મુસાફરીને યાદગાર બનાવી હોય તો ભારતના આ સ્થળોએ ટ્રેનમાં જ જજો

ટ્રેનની મુસાફરી પ્રવાસ બનાવશે યાદગાર

આજકાલ ક્યાંય ફરવા જવું હોય તો લોકો સામાન્ય રીતે ટ્રેનના બદલે પ્લેનની મુસાફરી વધુ પસંદ કરે છે. જેથી જે-તે સ્થળે ઓછા કલાકોમાં પહોંચી જવાય અને ફરવાનો આનંદ વધુ માણી શકાય. ફ્લાઈટની મુસાફરીમાં ટ્રેન જેવી મજા તો ન જ આવે એ વાત તો તમે પણ માનશો! ટ્રેનમાં ફેમિલી અને સાથી પેસેન્જર્સ સાથે દુનિયાભરની ચર્ચા, ઘરેથી લાવેલા નાસ્તાનું આદાનપ્રદાન, દરેક સ્ટેશને ત્યાંની પ્રખ્યાત વાનગી વેચવા આવતાં ફેરિયા, ચા અને સૌથી અગત્યનું બારીની બહારથી દેખાતા વિવિધ દ્રશ્યો. ફ્લાઈટની મુસાફરીમાં આ મજા ક્યાં મળે. અહીં દેશના એવા સ્થળો વિશે જણાવીશું જ્યાં ટ્રેનની જર્ની આંખોને ઠારશે. ક્યાંક ટ્રેન પાણીની વચ્ચેથી પસાર થશે, ક્યાંક બરફાચ્છાદિત પહાડો તો ક્યાંક રણ જોવા મળશે. બીજા સ્થળોએ ભલે પ્લેનમાં જાઓ પણ આ સ્થળોએ તો ટ્રેનમાં જ જજો.

મુંબઈ-ગોવા

મુંબઈથી ગોવા જાવ તો રોડ માર્ગે જવાના બદલે ટ્રેનમાં જજો. કોંકણ રેલવે નેટવર્કની માંડવી એક્સપ્રેસમાં કરેલી મુંબઈથી ગોવા વચ્ચેની જર્ની યાદગાર બની રહેશે. સહ્યાદ્રિની પર્વતમાળા વચ્ચેથી પસાર થતો રસ્તો ટનલ, બ્રિજ, દરિયા કિનારાઓ, નાની નદીઓ, ઋતુગત વોંકળા અને હરિયાળીથી ભરપૂર છે. આ પ્રવાસ તમારા જીવનનો સૌથી યાદગાર પ્રવાસ બની રહેશે. કુદરતી સૌંદર્ય તમારું મન મોહી લેશે.

માથેરાન- નેરાલ

માથેરાન અને નેરાલ વચ્ચે ચાલતી નેરોગેજ ટ્રેન ઘાટના ખરબચડા રસ્તામાંથી પસાર થાય છે. લોકોમાં આ ટ્રેકે આકર્ષણ જમાવ્યું છે. મહારાષ્ટ્રમાં ચાલતી એકમાત્ર હેરિટેજ ટ્રેન છે. 20 કિલોમીટરની આ જર્ની પ્રવાસ આખો યાદગાર બનાવશે.

કરજત-લોનાવાલા

કરજતથી લોનાવાલા વચ્ચેની જર્નીમાં ઠાકુરવાડી, મંકી હિલ્સ અને ખંડાલાથી પસાર થતી વખતે તમને વેસ્ટર્ન ઘાટની બાયોડાવર્સિટી વિપુલ પ્રમાણમાં જોવા મળશે. ખાસ કરીને ચોમાસાની ઋતુમાં કરજતથી લોનાવાલા વચ્ચેની ટ્રેનની મુસાફરી કરવી જોઈએ. ચોમેર હરિયાળી આંખોને ઠંડક આપશે.

રત્નાગિરી-મેંગ્લોર

કોંકણ રેલવે ટ્રેકમાં સૌથી વધુ મોહક રેલવે ટ્રેક હોય તો તે રત્નાગિરીથી મેંગ્લોર વચ્ચેનો છે. આ મુસાફરી દરમિયાન તમે ગાઢ જંગલો, ટનલ, રિવર બ્રિજ, વળાંકો પરથી પસાર થશો. સાથે જ સિઝનલ વોંકળા જોવા મળશે તે નફામાં.

