ચોંકાવનારી ઘટના: વાંકાચૂકા દાંત સીધા કરાવવાની સર્જરીમાં 19 વર્ષની યુવતીનો જીવ ગયો

સર્જરી દરમિયાન શરુ થયું બ્લિડિંગ

પુણે: 19 વર્ષની એક યુવતીને પોતાના વાંકાચૂકા દાંત સરખા કરાવવામાં જીવ ગુમાવવાનો વારો આવ્યો છે. આ યુવતીના દાંત સરખા કરવા ડૉક્ટર સર્જરી કરી રહ્યા હતા તે દરમિયાન તેને અચાનક જ બ્લિડિંગ શરુ થયું હતું. પુણેની સ્ટર્લિંગ મલ્ટિસ્પેશિયાલિટીમાં આ યુવતીને 23 એપ્રિલે એડમિટ કરવામાં આવી હતી, અને બીજા દિવસે તેની સર્જરી કરાઈ હતી.

હવે સીધા Whatsapp પર મેળવો મહત્વના ન્યૂઝ, શરુ કરવા ક્લિક કરો

આઈસીયુમાં દાખલ કરવી પડી

ધનશ્રી જાધવ નામની આ યુવતીને સર્જરી બાદ તુરંત જ આઈસીયુમાં લઈ જવાઈ હતી. તેના સંબંધીઓના જણાવ્યા અનુસાર, ડૉક્ટર કે પછી બીજા કોઈ સ્ટાફે તેની સ્થિતિ વિશે કોઈ માહિતી નહોતી આપી. ધનશ્રી બેભાન હાલતમાં જ હતી, અને તે આઈસીયુમાં ટ્રીટમેન્ટ દરમિયાન પણ ભાનમાં ન આવી, અને આખરે શનિવારે ડૉક્ટરોએ તેને મૃત જાહેર કરી હતી.

શનિવારે ડૉક્ટરોએ મૃત જાહેર કરી દીધી

મૃતક યુવતીના સગાએ આ મામલે હોસ્પિટલ પર બેરદરકારીનો આરોપ મૂકી તેનો મૃતદેહ સ્વીકારવાનો ઈનકાર કરી દીધો હતો. જોકે, પોલીસે દરમિયાનગીરી કરી જવાબદાર વ્યક્તિ સામે પગલાં લેવાની ખાતરી આપતા તેમણે મૃતદેહ સ્વીકાર્યો હતો. ધનશ્રીના કાકાના જણાવ્યા અનુસાર, તેમની ભત્રીજીને દાંત સિવાય બીજી કોઈ તકલીફ નહોતી. તે એક ફેમિલી ફંક્શન પહેલા પોતાના દાંત બરાબર કરાવવા માગતી હતી, અને તેના માટે એક નાનકડું ઓપરેશન કરવાનું હતું. જોકે, આ સર્જરી 12 કલાક જેટલો સમય ચાલતા અમે પણ ચોંકી ગયા હતા.

મુખ્ય નસ કપાતા થઈ હતી લકવાગ્રસ્ત

આખરે ધનશ્રીના સગા-સંબંધીઓએ બીજા ડૉક્ટર પાસે તપાસ તેમજ સિટી સ્કેન અને અન્ય ટેસ્ટ કરાવતા સર્જરી દરમિયાન તેની એક મુખ્ય નસ કપાઈ ગઈ હોવાનું બહાર આવ્યું હતું. આ નસ કપાઈ જતાં ધનશ્રીનું અડધું શરીર લકવાગ્રસ્ત થઈ ગયું હતું. ચોંકાવનારી વાત એ છે કે, સર્જરી કરનારા ડૉ. પાટિલ કેસ બીજા ડૉક્ટરને સોંપી ઘરે જતા રહ્યા હતા, અને તેમણે ધનશ્રીના રિલેટિવ્સના ફોન અટેન્ડ કરવાની તસ્દી પણ નહોતી લીધી.

ડૉક્ટરે આપી આવી પ્રતિક્રિયા

મૃતકના સંબંધીઓના સવાલના જવાબ આપવાને બદલે હોસ્પિટલને આઈસીયુના ચાર્જ વસૂલવામાં જ વધુ રસ હતો. આ સમગ્ર મામલે ડૉ. પાટિલે જણાવ્યું હતું કે, યુવતીને જડબાંની દુર્લભ બીમારી હતી, જે તેના ભાઈને પણ છે. તેની સર્જરી નવ કલાક જેટલી લાંબી ચાલશે તેવું પહેલાથી જ તેના પરિવારને જણાવાયું હતું. યુવતી સર્જરી બાદ ભાનમાં હતી, અને મારા સવાલનો જવાબ પણ આપી રહી હતી, પરંતુ પછી જે થયું તે ખરેખર કેવા સંજોગોમાં થયું તે ડાયગ્નોસ કરવું અઘરું છે. યુવતીના પરિવારજનોને પણ આ અંગેની તમામ માહિતી સર્જરી પહેલા આપવામાં આવી હતી.

from Health News in Gujarati: Latest Health News, Read Breaking Health News on Iamgujarat.com – Page Array – I Am Gujarat http://bit.ly/2PMHM4B