સચિનની સલાહ, વર્લ્ડકપમાં આ નંબરે બેટિંગ કરે ધોની

‘વર્લ્ડકપમાં ધોની 5મા ક્રમે બેટિંગમાં ઉતરે’

નવી દિલ્હી: ઈંગ્લેન્ડમાં યોજાનારા ICC વર્લ્ડકપમાં ભાગ લેવા માટે ભારતીય ટીમ ત્યાં પહોંચી ગઈ છે. ટૂર્નામેન્ટ શરૂ થવામાં હવે એક સપ્તાહથી પણ ઓછો સમય બચ્યો છે. આ દરમિયાન દિગ્ગજ ક્રિકેટર સચિન તેંદુલકરે ધોનીને કયા નંબરે બેટિંગ કરવી જોઈએ તે અંગે સલાહ આપી છે. સચિને ક્રિકઈન્ફો સાથે વાત કરતા કહ્યું કે, તેનો અંગત મત છે કે, ધોનીએ આગામી વર્લ્ડકપમાં 5 નંબર પર બેટિંગ કરવી જોઈએ.

હવે એક મેસેજ મોકલી Whatsapp પર મેળવો ન્યૂઝ, શરુ કરવા માટે અહીં ક્લિક કરો

‘ચોથા ક્રમે અન્ય કોઈ યોગ્ય બેટ્સમેન ઉતરે’

બે વખતની વર્લ્ડ ચેમ્પિયન ભારતીય ટીમ આ ટૂર્નામેન્ટમાં પોતાની પ્રથમ મેચ 5 જૂનના રોજ સાઉથ આફ્રિકા સામે રમશે. સચિને કહ્યું કે, ‘મારો અંગત મત છે કે, ધોનીએ 5મા ક્રમે બેટિંગ કરવી જોઈએ. મને હજુ પણ એ ખબર નથી કે, ભારતીય ટીમનું કૉમ્બિનેશન કેવું હશે. પણ જો શિખર ધવન અને રોહિત શર્મા ઈનિંગ્સની શરૂઆત કરે તો વિરાટ કોહલી ત્રીજા નંબરે આવે છે તો ચોથા નંબરે કોઈપણ ખેલાડી આવે પાંચમા ક્રમે બેટિંગ કરવા ઉતરવું જોઈએ.’

ધોની પછી હાર્દિકે કરવી જોઈએ બેટિંગ

માસ્ટર બ્લાસ્ટરે આગળ કહ્યું કે, ‘ધોની પછી પાવર હીટર હાર્દિક પંડ્યાએ બેટિંગમાં આવવું જોઈએ. આ રીતે તમે અનુભવી બેટ્સમેનનો ઉપયોગ કરી શકો છો. ધોની મેચને અંત સુધી લઈ જઈ શકશે અને અંતમાં હાર્દિક સાથે વિસ્ફોટક બેટિંગ કરી શકે છે.’ સચિને નંબર 4 અંગે પોતાનો મત મૂક્યો અને તેણે કહ્યું કે, આ સ્થાને કોઈ યોગ્ય બેટ્સમેનને ઉતારવો જોઈએ.

ભારત પાસે ઘણા કાબેલ બેટ્સમેનો

તેણે કહ્યું, ‘અત્યાર સુધી નંબર ચાર અંગે ઘણી બધી વાતો કરવામાં આવી છે. મને લાગે છે તમારી પાસે સારા બેટ્સમેનો હોય તો તેમને કોઈપણ સ્થાને બેટિંગ કરવાનું કહેવામાં આવે તો તેમણે પોતાને તે નંબર પર ઢાળવા જોઈએ. મને લાગે છે કે, આપણી પાસે એવા શાનદાર બેટ્સમેન છે, જેમને કોઈપણ નંબર પર મોકલવામાં આવે તો તેઓ સારું કરી શકે છે.’

આ ટીમો સેમિફાઈનલમાં પહોંચશે

જ્યારે પૂછવામાં આવ્યું કે, કઈ ટીમો સેમી ફાઈનલ સુધી પહોંચી શકે છે તો સચિને કહ્યું કે, ‘ભારત, ઈંગ્લેન્ડ અને ઑસ્ટ્રેલિયાએ સેમીફાઈનલ સુધી પહોંચવું જોઈએ. બીજી તરફ ન્યૂઝીલેન્ડ અને પાકિસ્તાનમાંથી કોઈ એક ટીમ સેમી ફાઈનલમાં પહોંચી શકે છે.’

from Cricket News in Gujarati, ક્રિકેટ સમાચાર, Cricket Updates – Page Array – I Am Gujarat http://bit.ly/30SdBya