નેહલ ચલિયાવાલા/કેતન ઠક્કર
મુંબઈ:એક સમયે વેચાણમાં સૌથી આગળ ચાર મીટરથી ઓછી લંબાઈના સેડાન માર્કેટે 2018-’19માં ફરી વેચાણની વૃદ્ધિમાં સરસાઈ મેળવી છે. પેસેન્જર વ્હિકલ માર્કેટ ધીમું પડી રહ્યું છે ત્યારે ચાર મીટરથી ઓછી લંબાઈની કારનું વેચાણ એટલા જ કદની SUVs અને ક્રોસ-ઓવર કરતાં નોંધપાત્ર વધ્યું છે.
મારુતિ સુઝુકી ડિઝાયર અને હોન્ડા અમેઝને કારણે વધુ ખરીદદારો સેડાન તરફ ખેંચાયા છે. આ બાબત બે પરિબળો તરફ ઇશારો કરે છે. એક તો નવી ડિઝાઇન અને ફીચર્સથી વેચાણમાં મદદ મળે છે. ઉપરાંત, વેચાણ ધીમું હોય ત્યારે પણ નીવડેલી બ્રાન્ડ ગ્રાહકોને આકર્ષવામાં સફળ રહે છે.
2018-’19માં ચાર મીટરથી ઓછી લંબાઈની સેડાન કારના સેગમેન્ટનું વેચાણ 12 ટકા વધીને 4.૬ લાખ યુનિટ્સ થયું છે. સમાન ગાળામાં ક્રોસ-ઓવર્સ અને SUVsનું વેચાણ 11 ટકા વધીને 3.57 લાખ યુનિટ્સ થયું છે. 2018-’19માં હ્યુડાઈ એક્સેન્ટ, ટાટા ટિગોર, ફોર્ડ એસ્પાયરના વેચાણમાં ઘટાડો નોંધાયો છે. જોકે, મારુતિ સુઝુકી ડિઝાયર અને હોન્ડા અમેઝનું વેચાણ લગભગ સમાન રહ્યું છે.
કાર અપગ્રેડ માટે સેડાન ગ્રાહકોની પહેલી પસંદગી છે. તેમનો ભાવ ક્રોસઓવર અને SUVs કરતાં લગભગ ₹1 લાખ ઓછો હોય છે. એટલે જ હોન્ડા કાર્સ ઇન્ડિયાએ સેકન્ડ જનરેશન અમેઝને સેડાન પ્રોડક્ટ તરીકે લોન્ચ કરી છે.
કન્સલ્ટન્સી ફર્મ એક્સપિરિયલના સ્થાપક અવિક ચટ્ટોપાધ્યાયના જણાવ્યા અનુસાર શેર્ડ મોબિલિટી સેગમેન્ટમાં પણ નાની સેડાન પ્રથમ પસંદગી છે. ઓલા, ઉબર જેવી કેબ સર્વિસિસમાં ડિઝાયર અને એક્સેન્ટને વધુ ખરીદદારો મળી રહ્યા છે.
ચટ્ટોપાધ્યાયના જણાવ્યા અનુસાર 2018-’19માં પેસેન્જર વ્હિકલ માર્કેટ માત્ર 2.7 ટકા વધ્યું છે ત્યારે અમેઝના વેચાણમાં એ જ સેગમેન્ટના અન્ય મોડલ્સના ભોગે નોંધપાત્ર વૃદ્ધિ થઈ છે. અમેઝ જેટલી જ કિંમત ધરાવતા હોન્ડાના જ અન્ય મોડલ્સ જેઝ, WR-Vનું વેચાણ અનુક્રમે 45 ટકા અને 31 ટકા ઘટ્યું છે.
નિષ્ણાતોના જણાવ્યા અનુસાર SUVsની લોકપ્રિયતા વધી રહી છે. તેને લીધે ભારતમાં આગામી સમયમાં સેડાન સેગમેન્ટ કરતાં SUVsનું વેચાણ વધી જશે. છતાં પણ કેબ સર્વિસિસ અને ફેમિલી કારના ટેગને લીધે સેડાન કારનું વેચાણ સારું રહેશે. આરામદાયક સફર અને વ્યવહારિકતાની દૃષ્ટિએ સેડાન હજુ પણ આગળ છે. આગામી સમયમાં બોલ્ડ ડિઝાઇન આ સેગમેન્ટને કાર માર્કેટના મહત્ત્વના હિસ્સા તરીકે જાળવી રાખશે.
from Page Array – I Am Gujarat http://bit.ly/2Yy9PId
No comments:
Post a Comment