ભારતમાં આ સ્થળે આવેલી છે વિશ્વની એકમાત્ર તરતી પોસ્ટ ઓફિસ

તરતી પોસ્ટ ઓફિસ

ફ્લોટિંગ (તરતું) લેક, ફ્લોટિંગ મસ્જિદ, ફ્લોટિંગ માર્કેટ અને હવામાં તરતી રેસ્ટોરાં હોઈ શકે તો તરતી પોસ્ટ ઓફિસ કેમ ન હોય. વિશ્વની એકમાત્ર ફ્લોટિંગ પોસ્ટ ઓફિસ ભારતમાં જ આવેલી હોય તો ભારતીય તરીકે આપણને કેટલું ગર્વ થાય. બરફાચ્છાદિત પહાડોની વચ્ચે તળાવમાં તરતી પોસ્ટ ઓફિસ હોય તો જવાનું મન કોને ન થાય! ધરતી પરનું સ્વર્ગ કહેવાતા કાશ્મીરના શ્રીનગરમાં આવેલી છે વિશ્વની એકમાત્ર ફ્લોટિંગ પોસ્ટ ઓફિસ.

હવે એક મેસેજ મોકલી Whatsapp પર મેળવો ન્યૂઝ, શરુ કરવા માટે અહીં ક્લિક કરો

ક્યાં જોવા મળશે આ પોસ્ટ ઓફિસ?

શ્રીનગરમાં આવેલા ખૂબસુરત ડલ લેકમાં તમે ફ્લોટિંગ પોસ્ટ ઓફિસ જોઈ શકો છો. પહેલી નજરે તમને એવું લાગશે કે ડલ લેકમાં જોવા મળતી શિકારા બોટ જેવી જ બોટ છે પરંતુ નજીક જશો ત્યારે ઈન્ડિયન પોસ્ટ ઓફિસનો લાલ અને પીળા રંગનો લોગો જોવા મળશે. સાથે જ એક બોર્ડ લગાવેલું છે જેના પર ‘ફ્લોટિંગ પોસ્ટ ઓફિસ, ડલ લેક’ લખવામાં આવ્યું છે.

શું છે ખાસિયત?

કાશ્મીર આવતા પ્રવાસીઓમાં ફ્લોટિંગ પોસ્ટ ઓફિસે ખાસ આકર્ષણ જમાવ્યું છે. તમને વિશ્વાસ નહીં થાય કે, અહીં આવતાં ઘણાં પ્રવાસીઓ પોતાના સ્નેહીજનોને પોસ્ટકાર્ડ મોકલવા આ પોસ્ટ ઓફિસમાં જાય છે. અહીં મળતા સ્ટેમ્પ પર પણ ડલ લેકની તસવીર છે.

પોસ્ટ ઓફિસ વિશે જાણો

ફ્લોટિંગ પોસ્ટ ઓફિસનું ઉદ્ઘાટન 2011માં જમ્મુ-કાશ્મીરના તત્કાલિન મુખ્યમંત્રી ઓમર અબ્દુલ્લાએ કર્યું હતું. કમ્યુનિકેશન અને આઈટીના તત્કાલીન રાજ્યમંત્રી સચિન પાયલટ પણ એ વખતે હાજર હતા. આ પોસ્ટ ઓફિસમાં માત્ર સ્થાનિકો જ નહીં પ્રવાસીઓ પણ ટપાલ મોકલવા આવે છે. આ પોસ્ટ ઓફિસમાં ઈન્ટરનેટ અને ઈન્ટરનેશનલ કોલ કરવાની સુવિધા પણ છે.

ટપાલ ટિકિટોનું મ્યૂઝિયમ

આ પોસ્ટ ઓફિસ પાસે ટપાલ ટિકિટોનું મ્યૂઝિયમ આવેલું છે, જેમાં અવનવા સ્ટેમ્પ્સ જોવા મળશે. અહીં સંભારણા રાખતી એક દુકાન આવેલી છે જ્યાંથી પોસ્ટકાર્ડ્સ, સ્ટેમ્પ્સ, સ્થાનિક વસ્તુઓ અને ગ્રિટિંગ કાર્ડ ખરીદી શકો છો. તો હવે તમે શ્રીનગર ફરવા જાઓ ત્યારે દુનિયાની એકમાત્ર ફ્લોટિંગ પોસ્ટ ઓફિસમાંથી પોતાના પ્રિયજનોને ટપાલ મોકલવાનું ભૂલતા નહીં.

from Lifestyle Tips in Gujarati, જીવનશૈલી ટીપ્સ, Daily Lifestyle Tips – Page Array – I Am Gujarat http://bit.ly/2K5SPGV