જમ્મુ-બારમુલ્લા

જમ્મુ, ઉધમપુર, શ્રીનગર અને બારામુલ્લાને જોડતો રેલવે ટ્રેક સુંદર તો છે જ સાથે સૌથી પડકારજનક રેલવે પ્રોજેક્ટ પૈકીનો એક છે. આ ટ્રેક ભૂકંપની વધુ તીવ્રતાવાળા વિસ્તારમાં છે સાથે જ અહીં તાપમાન પણ ખૂબ નીચું હોય છે.

શિમલા-કાલકા

બેજોડ સુંદરતા ધરાવતા શિમલા-કાલકા ટ્રેકને યૂનેસ્કોએ વર્લ્ડ હેરિટેજ સાઈટ તરીકે ધ્યાનમાં લીધો છે અને દરજ્જો મળશે તેવી આશા છે. હરિયાણાના કાલકા સ્ટેશનથી શરૂ થતો આ રેલમાર્ગ શિવાલિક પર્વતમાળાના પહાડોમાં અનેક વળાંકો લઈને શિમલા પહોંચે છે. 96 કિલોમીટરના રસ્તામાં 102 ટનલ, 82 બ્રિજ, વેલી, દેવદાર, પાઈન અને ઓકના વૃક્ષોનો જંગલ વિસ્તાર આવે છે. બ્રિટિશ શાસન દરમિયાન ઉનાળાની રાજધાની કહેવાતા શિમલામાં આ નેરોગેજ ટ્રેનની જર્ની યાદગાર બની રહેશે.

જેસલમેર-જોધપુર

રજવાડા અને મહેલો માટે જાણીતા રાજસ્થાનમાં જેસલમેરથી જોધપુર વચ્ચેની ટ્રેનની મુસાફરી કરજો. જેસલમેરથી જોધપુર વચ્ચે દોડતી દિલ્હી જેસલમેર એક્સપ્રેસને ‘ડેઝર્ટ ક્વિન’ કહેવામાં આવે છે. 6 કલાકની મુસાફરીમાં તમે રેતીના ઢગલા, ચરતા ઊંટ, રણની વસ્તી, રણ પ્રદેશમાં ઉગતા છોડના નજારા જોવા મળશે. આ મુસાફરી દરમિયાન તમને ડેઝર્ટ સફારી કર્યાનો આનંદ મળશે.

બેંગલુરુ- કન્યાકુમારી

બેંગલુરુથી કન્યાકુમારી સુધીની મુસાફરીમાં ચિત્રમય ગામડાં, ઘાસવાળા પ્રદેશો અને પાણીવાળા પ્રદેશો જોવા મળશે. આઈલેન્ડ એક્સપ્રેસ 19.5 કલાકમાં 944 કિલોમીટરની આ સફર પૂરી કરે છે. કુદરતના વિવિધ રંગ દર્શાવતી આ એક્સપ્રેસ ટ્રેનની મુસાફરી તમે જીવનભર યાદ રાખશો.

હસન-મેંગ્લોર

મનોહર વોટરફોલ, ઊંચા-ઊંચા પર્વતો, ચોખાના ખેતરો અને તાડના ઝાડ હસનથી મેંગ્લોર વચ્ચેની મુસાફરીમાં જોવા મળશે. ટ્રાવેલર્સ માટે આ પ્રકારે કુદરતને માણવું યોગ્ય રહેશે.

જલપાઈગુડી-દાર્જિલિંગ

ન્યૂ જલપાઈગુડીથી દાર્જિલિંગ વચ્ચેના 78 કિલોમીટરનો પ્રવાસ ખેડતાં 8 કલાક લાગશે. યુનેસ્કોએ વર્લ્ડ હેરિટેજ સાઈટમાં આ ટ્રેકને સ્થાન આપ્યું છે. પર્વતો અને વેલીથી ઘેરાયેલા આ પ્રદેશની મુસાફરીને ઘૂમ અને બાતાસિયા લૂપ ખાસ બનાવે છે.

અલીપુરદુઆર-જલપાઈગુડી

ગાઢ જંગલ વિસ્તારમાંથી પસાર થતા હો અને અચાનક જ તમારી સામે હાથી અને ગેંડો આવી જાય તો? જંગલ સફારી જેવું લાગે ને. જો તમારે આ અનુભવ માણવો હોય તો પશ્ચિમ બંગાળની ટ્રીપ પ્લાન કરો. અલીપુરદુઆરથી જલપાઈગુડી વચ્ચેની મુસાફરી દરમિયાન રિઝર્વ જંગલોમાંથી પસાર થવાની તક મળશે અને જંગલ સફારીનો આનંદ ઉઠાવી શકશો.

from Lifestyle Tips in Gujarati, જીવનશૈલી ટીપ્સ, Daily Lifestyle Tips – Page Array – I Am Gujarat http://bit.ly/2vbVk00