મહત્ત્વનો સપોર્ટ તૂટતાં નિફ્ટીમાં વધુ ઘટાડો શક્ય

69006953

વનેશ પંચાલ, ડિરેક્ટર, બિલાઇન બ્રોકિંગ

સોમવારે ભારતીય બજારમાં વેચવાલી આવી હતી અને બેન્ચમાર્ક ઇન્ડેક્સ નિફ્ટી 11,600ના સપોર્ટની નીચે ઊતરી ગયો હતો. મહત્ત્વનો સપોર્ટ તૂટતાં એવું કહી શકાય કે ટૂંકા ગાળામાં માર્કેટમાં વધુ ઘટાડો શક્ય છે અને તે 11,400 સુધી જવાની સંભાવના છે. તૂટતા માર્કેટમાં ટ્રેન્ડ રિવર્સલ જોવા મળી શકે છે. જોકે હાલમાં આ શક્યતા ઓછી છે.

આગામી બે દિવસની ચાલ બજાર માટે મહત્ત્વની બની રહેશે. જો નિફ્ટી 11,600ના સ્તરને પુન: હાંસલ કરી લે અને ટકી જાય તો હજુ પણ બજાર નવી ટોચ તરફ વધતું રહે તેવું જોવા મળી શકે.

સોમવારે ભારત ઉપરાંત ચીનના માર્કેટમાં પણ નોંધપાત્ર ઘટાડો જોવા મળ્યો હતો. શાંઘાઈ કંપોઝિટ ઇન્ડેક્સ 1.7ટકા ઘટ્યો હતો. જોકે ઇન્ડેક્સે છેલ્લા ચાર મહિનામાં નોંધપાત્ર સુધારો દર્શાવ્યો હતો અને તેથી તે ઓવરબોટ હતો.

સ્થાનિક બજારમાં ઘટાડાનું કારણ ઊંચા મથાળે પ્રોફિટ બૂકિંગ જ હતું. સ્થાનિક બજારના ઘટાડા માટે એક ફંડામેન્ટલ કારણ ક્રૂડના ભાવ હતું. બ્રેન્ટ ક્રૂડ ઓઇલ 74 ડોલર પ્રતિ બેરલની તેની છેલ્લા છ મહિનાની ટોચ પર પહોંચી ગયું હતું અને તેનાથી બજારમાં ચિંતા ઊભી કરી હતી. સોમવારે ઘટાડામાં મહત્ત્વનું યોગદાન રિલાયન્સ ઇન્ડસ્ટ્રીઝ અને બેંકિંગ શેર્સનું રહ્યું હતું.

ટેલિકોમ અને આઇટી ક્ષેત્રનો સપોર્ટ હતો. જોકે લાર્જ-કેપ્સમાં ઘટાડા સાથે બ્રોડ માર્કેટમાં પણ વેચવાલી જોવા મળી હતી. બીએસઇ ખાતે માર્કેટ-બ્રેડ્થ ખૂબ ખરાબ હતી.

1,700થી વધુ શેર્સ ઘટીને બંધ આવ્યા હતા, જે સૂચવે છે કે સેન્ટિમેન્ટ પર નેગેટિવ અસર પડી છે. કોર્પોરેટ અર્નિંગ્સ સીઝનની શરૂઆત સારી રહી છે પરંતુ બજાર હાલમાં તેને વધુ મહત્ત્વ આપે તેવું લાગતું નથી, કારણ કે બજાર માટે ચૂંટણી પરિણામો મહત્ત્વનાં છે. મંગળવારે ત્રીજા તબક્કાનું મતદાન પૂર્ણ થશે અને ત્યાર બાદ બીજા ચાર તબક્કા બાકી છે.

આમ પરિણામો માટે હજુ એક મહિનો રાહ જોવાની રહેશે. બજારે એનડીએના વિજયને ગણનામાં લઈ લીધો છે. બજારે જોવાનું એ જ રહે છે કે વિજય સાધારણ છે કે અસાધારણ. વૈશ્વિક બજારોમાં યુરોપ અને યુએસ માર્કેટમાં મજબૂતી ટકેલી છે. આમ સ્થાનિક બજારોને બહારનાં બજારોથી ખતરો નહીંવત્ છે.

ક્રૂડના ભાવ જો વર્તમાન સ્તરેથી નહીં અટકે અને ઉપરની દિશામાં સુધારો ચાલુ રાખશે તો ભારતીય અર્થતંત્ર માટે તે ગંભીર ચિંતાનું કારણ બનશે. ચાલુ કેલેન્ડરમાં ક્રૂડમાં સતત વૃદ્ધિ જોવા મળી છે તેમ છતાં વિદેશી રોકાણકારોના નાણાપ્રવાહથી સ્થાનિક ચલણ ડોલર સામે સ્થિર ટકી રહ્યું છે.

જોકે ક્રૂડના ભાવ 80 ડોલરની ઉપર જશે તો રૂપિયો ફરી તેના અગાઉના તળિયા તરફ ગતિ કરતો જોવા મળી શકે છે. ચૂંટણી અને ક્રૂડના ભાવમાં મજબૂતી જોતાં ટ્રેડર્સ ડિફેન્સિવ સેક્ટરમાં જ પોઝિશન જાળવવી જોઈએ. મારી દૃષ્ટિએ આઇટી અને એફએમસીજીમાં મજબૂતી જોવા મળી શકે છે. જ્યારે બેંકિંગમાં પ્રોફિટ બૂકિંગ આગળ વધી શકે છે. નિફ્ટી 11,600ની નીચે હોય ત્યારે શોર્ટ ટ્રેડ કરવામાં લાભની શક્યતા ઊંચી રહેશે.

<b>ડિસ્ક્લેમર :</b>વિવિધ બ્રોકરેજ , વિશ્લેષકો અને ફંડ મેનેજરો દ્વારા આ પાના પર દર્શાવાયેલા વિચારો તેમના પોતાના છે. વાચકોએ આ ભલામણોનો અમલ કરતાં પહેલાં વ્યાવસાયિક સલાહકારોની સલાહ જરૂરી છે. ઈટી અહીં દર્શાવેલી પસંદગી માટે જવાબદાર નથી. www.economictimes.com પર ઈટીના સિદ્ધાંતોની આચારસંહિતા ચકાસવા વિનંતી છે.

from Page Array – I Am Gujarat http://bit.ly/2Gxd4s9