હાર્દિક હવે હેલિકોપ્ટરમાં ફરીને કરશે કોંગ્રેસનો પ્રચાર, અલ્પેશની વિદાયથી પક્ષમાં કદ વધ્યું?

હાર્દિક ચૂંટણી પ્રચારમાં વ્યસ્ત

અમદાવાદ: હાર્દિક પટેલ ભલે લોકસભા ચૂંટણી ન લડી રહ્યો હોય, પરંતુ કોંગ્રેસ વતી તે જોરદાર પ્રચાર ચોક્કસ કરી રહ્યો છે. માત્ર ગુજરાતમાં જ નહીં, પરંતુ હાર્દિક ગુજરાતની બહાર પણ કોંગ્રેસનો પ્રચાર કરવામાં અને મીડિયાને ઈન્ટર્વ્યુ આપવામાં હાલ વ્યસ્ત છે. યુવા નેતા તરીકેની ઓળખ ધરાવતા હાર્દિક પાસેથી ઓછા સમયમાં વધુમાં વધુ પ્રચાર કરી શકાય તે માટે આયોજન કરી રહી છે.

હવે Whatsapp પર મેળવો તમામ મહત્વના ન્યૂઝ, શરુ કરવા માટે આ લિંક પર ક્લિક કરો

હેલિકોપ્ટરની વ્યવસ્થા કરાઈ

ઈન્ડિયન એક્સપ્રેસના અહેવાલ અનુસાર, હાર્દિક પટેલ વધુમાં વધુ સભાઓ કરી શકે અને ઝડપથી એક જગ્યાએથી બીજી જગ્યાએ જઈ શકે તે માટે કોંગ્રેસે તેના માટે ખાસ હેલિકોપ્ટરની વ્યવસ્થા કરી છે. હાર્દિકના સાથી નિખિલ સવાણીએ અખબારને જણાવ્યું હતું કે, હાર્દિક દૂરના વિસ્તારોમાં સરળતાથી પહોંચી શકે તે માટે હેલિકોપ્ટરની વ્યવસ્થા કરવામાં આવી છે.

હાર્દિક 40 ચૂંટણી સભા સંબોધશે

હાર્દિક ગુજરાતમાં અને ગુજરાતની બહાર ચૂંટણીના અરસામાં 40 જેટલી જાહેર સભાઓ સંબોધશે. ઉલ્લેખનીય છે કે, કોંગ્રેસમાં જેને જોડાયે હજુ મહીનો પણ નથી થયો તેવો હાર્દિક પટેલ ગુજરાતમાંથી કોંગ્રસનો એકમાત્ર સ્ટાર પ્રચારક છે. રાજ્યમાં 23 એપ્રિલે ત્રીજા તબક્કામાં લોકસભા ચૂંટણીનું વોટિંગ થવાનું છે, અને પ્રચારમાં હવે નવ જ દિવસ બાકી રહ્યા છે.

એક કેસમાં સજા થઈ હોવાથી ચૂંટણી ન લડી શક્યો હાર્દિક

અગાઉ હાર્દિક જામનગરથી ચૂંટણી લડે તેવી જોરદાર શક્યતાઓ હતી. હાર્દિકે પોતે પણ ચૂંટણી લડવાની તમામ તૈયારીઓ કરી લીધી હતી. જોકે, પાટીદાર આંદોલનની શરુઆતના સમયમાં વિસનગરના ધારાસભ્યની ઓફિસમાં થયેલી તોડફોડના કેસમાં હાર્દિકને બે વર્ષની સજા પડી છે, અને તેના પર તેને હાઈકોર્ટ અને પછી સુપ્રીમ કોર્ટમાંથી સ્ટે ન મળતાં તે ચૂંટણી લડી શક્યો નથી.

હાર્દિકના બે સાથી લોકસભા ચૂંટણી લડી રહ્યા છે

હાર્દિકના સાથી ગીતા પટેલ અમદાવાદ પૂર્વમાંથી લોકસભા ચૂંટણી લડી રહ્યા છે. આ ઉપરાંત, પાટીદાર આંદોલન સાથે સંકળાયેલા લલિત વસોયા પણ પોરબંદર લોકસભા બેઠક પરથી ચૂંટણી લડી રહ્યા છે. અલ્પેશે હાલમાં જ કોંગ્રેસ છોડી દેતા યુવા નેતા તરીકે દેખીતી રીતે હાર્દિકનું મહત્વ વધી ગયું છે. હાર્દિક ગુજરાતમાંથી કોંગ્રેસનો એકમાત્ર એવો નેતા છે કે જે ગુજરાતની બહાર પણ પ્રચાર કરી રહ્યો છે.

from Page Array – I Am Gujarat http://bit.ly/2Xgb6D7