મોદીની આ એક વાતનું માન રાખવા ખોબલે ખોબલે મત આપી ગુજરાતે બનાવ્યા આ રેકોર્ડ

મોદીએ પ્રચારમાં કહ્યું હતું 26 બેઠકો આપજો

હિમાંશુ કૌશિક, અમદાવાદઃ લોકસભા ચૂંટણી પ્રચાર દરમિયાન વડાપ્રધાન મોદીએ ગુજરાતમાં લોકોને અપીલ કરી હતી કે ભાજપને ગુજરાતની તમામે તમામ બેઠકો જીતમાં આપજો અને વડાપ્રધાનના એ આહ્વાહનને ગુજરાતની જનતાએ સાંભળ્યું એટલું જ નહીં પરંતુ જબ્બર પ્રતિસાદ આપ્યો. રાજ્યની તમામ બેઠકો તો ભાજપને આપી જ પરંતુ એટલા જબરજસ્ત માર્જીન સાથે ગુજરાતીઓએ ભાજપ અને મોદીને જીત અપાવી કે અનેક નવા રેકોર્ડ બની ગયા. 2019 લોકસભા ચૂંટણીના પરિણામ પર નજર નાખીએ તો જાણ થાય કે આખા દેશમાં ગુજરાત જ એકમાત્ર એવું રાજ્ય છે જ્યાં તમામ જીતનાર ઉમેદવાર 1 લાખ કરતા વધુ માર્જિન સાથે જીત્યા છે. તેમજ ગુજરાત એવું પણ રાજ્ય બન્યું છે જ્યાં સૌથી વધુ ઉમેદવારો 5 લાખ કરતા વધારે માર્જિનથી જીત્યા હોય.

હવે એક મેસેજ મોકલી Whatsapp પર મેળવો ન્યૂઝ, શરુ કરવા માટે અહીં ક્લિક કરો

ગુજરાતીઓએ ખોબલે ખોબલે મત આપ્યા

આટલું પૂરતું ન હોય તેમ ભાજપના ઉમેદવાર સી.આર. પાટીલ દેશના ઇતિહાસના સૌથી વધુ માર્જિનથી જીતના રેકોર્ડને તોડવાની લગોલગ પહોંચી ગયા હતા. ભારતની ચૂંટણીની ઇતિહાસમાં વર્ષ 2014માં મહારાષ્ટ્રના ભિંડ ખાતે પેટા ચૂંટણીમાં પ્રિતમ મુંડે અત્યાર સુધીના સૌથી વધુ માર્જિન 6,96,321 મતોથી જીત્યા હતા. જ્યારે આ વખતે પાટિલ 6 લાખ 90 હજાર જેટલી લીડ સુધી તો પહોંચી ગયા હતા.

આ મંત્રે અપાવી ભવ્ય જીત

પાટિલે આટલા ભવ્ય વિજય પર કહ્યું કે, ‘વડાપ્રધાન મોદી દ્વારા આપવામાં આવેલ સૂત્ર “પહેલીવાર મતદાન કરનારા લોકો સુધી પહોંચો’ જેને અમે શબ્દશઃ નિભાવ્યું હતું. આ તેનું જ પરિણામ છે. પાટીલે કહ્યું કે, ‘આટલા બહોળા પ્રતિસાદ અને મોટા માર્જિનથી જીતની પાછળ પહેલીવાર મતદાન કરતા મતદારોનો ખૂબ મોટો રિસ્પોન્સ છે. તેમણે ભાજપની નિર્ણાયક અને મજબૂત નેતાગીરીને મત આપીને દેશની સુરક્ષા અને વિકાસ આ બે જ મુદ્દાને સ્પષ્ટ મહત્વ આપ્યું છે.’

ગુજરાતે બનાવ્યા અનેક રેકોર્ડ

વર્ષ 2019ના આ ચૂંટણી મહાસંગ્રામમાં કુલ 16 બેઠકો પર ઉમેદવારો 5 લાખ કરતા વધારે મતોથી જીત્યા છે. જેમાં ચાર ઉમેદવાર તો એકલા ગુજરાતમાંથી છે. જ્યારે ત્યારબાદ મધ્યપ્રદેશમાં આવા 3 ઉમેદવાર છે. તો હરિયાણા, દિલ્હી, રાજસ્થાન અને તામિલનાડુ પ્રત્યેક રાજ્યોમાંથી 5-5 લાખ મતો કરતા વધારે મતથી જીતનારા ઉમેદવારોની સંખ્યા 2 છે અને યુપીમાં આવા ઉમેદવારોની સંખ્યા 1 છે.

લાખોના માર્જિનથી બન્યા વિજયી

જ્યારે ગુજરાતમાંથી બે ઉમેદવાર એવા છે જેમણે 4-5 લાખના માર્જિન વચ્ચે પોતાની જીત નોંધાવી છે. તો 9 ઉમેદવારે 3-4 લાખ વધુ મત મેળવીને ભવ્ય વિજય મળ્યો છે. જ્યારે 7 ઉમેદવાર એવા છે જેમણે 2-3 લાખ મતોની સરસાઈ સાથે જીત નોંધાવી છે અને 4 ઉમેદવારોએ 1-2 લાખ મતોના માર્જિનથી જીત મેળવી છે.

from Page Array – I Am Gujarat http://bit.ly/2HBuGVx