સિક્સર ફટકારતી વખતે એ નથી જોતો કે બોલર કોણ છે : રિષભ પંત

એલિમિનેટરમાં પંતની મેચ વિનિંગ ઈનિંગ્સ

વિશાખાપટ્ટનમ: સનરાઈઝર્સ હૈદરાબાદ સામે દિલ્હી કેપિટલ્સની બે વિકેટે જીતમાં મહત્વની ભૂમિકા ભજવનારા રિષભ પંતે જણાવ્યું કે, જ્યારે તે તાબડતોબ બેટિંગ માટે લયમાં આવી જાય છે ત્યારે તેને કોઈ ફર્ક નથી પડતો કે બોલિંગ કોણ કરી રહ્યું છે. પંતે 21 બોલમાં 49 રનની ઈનિંગ દરમિયાન પાંચ છગ્ગા ફટકાર્યા જેનાથી દિલ્હી કેપિટલ્સે બે વિકેટે જીત મેળવી.

‘બોલને વધારે જોરથી હિટ કરવાનો પ્રયત્ન ન કર્યો’

મેન ઑફ ધ મેચ રિષભ પંતે મેચ બાદ કહ્યું કે, ‘ટી20માં તમારે 20 બોલમાં 40 કે તેથી વધુ રન બનાવવાની જરૂર હોય છે, એટલે તમારે એક બોલર વિરુદ્ધ આક્રમણ કરવાનું હોય છે. હું એ નથી જોતો કે, બોલિંગ કોણ કરી રહ્યું છે. આ મારી આદતમાં વણાઈ ગયું છે અને એટલે અમે આટલી વધુ પ્રેક્ટિસ કરીએ છીએ. આજે તે સ્પેશિયલ રહ્યું કારણ કે, બોલને વધારે જોરથી હિટ કરવાનો પ્રયાસ ન કર્યો. હું માત્ર બોલને જોઈ રહ્યો હતો અને યોગ્ય સમયે હિટ કરવાનો પ્રયત્ન કરી રહ્યો હતો.’

પંતને મેચ ફિનિશ ન કરી શકવાનો રંજ

પંતે કહ્યું, ‘જો તમે એવી પિચ પર સેટ થઈ જાઓ છો તમારે તમારી ટીમ માટે મેચ ખતમ કરવી જોઈએ. હું નજીક લઈ ગયો પણ આવતી વખતે હું ટીમ માટે ફિનિશ કરીશ. હું થોડો સકારાત્મક બનવાનો પ્રયત્ન કરીશ. જો નકારાત્મક હોઈએ તો આ મદદગાર સાબિત થતું નથી.’

દિલ્હીની જીતથી ભાવુક થયો કેપ્ટન ઐયર

દિલ્હી કેપિટલ્સનો યુવા કેપ્ટન શ્રેયસ ઐયર આ જીતથી ઘણો ખુશ છે. તેણે કહ્યું, ‘અંતિમ ઓવર દરમિયાનની લાગણીઓને હું વર્ણવી શકું તેમ નથી. હું બેઠો હતો અને ઈનિંગની છેલ્લી બે ઓવર ખૂબ તણાવપૂર્ણ હતી. જીત મેળવવી સારો અનુભવ છે અને હું દરેકના ચહેરા પર ખુશી જોઈ શકતો હતો.’

from Cricket News in Gujarati, ક્રિકેટ સમાચાર, Cricket Updates – Page Array – I Am Gujarat http://bit.ly/2Hdv8b1