ભાજપ સાથે છેડો ફાડી ચૂંટણી લડનારાં રેશમા પટેલને અડધો ટકા વોટ પણ ન મળ્યા!

રેશમા પટેલ બે જગ્યાએથી ચૂંટણી લડ્યાં, હાર્યાં

અમદાવાદ: લોકસભા ચૂંટણી જાહેર થયાના થોડા જ દિવસોમાં ભાજપમાં પોતાનું કોઈ સાંભળતું નથી તેવો આક્ષેપ કરી પક્ષ સાથે છેડો ફાડી દેનારાં રેશમા પટેલને અપક્ષ ચૂંટણી લડવાનું ભારે પડ્યું છે. રેશમા પટેલે લોકસભા તેમજ વિધાનસભા પેટાચૂંટણી એમ બંનેમાં ફોર્મ ભર્યા હતા, અને ચૂંટણી પણ લડ્યા હતા. જોકે, બંને ચૂંટણીમાં તેમને જોરદાર પછડાટ મળી છે.

હવે સીધા Whatsapp પર મેળવો મહત્વના ન્યૂઝ, શરુ કરવા ક્લિક કરો

ડિપોઝિટ તો ગઈ, શરમજનક હાર પણ મળી

રેશમા પટેલની આ બંને ચૂંટણીમાં ડિપોઝિટ તો ડૂલ થઈ જ છે, સાથે તેમને શરમજનક હાર પણ મળી છે. રેશમા પટેલ પોરબંદર લોકસભા બેઠક પરથી અને માણાવદર વિધાનસભા બેઠક પરથી પેટાચૂંટણી લડ્યા હતા. એનસીપીએ રેશમાને ટેકો પણ જાહેર કર્યો હતો, પરંતુ તેનાથી પણ રેશમાને સોગંધ ખાવા પૂરતો ફાયદો પણ નહોતો મળ્યો.

પોરબંદરમાં અડધો ટકા વોટ પણ ન મળ્યા

પોરબંદર લોકસભા બેઠક પર હાર્દિક પટેલના સાથી અને કોંગ્રેસના ધારાસભ્ય લલિત વસોયા પણ લડી રહ્યા હતા, અને રેશમા પટેલે પણ ઉમેદવારી નોંધાવી હતી. પોરબંદર બેઠક પર ભાજપના રમેશ ધડૂકનો વિજય થયો હતો. ધડૂકને 5.50 લાખ વોટ મળ્યા છે. જોકે, હાર્દિકના સાથી લલિત વસોયાને 3.31 લાખ વોટ મળ્યા હતા. જ્યારે હાર્દિકના પૂર્વ સાથી અને અપક્ષ ઉમેદવાર રેશમા પટેલને માત્ર 3,704 વોટ મળ્યા છે. રેશમા પટેલને મળેલા મતોની ટકાવારી પણ માંડ 0.39 ટકા થાય છે.

માણાવદરમાં પણ ફિયાસ્કો

માણાવદર વિધાનસભા બેઠક પરથી એનસીપીની ટિકિટ પર ચૂંટણી લડનારા રેશમા પટેલને આ બેઠક પરથી પણ શરમજનક હાર મળી છે. રેશમા પટેલને માણાવદર બેઠક પર રોકડા 1,707 વોટ મળ્યા છે, અને તેમને મળેલા વોટની ટકાવારી માંડ 1.13 ટકા થાય છે. રેશમા પટેલને અહીં એનસીપીની ટિકિટ મળી હતી, પરંતુ તેનો કોઈ ફાયદો નહોતો થયો. માણાવદરમાં ભાજપની ટિકિટ પર લડી રહેલા જવાહર ચાવડાનો દસેક હજાર વોટથી વિજય થયો હતો.

from Page Array – I Am Gujarat http://bit.ly/2M85DNX