150 રુપિયે કિલો મળતી કેસર કેરી હાલ ન ખરીદશો, બસ આટલી રાહ જોઈ લો

કાગડોળે જોવાઈ રહી છે રાહ

સામાન્ય રીતે જ્યારે પણ ઉનાળો ચાલુ થઈ જાય છે ત્યારે લોકોને સૌથી પહેલા ફળોનો રાજા કેરી યાદ આવે છે. હાફુસ, લંગડો, બદામ, રાજા, રત્નાગિરી, તોતાકેરી જેવી અનેક કેરીના સ્વાદ આ સીઝનમાં માણવાં મળે છે. કેરીની બધી જાતમાં લોકપ્રિયતાના શિખરે બીરાજતી ગીરની કેસર કેરીના ચાહકો તો કાગડોળે આ મધમીઠાં ફળની રાહ જોતાં હોય છે. જોકે, આ વખતે કેસર કેરીએ પોતાના ચાહકોને ખૂબ જ નિરાશ કર્યાં છે. જો તમે પણ આ રસાળ કેરીનો સ્વાદ ચાખવાં અધીરા થયાં હોવ તો હજુ થોડી વાર જોવી પડશે.

હવે એક મેસેજ મોકલી Whatsapp પર મેળવો ન્યૂઝ, શરુ કરવા માટે અહીં ક્લિક કરો

સ્વાદ ચાખવા અધીરા થયાં લોકો

આ વખતે કેસર કેરી ફળના રસાળ ચાહકોને નિરાશ કરવાનું મુખ્ય કારણ છે તેના વધુ પડતા ભાવ. કેસર કેરીની ઊંચી કિંમતોના કારણે ગ્રાહકો નિરાશ થયાં છે. કેરીના ભાવ વધુ પડતા હોવાનું કારણ તેની ઓછી નિકાસ છે. કેસર કેરીના એક કિલોનો ભાવ હાલ 150થી લઈ 1200 રુપિયા (10 કિલો) સુધીનો છે.

જોઈએ તેવો નથી મળતો સ્વાદ

આટલું જ નહીં પણ ગ્રાહકોને તકલીફ એ વાતની પણ થઈ રહી છે કે રુપિયા આપવા છતાં પણ હજુ કેસર કેરીમાં જોઈએ એવો સ્વાદ મળતો નથી. ખેડૂતો અને વેપારીઓનું કહેવું છે કે હજુ આ રસાળ ફળના ચાહકોને મધમીઠી અને સસ્તી કેરી માટે પંદરથી વીસ દિવસની રાહ જોવી પડશે.

ઠંડીના કારણે થયું નુકસાન

જ્યાંની કેસર કેરીના લોકો વખાણ કરતાં થાકતા નથી તેવા તાલાળા માર્કેટિંગ યાર્ડના ચેરમેન હરસુખ જરસાણીયાએ જણાવ્યું હતું કે, ‘વધુ પડતી ઠંડીના કારણે કેસર કેરીનું ઉત્પાદન ઓછું થયું છે. ઠંડીના કારણે કેરીના પાકને પણ થોડું નુકસાન પહોંચ્યું છે. આ વખતે 15 માર્ચ સુધી ઠંડી પડી છે જેની અસર કેરીના પાકને થઈ છે.’

હજુ જોવી પડશે થોડી રાહ

આ ઉપરાંત તેમણે જણાવ્યું હતું કે,’હાલ તાલાળા માર્કેટિંગ યાર્ડમાં રોજ દસ હજાર બોક્સ (10 કિલો/બોક્સ)ની આવક થઈ રહી છે. આ જ આંકડો 20 મે પછી આશરે 20,000 બોક્સનો થઈ જશે. મધ્યમવર્ગીય લોકો જે કેરીની આતુરતાથી રાહ જોઈ રહ્યાં છે તેમને હજુ થોડી વધુ રાહ જોવી પડશે. જેથી તેમને સસ્તી કેરી મળે. હાલ સારી ક્વોલિટીની કેરીનો ભાવ 600થી 700 રુપિયા સુધીનો છે જ્યારે લૉ ક્વોલિટી કેરીનો ભાવ 300થી 400 સુધીનો છે. જે અમદાવાદમાં 800થી 1000 રુપિયાની મળે છે.’

શું કહેવું છે વેપારીઓનું?

શહેરના વેપારીઓનું કહેવું છે કે હાલ માર્કેટમાં જે કેસર કેરી મળી રહી છે. તેનો સ્વાદ જોઈએ તેટલો મીઠો નથી. સેટેલાઈટ વિસ્તારમાં કેસર કેરીની દુકાન ધરાવતાં સ્વીટી પટેલનું કહેવું છે કે,’હાલ અમે ઉત્તમ ક્વોલિટીની કેસર કેરી 1,100 (10 KG)ના ભાવે વેચી રહ્યાં છીએ. પરંતુ તે જોઈએ તેટલી મીઠી નથી. હજુ જોઈએ તેવી કેરી માર્કેટમાં જ નથી આવી. અમે આશા રાખીએ છીએ કે જલદી જ ઉત્તમ કેરી માર્કેટમાં આવે.’ જોકે, અન્ય એક વેપારી પ્રશાંત રુપારેલિયાનું કહેવુ છે કે,’રિટેઈલમાં કેરીના બોક્સ 700થી લઈ 1000 રુપિયાના ભાવ સુધી વેચાઈ રહ્યાં છે. શિયાળાના કારણે કેરીની આવકમાં ઘટાડો જોવા મળ્યો છે. જેથી ભાવ ઘટવાની હાલ તો કોઈ શક્યતા દેખાતી નથી.’

from Page Array – I Am Gujarat http://bit.ly/2vScMXK