રિટેલ બિઝનેસ જમાવવા ફ્લિપકાર્ટ કિરાણા સ્ટોર્સની મદદ લેશે

69125770

રસૂલ બૈલે

નવી દિલ્હી:રિલાયન્સ રિટેલ નાના મોટા કરિયાણા સ્ટોર્સને પોતાની સાથે રાખીને મલ્ટિ ચેનલ રિટેલિંગ શરૂ કરવા માંગે છે ત્યારે વોલમાર્ટની માલિકીની ફ્લિપકાર્ટ પણ કરિયાણા પર ધ્યાન આપવાની યોજના ધરાવે છે.

તેની શરૂઆતમાં ફ્લિપકાર્ટ 15,000 જેટલા નાના કન્વિનિયન્સ સ્ટોર્સ, બ્યૂટી સલૂન્સ, બેકરી, ફાર્મસી અને બીજા નાના સ્ટોર્સમાં સ્માર્ટફોનનું વેચાણ કરવા માંગે છે. તે ભવિષ્યમાં અન્ય પ્રોડક્ટ્સ પણ લાવશે અને છેવાડાના ગ્રાહક સુધી પહોંચાડવા માટેના ડિલિવરી એજન્ટ તરીકે કામ કરશે.

વોલમાર્ટની માલિકીની કંપની તેલંગણામાં એક પ્રોજેક્ટ પર કામ કરી રહી છે જ્યાં તે લગભગ 800 નાના દુકાનદારોની મદદથી ફ્લિપકાર્ટ એપ મારફત મોબાઇલ ફોનનું વેચાણ કરશે. ફ્લિપકાર્ટ જે વિસ્તારમાંથી ઓર્ડર આવ્યા હોય ત્યાંના સ્ટોર્સ પર ફોન મોકલશે અને કિરાણા દુકાનદારો ખરીદદારોને આ ફોન ડિલિવર કરશે. તેમાં તેમને રિટેલરનું માર્જિન કમાવા મળશે તેમ બે સૂત્રોએ કહ્યું હતું.

કિરાણા દુકાનદારો ફ્લિપકાર્ટ એપમાં અપાયેલી અલગ લિંકનો ઉપયોગ કરીને બિઝનેસ કરશે. કિરાણાને સામેલ કરવાથી આ મોટું આયોજન બન્યું છે. આ વિશે ફ્લિપકાર્ટે ઇ-મેઇલનો જવાબ આપ્યો ન હતો.

રોકાણ માટે પુષ્કળ નાણાં ધરાવતી ઇ-કોમર્સ કંપનીઓએ ભારતના રિટેલ બિઝનેસમાં પોતાની સ્થિતિ મજબૂત કરી છે. તેમણે ફૂડથી લઈને ફેશન સુધીના બિઝનેસમાં અબજો ડોલર એકત્ર કર્યા છે. હાલમાં ભારતના રિટેલ બિઝનેસનો 95 ટકા હિસ્સો કરિયાણા સ્ટોર્સના હાથમાં છે. ભારતમાં ઇ-કોમર્સ ક્ષેત્રે સ્પર્ધા તીવ્ર બનવાની તૈયારી છે કારણ કે ચાલુ વર્ષે રિલાયન્સ પણ તેમાં પ્રવેશ કરશે. મુંબઈ સ્થિત રિલાયન્સ જૂથ તેના પ્લેટફોર્મ પર નાનામોટા રિટેલર્સને પોતાની સાથે જોડવા માંગે છે.

સૂત્રોએ જણાવ્યું કે બેંગલુરુ સ્થિત ફ્લિપકાર્ટને તેલંગણામાં પાઇલટ પ્રોજેક્ટ દરમિયાન સારો પ્રતિભાવ મળ્યો છે અને તે મહિને ₹15થી 20 કરોડ મેળવે છે. ગયા વર્ષે યુએસની રિટેલ કંપની વોલમાર્ટે 16 અબજ ડોલરમાં ફ્લિપકાર્ટ ખરીદી હતી. સ્માર્ટફોન વેચવામાં સફળતા મેળવ્યા બાદ રિટેલ સ્ટોર્સ દ્વારા તે બીજાં શહેરોમાં પણ ફેલાવો કરશે.

તેમણે કહ્યું કે આ પગલાંથી ફ્લિપકાર્ટ અને નાના રિટેલર્સ બંનેને ફાયદો થશે કારણ કે તેનાથી મોબાઇલ ફોન માટે બિઝનેસની તક ખૂલશે. દુકાનદારો પણ પોતાના ક્લાયન્ટને સ્માર્ટફોનનું વેચાણ કરીને વધારાની આવક મેળવી શકશે. ફ્લિપકાર્ટના ફેશન યુનિટ મિન્ત્રાએ 50 શહેરોમાં 9,000 જેટલા નાના સ્ટોર્સનો અસરકારક ઉપયોગ કર્યો છે અને મેન્સા નેટવર્ક નામના કાર્યક્રમ હેઠળ ડિલિવરીનું કામ શરૂ કર્યું છે. આ નેટવર્ક 2017માં શરૂ થયું હતું પરંતુ ફ્લિપકાર્ટ જૂથ વાસ્તવમાં પ્રોડક્ટ્સ વેચવા પહેલી વખત નાના સ્ટોર્સનો ઉપયોગ કરશે.

હરીફ કંપની એમેઝોને પણ ‘આઇ હેવ સ્પેસ’ કાર્યક્રમ શરૂ કર્યો છે જેમાં તે દેશભરમાં 350 શહેરોમાં 20,000 સ્ટોર્સને પોતાની સાથે સાંકળશે અને છેવાડાના ગ્રાહકને ડિલિવરી પૂરી પાડશે. આ ડિલિવરી બેથી ચાર કિમીની અંદર કરવામાં આવશે. જોકે ફ્લિપકાર્ટથી વિપરીત એમેઝોન નાના સ્ટોર્સ દ્વારા ઓર્ડર નહીં સ્વીકારે.

રિલાયન્સ રિટેલ ઓફલાઇન અને ઓનલાઇન આઉટલેટ દ્વારા આગળ વધવા માંગે છે જેમાં કિરાણાના સ્ટોર્સ કેન્દ્રીય ભૂમિકા ભજવશે. તે ગૂડ્સ અને સર્વિસ ઓફર કરવા માટે પણ પોતાના પ્લેટફોર્મનો ઉપયોગ કરશે.

from Page Array – I Am Gujarat http://bit.ly/2GPnHqn