અમદાવાદ: ખનીજ ચોરીના મામલે નીચલી કોર્ટ દ્વારા દોષિત ઠરેલા કોંગ્રેસના ધારાસભ્ય ભગા બારડને સસ્પેન્ડ કરી તાલાલા બેઠક પર પેટાચૂંટણી યોજવા પર સુપ્રીમ કોર્ટે સ્ટે આપ્યો છે. મહત્વનું છે કે, ભગા બારડને વિધાનસભા સ્પીકરે તાત્કાલિક સસ્પેન્ડ કરી દીધા હતા, અને ચૂંટણી પંચે તાલાલામાં પેટાચૂંટણી જાહેર પણ કરી દીધી હતી. બારડે પેટાચૂંટણીને હાઈકોર્ટમાં પડકારી હતી, પરંતુ કોર્ટે રાહત આપવાની ના પાડતા તેઓ સુપ્રીમ કોર્ટમાં પહોંચ્યા હતા.
હવે Whatsapp પર મેળવો તમામ મહત્વના ન્યૂઝ, શરુ કરવા માટે આ લિંક પર ક્લિક કરો
પેટાચૂંટણી પર સ્ટે આપવાની સાથે સુપ્રીમ કોર્ટે આ મામલે રાજ્ય સરકાર, ભગા બારડને સસ્પેન્ડ કરનારા વિધાનસભાના સ્પીકર અને પેટાચૂંટણી જાહેર કરનારા ચૂંટણી પંચને પણ નોટિસ ફટકારી છે. તાલાલા પેટાચૂંટણી માટે મતદાન લોકસભા ચૂંટણી સાથે જ એટલે કે 23મી એપ્રિલે થવાનું હતું. ભાજપે જસા બારડને પોતાના ઉમેદવાર તરીકે જાહેર પણ કરી દીધા હતા.
ભગા બારડને 1995ના ખનીજ ચોરી કેસમાં સુત્રાપાડાની કોર્ટે બે વર્ષ અને નવ મહિનાની સજા ફટકારી છે. તેમની સામે 25 વર્ષ પહેલા ગૌચર જમીન મામલે 2.83 કરોડની ખનીજ ચોરીનો ગુનો નોંધાયો હતો. ગૌચર જમીનમાંથી ખનીજ ચોરીના કેસમાં કસૂરવાર ઠેરવાયેલા ભગા બારડને કોર્ટે 2500 રુપિયાનો દંડ પણ ફટકાર્યો હતો. નીચલી કોર્ટના ચુકાદા સામે બારડે ઉપલી કોર્ટમાં અપીલ કરી હતી.
ભગા બારડ કોર્ટમાં કસૂરવાર થતાં સ્પીકર રાજેન્દ્ર ત્રિવેદીએ તાત્કાલિક એક્શન લઈ તેમને ધારાસભ્ય પદેથી સસ્પેન્ડ કરી દીધા હતા.
આ દરમિયાન ચૂંટણી પંચે પણ તાલાલા બેઠક પર પેટાચૂંટણીની તારીખ જાહેર કરી દીધી હતી. જેની સામે ભગા બારડે હાઈકોર્ટમાં અરજી કરી જણાવયું હતું કે, તેમને નીચલી કોર્ટે આપેલી સજા પર ઉપલી કોર્ટે સ્ટે આપ્યો હોવા છતાં ચૂંટણીની જાહેરાત કરી દેવામાં આવી છે.
બીજી તરફ, હાઈકોર્ટમાં સરકારે પોતાની તરફથી રજૂઆત કરતા કહ્યું હતું કે, નિયમો અનુસાર ભગા બારડ ધારાસભ્ય પદે ચાલુ ન રહી શકે, અને કાયદા અનુસાર જ પેટાચૂંટણી જાહેર કરવામાં આવી છે.
ચૂંટણી પંચે પણ કોર્ટમાં જણાવ્યું હતું કે, તેણે કોઈ રાજકીય કિન્નાખોરી રાખ્યા વિના બિનપક્ષપાતી રીતે પેટાચૂંટણીની તારીખ જાહેર કરી છે. આ મામલે હાઈકોર્ટમાં ભગા બારડના વકીલે વચગાળાની રાહત માગી હતી, જેના માટે કોર્ટે ઈનકાર કરી દીધો હતો. જોકે, સુપ્રીમ કોર્ટે ભગા બારડને રાહત આપી છે.
from Page Array – I Am Gujarat https://ift.tt/2HQRpOz
No comments:
Post a Comment