ઇટી ઇન્ટેલિજન્સ ગ્રૂપ
મુંબઈ:’રિઝલ્ટ સિઝન’ શરૂ થવાની તૈયારીમાં છે ત્યારે જાન્યુઆરી-માર્ચ ક્વાર્ટરમાં નિફ્ટી-50 કંપનીઓ છેલ્લા 9 ત્રિમાસિક ગાળામાં પહેલી વખત આવકમાં 10 ટકાથી ઓછી વૃદ્ધિ દર્શાવે તેવી શક્યતા છે. જોકે, નીચા બેઝ અને અગાઉના વર્ષના સમાન ગાળામાં કેટલીક કંપનીઓના અસાધારણ ખર્ચને કારણે નિફ્ટી કંપનીઓનો ચોખ્ખો નફો બે આંકડામાં વધવાનો અંદાજ છે.
ઇટી ઇન્ટેલિજન્સ ગ્રૂપના અંદાજ મુજબ ચોથા ક્વાર્ટરમાં સમીક્ષા હેઠળની કંપનીઓની આવક અગાઉના વર્ષના સમાન ગાળાની તુલનામાં 7.6 ટકા વધવાનો અંદાજ છે. ત્રીજા ક્વાર્ટર (ઓક્ટોબર-ડિસેમ્બર 2018)માં આ કંપનીઓની આવકમાં 22.1 ટકા તેમજ જાન્યુઆરી-માર્ચ ક્વાર્ટરમાં 15.1 ટકા વધારો નોંધાયો હતો.
આ વખતે ચોથા ક્વાર્ટરમાં નિફ્ટી કંપનીઓનો ચોખ્ખો નફો 32.2 ટકા વધવાની શક્યતા છે, જે જાન્યુઆરી-માર્ચ 2017 ક્વાર્ટર પછી સૌથી તીવ્ર ઉછાળો હશે. અગાઉના ક્વાર્ટરમાં ટાટા મોટર્સની મોટી ખોટને કારણે નિફ્ટી કંપનીઓનો કુલ નફો 24.6 ટકા ઘટ્યો હતો. HDFC સિક્યોરિટીઝના રિટેલ રિસર્ચ હેડ દીપક જસાણીએ જણાવ્યું હતું કે, “ગયા વર્ષે ચોથા ક્વાર્ટરમાં મોટા ભાગની કોમોડિટીના બેઝ ભાવમાં વધારો નોંધાયો હતો. તેને લીધે આવકમાં અગાઉનાં ત્રણ ક્વાર્ટરની તુલનામાં વાર્ષિક ધોરણે ધીમી વૃદ્ધિ નોંધાશે.”
કોલ ઇન્ડિયાની આગેવાનીમાં સમીક્ષા હેઠળની કંપનીઓના કાર્યકારી નફામાં 181 ટકા ઉછાળાનો અંદાજ છે. અગાઉના વર્ષના સમાન ક્વાર્ટરમાં કોલ ઇન્ડિયાના એક્ઝિક્યુટિવ્સના પગારમાં વૃદ્ધિને કારણે કર્મચારીઓને અપાતા લાભનો ખર્ચ વધ્યો હતો. તેને લીધે કાર્યકારી નફામાં ઘટાડો નોંધાયો હતો અને એટલે કંપની માટે બેઝ નીચો રહ્યો હતો.
કાર્યકારી નફાના ઊંચા અંદાજને કારણે જાન્યુઆરી-માર્ચ ક્વાર્ટરમાં નિફ્ટી કંપનીઓનું કાર્યકારી માર્જિન અગાઉના વર્ષના સમાન ગાળાના 7.2 ટકાથી વધીને 18.9 ટકા થશે.
નિફ્ટી કંપનીઓમાં માંગનો માહોલ અત્યારે મંદ જણાય છે, પણ લોકસભાની ચૂંટણીના કારણે આગામી કેટલાક ત્રિમાસિક ગાળામાં માંગ ધીમેધીમે વધવાનો અંદાજ છે.
જસાણીએ જણાવ્યું હતું કે, “તરલતાની ખેંચ હળવી થઈ રહી છે અને એટલે વૃદ્ધિના મોમેન્ટમમાં ધીમો વધારો નોંધાશે. બજાર આગામી સમયમાં ચોમાસાની આગાહી પર ચાંપતી નજર રાખશે. અમેરિકા-ચીન વચ્ચેની વેપાર વાટાઘાટ અને વૈશ્વિક વૃદ્ધિમાં ઘટાડાની આશંકા વિવિધ સેક્ટર્સ અને વૈશ્વિક વેપારમાં સક્રિય કંપનીઓને અસર કરશે.”
from Page Array – I Am Gujarat http://bit.ly/2uQXfXx
No comments:
Post a Comment