અમદાવાદની હોટેલમાં છ બિલાડી, સાત કૂતરા અને એક બકરો લઈને આવી અમેરિકન મહિલા

મહિલાએ હોટેલ માથે લીધી

અમદાવાદ: મહેમાનને ભલે ભગવાન સમાન કહેવાતા હોય, પરંતુ કેટલાક મહેમાન તમારી રાતોની ઊંઘ ઉડાવી દે તેવા ખતરનાક પણ હોય છે. આવો જ અનુભવ અમદાવાદના શાહ-એ-આલમ વિસ્તારમાં આવેલી એક હોટેલને થયો. હોટેલ પર રાત્રે ત્રણ વાગ્યે એક અમેરિકન મહિલાએ ચેક-ઈન કર્યું ત્યારે હોટેલનો સ્ટાફ ખુશ થઈ ગયો. મહિલાએ કહ્યું કે, તેનો સામાન પાછળ આવી રહ્યો છે, પણ જે સામાન આવ્યો તે જોઈને તો સ્ટાફના મોતિયા જ મરી ગયા.

ત્રણ રિક્ષા ભરીને આવ્યો સામાન

નોરિન ફ્લોવર નામની આ અમેરિકન મહિલાએ શાહ આલમની હોટેલ સિલ્વર સ્પ્રિંગમાં ચેક ઈન કર્યું તેની થોડી વારમાં ત્રણ રિક્ષા ભરીને તેનો સામાન આવ્યો. આ સામાનમાં છ બિલાડી, સાત કૂતરા અને એક બકરો હતો. હોટેલમાં ઉતરેલા ગેસ્ટ સાથે આવેલા આ જાનવરોને જોઈને હોટેલનો સ્ટાફ પણ મૂંઝાઈ ગયો. તેમણે વિદેશી ગેસ્ટને હોટેલમાં જાનવરોને રાખવાની વ્યવસ્થા ન હોવાનું જણાવ્યું.

બબાલ થઈ તો એમ્બસીમાં ફોન કરી દીધો

જોકે, હોટેલ સ્ટાફની વાત સાંભળી અમેરિકન મહિલા ભડકી, અને પોતાની સાથે પોતાના જાનવરોને રાખવાની વાત પર અડી ગઈ. હોટેલના સ્ટાફે પ્રતિકાર કરતા અમેરિકન મહિલાએ સીધો જ પોતાના દેશની એમ્બસીમાં ફોન જોડી દીધો, અને થોડી વારમાં તો પોલીસ હોટેલ પર આવી ગઈ. પોલીસે પણ સમાધાન માટે મહિલાને સમજાવવાનો પ્રયાસ કર્યો, પરંતુ તેનું અંગ્રેજી પોલીસને ન સમજાતા આખરે પીઆઈને બોલાવવા પડ્યા.

મહિલા પાસે પૈસા ખૂટી પડ્યા

હોટેલના સ્ટાફે અમેરિકન મહિલાને હોટેલ છોડી દેવા માટે કહ્યું, પરંતુ પોતે ત્રણ દિવસનું ભાડું એડવાન્સ આપી દીધું હોવાની દલીલ કરી તેણે હોટેલ છોડવાનો પણ સ્પષ્ટ ઈનકાર કરી દીધો. તેણે પોલીસને જણાવ્યું હતું કે, તેની સાથે ઠગાઈ થઈ છે અને તેને મુંબઈ પહોંચાડવાના બદલે કોઈ તેને રાજસ્થાન લઈ ગયું હતું. તેની પાસે પૈસા પણ ખૂટી ગયા હોવાથી તેણે પોલીસ પાસે પૈસા ભેગા કરવા મદદ માગી હતી, પરંતુ પોલીસે તેનો ઈનકાર કરી દીધો હતો.

બીજા ગેસ્ટ હોટેલમાંથી રવાના થઈ ગયા

બીજી તરફ, આ મહિલા સાથે હોટેલમાં આવી પહોંચેલા જાનવરોને લીધે હોટેલમાં ભારે અવ્યવસ્થા સર્જાઈ છે. આ જાનવરોને હોટેલના નીચેના ભાગમાં રાખવામાં આવ્યા છે, અને કેટલાક જાનવરો મહિલા પોતાની સાથે રુમમાં લઈ આવી છે. જાનવરોને કારણે હોટેલમાં રહેલા બે ગેસ્ટ પણ ચેક-આઉટ કરીને રવાના થઈ ગયા હોવાનું હોટેલના સંચાલકોનું કહેવું છે.

આજે ચેક-આઉટ કરશે મહિલા

આઈએમગુજરાત.કોમ દ્વારા આ અંગે હોટેલનો સંપર્ક કરવામા આવ્યો ત્યારે જાણવા મળ્યું હતું કે આ અમેરિકન મહિલા આજે ચેક-આઉટ કરી રહી છે. સ્ટાફે એમ પણ કહ્યું હતું કે, આ મહિલા ચાર દિવસથી હોટેલમાં રોકાયેલી હતી. જો કોઈ તેનો ફોટો પાડવા જાય તો પણ તે ઝઘડો કરતી હતી.

from Page Array – I Am Gujarat http://bit.ly/2GivnlS