અમદાવાદ:ત્રણ પીએસયુ બેંક બેંક ઓફ બરોડા, દેના બેંક અને વિજયા બેંકના મર્જરથી બનેલી સંયુક્ત બેંક દેશમાં ગ્રાહકો અને શાખાઓની રીતે બીજા ક્રમની જાહેર ક્ષેત્રની બેંક બની છે.
મર્જર બાદ જે કુલ ₹12 કરોડ ગ્રાહકોને સેવા પૂરી પાડી રહી છે અને ₹15 લાખ કરોડથી વધુનો બિઝનેસ ધરાવે છે. ગુજરાતમાં પણ આ ત્રણેય બેંકના મર્જર બાદ બેંક ઓફ બરોડા રાજ્યમાં બેંકિંગ કામગીરીનો 22 ટકા જેટલો વિશાળ હિસ્સો ધરાવે છે અને રાજ્યમાં કુલ 3.3 કરોડ ગ્રાહકો સાથે વસતિના લગભગ 45 ટકા જેટલા નાગરિકો તેના ગ્રાહકો બન્યા છે.
સરકારે અગાઉ કરેલી જાહેરાત મુજબ 1 એપ્રિલથી મર્જર અમલી બન્યું હતું. જેની સાથે જ બેંક ઓફ બરોડા ત્રીજા ક્રમ પરથી બીજા ક્રમની પીએસયુ બેંક બની હતી. સોમવારથી દેના બેંક અને વિજયા બેંકની શાખાઓ બેંક ઓફ બરોડાની શાખાઓ તરીકે જ કામગીરી બજાવશે.
અમદાવાદ ખાતે પત્રકારોને મર્જર વિશે વાત કરતાં બેંક ઓફ બરોડાના જનરલ મેનેજર કેવી તુલસીબાગવાલેએ જણાવ્યું હતું કે મર્જર બાદ ત્રણેય બેંકોનો ગ્રાહકોના ખાતા નંબર, ચેક બુક, આઇએફસી કોડ વગેરેમાં તત્કાળ કોઈ ફેરફાર થશે નહીં અને તે અગાઉ મુજબ જ ચાલુ રહેશે. તેમના જણાવ્યા મુજબ મર્જર બાદ ગુજરાતમાં બેંક ઓફ બરોડાનો બજારહિસ્સો 22 ટકા થશે અને તે કુલ 3.3 કરોડ ગ્રાહકો ધરાવતી હશે, જે રાજ્યની 6.7 કરોડની વસતિના 45 ટકા જેટલો થવા જાય છે. મર્જર બાદ રાજ્યમાં બેંકની કુલ 1,714 શાખા અને 2,169 એટીએમ્સ છે.
રાષ્ટ્રીય સ્તરે મર્જર બાદ બેંક ઓફ બરોડાની 9,500 શાખા (કુલ પીએસયુ બેંક્સની શાખામાં 6.5 ટકા), 13,400થી વધુ એટીએમ અને 85,000થી વધુ કર્મચારીઓ ધરાવતી બની છે. બેંકની કુલ ડિપોઝિટ્સ ₹8.75 લાખ કરોડ અને એડ્વાન્સ ₹6.25 લાખ કરોડ સાથે ₹15 લાખ કરોડથી વધુનો વ્યવસાય બન્યો છે.
ગુજરાતમાં 22 ટકા માર્કેટ હિસ્સા ઉપરાંત મર્જર બાદ મહત્ત્વનાં રાજ્યો જેવા કે મહારાષ્ટ્ર, કર્ણાટક, રાજસ્થાન અને ઉત્તરપ્રદેશમાં મર્જ્ડ બેંકનો હિસ્સો 8-10 ટકાના નોંધપાત્ર સ્તર પર છે. ત્રણેય બેંકના મર્જર બાદ બેંક ઓફ બરોડાનો કુલ કૃષિ પોર્ટફોલિયો ₹52,000 કરોડથી વધુ ₹80,000 કરોડ થયો છે. જ્યારે રિટેલ અને એમએસએમઇનો પોર્ટફોલિયો ₹1.29 લાખ કરોડથી વધી ₹2.1 લાખ કરોડ થયો છે. લાર્જ કોર્પોરેટ્સનો પોર્ટફોલિયો ₹1.8 લાખ કરોડથી વધુ ₹2.41 લાખ કરોડ થયો છે.
from Page Array – I Am Gujarat https://ift.tt/2HT5Phi
No comments:
Post a Comment