ચૂંટણીની સીઝનમાં ‘સ્વિંગ પ્રૂફ’ પોર્ટફોલિયો માટેની વ્યૂહરચના

68703331

રાજેશ માસ્કરન્હસ

મુંબઈ: લોકસભાની ચૂંટણીનું રિઝલ્ટ ધારણા કરતાં વિપરીત આવે તેવા જોખમનો સામનો કરવા એનાલિસ્ટ પ્રોટેક્ટિવ પુટ વ્યૂહરચનાની ભલામણ કરી રહ્યા છે. પ્રોટેક્ટિવ પુટ એક હેજિંગ વ્યૂહરચના છે, જેમાં અંડરલાઇંગ એસેટના માલિક ‘પુટ’ ઓપ્શનની ખરીદી કરે છે, જેથી અંડરલાઇંગ એસેટના ભાવમાં ઘટાડો થાય તો રક્ષણ મળી શકે.

IIFLના એનાલિસ્ટ જયેશ ભાનુશાળીએ જણાવ્યું હતું કે ઓપ્શન ટ્રેડર્સ તેમના પોર્ટફોલિયો માટે બુલિશ હોય પરંતુ નજીકના ગાળાની અનિશ્ચિતતા સામે તેનું રક્ષણ કરવા માગતા હોય ત્યારે પ્રોટેક્ટિવ પુટ વ્યૂહરચનાનો ઉપયોગ થાય છે. તેમણે જણાવ્યું હતું કે, “માની લો કો ₹8.62 લાખનો 10 શેરોનો સમાન વેઇટેજ ધરાવતો પોર્ટફોલિયો હોય અને તેનો બિટા 0.97 ગણો હોય.

આ પોર્ટફોલિયોમાં ઘણા શેર છે, તેથી તમામનું હેજિંગ કરવાનું મુશ્કેલ બને છે. આની જગ્યાએ રોકાણકાર ₹317માં નિફ્ટીમાં 11,600નો પુટ (30 મે 2019) ખરીદે તો ઘટાડાના કિસ્સામાં રક્ષણ મળી શકે છે. આ હેજિંગ માટે 2.7 ટકા ખર્ચ થાય છે, પરંતુ મોટું નુકસાન ટાળવા માટે થોડું નુકસાન સહન કરવાનું યોગ્ય છે.”

મે મહિનામાં ચૂંટણીનાં રિઝલ્ટ નજીકના ગાળામાં બજાર માટે સૌથી મોટું ચાલકબળ હશે. 2004 અને 2009ની ચૂંટણીનાં રિઝલ્ટ વખતે બજારમાં મોટી ઊથલપાથલ થઈ હતી. લોકસભાની ચૂંટણીમાં મોદીની આગેવાની હેઠળના એનડીએનો ફરી વિજય થશે તેવી ધારણાએ નિફ્ટીમાં માર્ચમાં આઠ ટકાનો વધારો થયો છે. એનાલિસ્ટ્સ માને છે કે બજારની અપેક્ષા ઊંચી છે, તેથી જો કોઈ વિપરીત રિઝલ્ટ આવશે તો બજારમાં તીવ્ર ઘટાડો થશે.

એક્સિસ સિક્યોરિટીઝના હેડ (ટેક્‌નિકલ એન્ડ ડેરિવેટિવ્ઝ રિસર્ચ) રાજેશ પલ્વિયાએ જણાવ્યું હતું કે, “પોર્ટફોલિયો હેજિંગ રોકાણને સુરક્ષિત બનાવવાની વ્યૂહરચના છે, તેનાથી બજારમાં તીવ્ર ઘટાડો થાય તેવા કિસ્સામાં નુકસાનને ટાળી શકાય છે અથવા તેમાં ઘટાડો કરી શકાય છે. કેશ માર્કેટમાં શેરોની ખરીદી અને પુટ ઓપ્શન મારફત આવી વ્યૂહરચના ઘડી શકાય છે. જો શેરના ભાવમાં વધારો થાય તો તમને તેમાંથી લાભ મળે. જો શેરના ભાવમાં ઘટાડો થાય તો તમે નિર્ધારિત સ્ટ્રાઇક પ્રાઇઝે શેરનું વેચાણ કરવા પુટ ઓપ્શનનો ઉપયોગ કરી શકો છો.”

ટેક્‌નિકલ એનાલિસ્ટ્સના જણાવ્યા અનુસાર નિફ્ટીમાં આગામી અવરોઝ 11,760-11,800ના ઝોનમાં છે. ઘટાડાના કિસ્સામાં સપોર્ટ 11,550, 11,333 અને 11,118એ છે.

મોતીલાલ ઓસ્વાલ ફાઇનાન્શિયલ સર્વિસિસના હેડ (ડેરિવેટિવ્ઝ રિસર્ચ) ચંદન તાપરિયાએ જણાવ્યું હતું કે રોકાણકારો 11,000 સુધી પોઝિશનનું હેજિંગ કરવા માટે 11,500ના પુટની સીધી ખરીદી અથવા બેર પુટ સ્પ્રેડનો ઉપયોગ કરી શકે છે.

from Page Array – I Am Gujarat https://ift.tt/2CPk02y