વીએસ હોસ્પિટલમાં પોસ્ટમાર્ટમ બાદ બે મહિલાઓનાં મૃતદેહો અદલાબદલી થઈ જતાં બબાલ

હોસ્પિટલની ગંભીર બેદરકારી

અમદાવાદ: શહેરની વીએસ હોસ્પિટલમાં પોસ્ટમાર્ટમ બાદ બે મૃતદેહોની કથિત અદલાબદલી થઈ જતાં મૃતકના સગાઓએ હોબાળો મચાવ્યો હતો. પ્રાપ્ત વિગતો અનુસાર, મૂળ કર્ણાટકનાં નસરીન બાનુનો મૃતદેહ બાવળામાં બે દિવસ પહેલા ચાકૂ મારીને મોતને ઘાટ ઉતારાયેલી યુવતીના મૃતદેહ સાથે બદલાઈ ગયો હતો. આ ઘટના બહાર આવતા જ વીએસ હોસ્પિટલમાં હાઈવોલ્ટેજ ડ્રામા સર્જાયો હતો.

હવે સીધા Whatsapp પર મેળવો મહત્વના ન્યૂઝ, શરુ કરવા ક્લિક કરો

હિન્દુ પરિવારને મુસ્લિમ મહિલાની બોડી આપી દીધી

બાવળાની મિત્તલ જાધવ નામની યુવતીનું બે દિવસ પહેલા તેના એક તરફી પ્રેમમાં પાગલ યુવક દ્વારા ધોળા દિવસે ચાકૂ મારીને ખૂન કરવામાં આવ્યું હતું. મિત્તલને સારવાર માટે વીએસ હોસ્પિટલ ખસેડવામાં આવી હતી, જ્યાં ડૉક્ટરોએ તેને મૃત જાહેર કરી હતી. હોસ્પિટલમાં જ તેનું પીએમ કરવામાં આવ્યું હતું, પરંતુ તેનો હત્યારો પકડાયો ન હોવાથી તેના મૃતદેહને પરિવારજનોએ સ્વીકારવાનો ઈનકાર કરી દેતા તેને શબઘરમાં રાખવામાં આવ્યો હતો.

એક બોડી ધોલેરા પહોંચ્યા બાદ બહાર આવી ગફલત

બીજી તરફ, દાણીલીમડાની રહેવાસી નસરીન બાનુનું પણ વીએસમાં મોત થતાં તેમનો મૃતદેહ પણ હોસ્પિટલમાં રાખવામાં આવ્યો હતો. આજે વહેલી સવારે મિત્તલના પરિવારજનો તેનો મૃતદેહ સ્વીકારવા તૈયાર થઈ જતાં તેમને મૃતદેહ સોંપી દેવાયો હતો. જોકે, તેમને મિત્તલ નહીં, પરંતુ નસરીન બાનુની બોડી સોંપી દેવાઈની વિગતો પાછળથી આવી હતી.

મિત્તલના પરિવારજનોએ દફનવિધિ પણ કરી નાખી

મિત્તલના પરિવારજનો તેમને જે મૃતદેહ સોંપવામાં આવ્યો હતો તેને લઈને ધોલેરા પહોંચ્યા હતા, અને ત્યાં તેની દફનવિધિ પણ કરી દેવાઈ હતી. જોકે, વીએસમાં નસરીન બાનુના પરિવારજનોએ મૃતદેહને તપાસતા તે નસરીન નહીં, પણ બીજી કોઈ મહિલા હોવાનું બહાર આવતા હોબાળો મચ્યો હતો.

પોલીસની ટીમ ધોલેરા જવા રવાના થઈ

મૃતદેહ બદલાઈ જતાં હોસ્પિટલમાં હંગામો શરુ થઈ જતાં પોલીસ વીએસ પહોંચી હતી. મિત્તલના સંબંધીઓ જે મૃતદેહને ધોલેરા દફનાવી દીધો હતો તેનો ફરી કબજો મેળવવા પોલીસની એક ટીમ તાત્કાલિક ધોલેરા જવા રવાના થઈ હતી.

from Page Array – I Am Gujarat http://bit.ly/2JxRGG7