ટેરિફ વોર, ચૂંટણી પરિણામ પહેલાં FPIsની વેચવાલી વધી

69356021

સનમ મીરચંદાની

મુંબઈ:અમેરિકા-ચીન વચ્ચે ‘ટેરિફ યુદ્ધ’ વકરવાના સંકેતને પગલે ફોરેન પોર્ટફોલિયો ઇન્વેસ્ટર્સ (FPIs)એ ભારતીય શેરોમાં વેચવાલી વધારી છે. સ્થાનિક બજારમાં ચૂંટણી પરિણામ પહેલાંની અનિશ્ચિતતાને કારણે પણ વિદેશી રોકાણકારોનું સેન્ટિમેન્ટ નરમ થયું છે.

FPIsએ બુધવારે ₹1,142 કરોડના શેર્સ વેચ્યા હતા. મે મહિનામાં છેલ્લા 10માંથી 7 ટ્રેડિંગ સત્રમાં તેમણે વેચવાલી કરી છે. મંગળવારે બજારમાં સતત 9 દિવસના ઘટાડા પછી રિકવરી નોંધાઈ ત્યારે પણ FPIsએ ₹2,000 કરોડના શેર્સ વેચ્યા હતા, જે ફેબ્રુઆરી પછીની સૌથી મોટી દૈનિક વેચવાલી છે.

એવેન્ડસ કેપિટલ – ઓલ્ટરનેટ સ્ટ્રેટેજિસના CEO એન્ડ્રુ હોલેન્ડે જણાવ્યું હતું કે, “હાલના તબક્કે વૈશ્વિક અને સ્થાનિક જોખમનું કોમ્બિનેશન છે. અમેરિકા અને ચીન વચ્ચેની ‘ટેરિફ વોર’ મુખ્ય ચિંતા છે.” તેમણે વધુમાં જણાવ્યું હતું કે, “MSCI ઇન્ડેક્સમાં ચીનનું વેઇટેજ વધ્યું હોવાથી ભારતમાં FPIsની વેચવાલીની શક્યતા છે. વૈશ્વિક સ્તરે સ્થિતિ વધુ ખરાબ થશે તો નોંધપાત્ર વેચવાલી થશે. આવી સ્થિતિમાં ભારતીય બજારમાં ઓછો ઘટાડો નોંધાશે, પણ તે ઘટશે તો ખરું જ.” ચૂંટણી પરિણામ પછી પણ ફાઇનાન્શિયલ સેક્ટરની સમસ્યા તો ચાલુ જ રહેશે.

ડેરિવેટિવ્ઝ માર્કેટમાં પણ મંદીનું વલણ છે. એનાલિસ્ટ્સના જણાવ્યા અનુસાર ઇન્ડેક્સ ફ્યુચર્સમાં દરેક શોર્ટ પોઝિશન સામે 1.3 લોંગ પોઝિશન છે. જોકે, સિરિઝના પ્રારંભે દરેક શોર્ટ પોઝિશન સામે 3 લોંગ પોઝિશન હતી. FPIsનો લોંગ-શોર્ટ રેશિયો 56 ટકા છે, જે મે સિરિઝના પ્રારંભે 75 ટકા હતો. FPIsએ ચાલુ મહિને અત્યાર સુધીમાં ₹3,100 કરોડનું વેચાણ કર્યું છે. અગાઉના બે મહિનામાં તેમણે ₹53,400 કરોડના શેર્સ ખરીદ્યા હતા. ફિલિપિન્સ, થાઇલેન્ડ, મલેશિયા, સાઉથ કોરિયા, તાઇવાન અને ઇન્ડોનેશિયા સહિતના અન્ય એશિયન બજારોમાં ચાલુ મહિને 9.7 કરોડ ડોલરથી 1.2 અબજ ડોલરની રેન્જમાં વેચવાલી થઈ હતી.

અમેરિકાના વ્યાજદરમાં ધીમી વૃદ્ધિના અંદાજને કારણે વિદેશી રોકાણકારો માર્ચમાં ઊભરતા બજારો તરફ ખેંચાયા હતા. એ સમયે વર્ષના પહેલા બે મહિનામાં ભારતે અંડરપરફોર્મ કર્યું હોવાથી સ્થાનિક બજારમાં નોંધપાત્ર રોકાણ આવ્યું હતું. આર્થિક સુધારાલક્ષી મોદી સરકારને ફરી સત્તા મળવાની આશાએ પણ વિદેશી રોકાણકારો ભારતીય બજાર તરફ આકર્ષાયા હતા. જાન્યુઆરીથી એપ્રિલમાં FPIsએ સ્થાનિક બજારમાં ₹68,200 કરોડના શેર ખરીદ્યા હતા. લગભગ 80 ટકા રોકાણ માર્ચમાં આવ્યું હતું.

એપ્રિલમાં ક્રૂડના ભાવ બેરલ દીઠ 75 ડોલરની ઉપર જતાં વિદેશી રોકાણપ્રવાહ ધીમો પડ્યો હતો અને મે મહિનામાં અમેરિકા-ચીન વચ્ચે ‘ટેરિફ વોર’ને કારણે FPIsનો ટ્રેન્ડ વેચવાલીમાં પલટાયો હતો. 23 મેના રોજ લોકસભા ચૂંટણીનું પરિણામ જાહેર થવાનું છે ત્યારે NBFC સેક્ટરની કટોકટી, વપરાશ આધારિત માંગમાં ઘટાડો અને ઊંચા વેલ્યુએશન (18નો એક વર્ષનો ફોરવર્ડ P/E)ને કારણે વિદેશી રોકાણકારો માટે ભારતીય બજારનું આકર્ષણ ઘટ્યું છે.

from Page Array – I Am Gujarat http://bit.ly/2Q8Cl03