખાયું હતું. નવમી મેચમાં આ હૈદરાબાદની 5મી જીત છે અને તે હવે પોઈન્ટ્સ ટેબલમાં ચોથા સ્થાને છે.

હૈદરાબાદ સામે પાંગળું દેખાયું કોલકાતા

160 રનના ટાર્ગેટનો પીછો કરવા ઉતરેલા હૈદરાબાદના ઓપનર્સે વિસ્ફોટક શરૂઆત કરી હતી અને 10 ઓવરથી પણ ઓછા સમયમાં 100 રન બનાવી લીધા હતા. ડેવિડ વૉર્નર અને જ્હોની બેરસ્ટો વચ્ચે પ્રથમ વિકેટ માટે 74 બોલમાં 131 રનની ભાગીદારી નોંધાઈ હતી. વૉર્નરે 38 બોલમાં 3 ચોગ્ગા અને 5 છગ્ગાની મદદથી 67 જ્યારે જ્હોની બેરસ્ટોએ 43 બોલમાં 7 ચોગ્ગા અને 4 છગ્ગાની મદદથી અણનમ 80 રન બનાવ્યા હતા. હૈદરાબાદની એકમાત્ર વિકેટના રૂપમાં વૉર્નર આઉટ થયો હતો. કોલકાતાના તમામ બોલરોને SRHના ઓપનર્સે ચારેબાજુ ફટકાર્યા હતા.

ખલીલની શાનદાર બોલિંગ, KKRએ બનાવ્યા 159 રન

અગાઉ યજમાન સનરાઈઝર્સ હૈદરાબાદ ટૉસ જીતી પ્રથમ ફિલ્ડીંગ કરવાનો નિર્ણય લીધો હતો. પ્રથમ ત્રણ ઓવરને બાદ કરતા કેન વિલિયમ્સનનો આ નિર્ણય ટીમને ફળ્યો હતો. કોલકાતા તરફથી ક્રિસ લિને સૌથી વધુ 51 રન બનાવ્યા હતા. SRHના બોલરોએ KKRના બેટ્સમેનો છૂટથી રન લેવાની તક આપી નહોતી અને સાથે-સાથે નિયમિત અંતરે વિકેટો ઝડપી હતી. આના પરિણામે કોલકાતા 20 ઓવરના અંતે 8 વિકેટે 159 રન જ બનાવી શકી. હૈદરાબાદ તરફથી ખલીલ અહેમદે શાનદાર પ્રદર્શન કરતા સૌથી વધુ 3 વિકેટ ઝડપી.

from Cricket News in Gujarati, ક્રિકેટ સમાચાર, Cricket Updates – Page Array – I Am Gujarat http://bit.ly/2XybDjM