IL&FSની તપાસનો રેલો HDFC, SBI સુધી પહોંચશે

69554097

સલોની શુક્લા/મૌલિક વ્યાસ/સચિન દવે

મુંબઈ:IL&FSના ધબડકાની તપાસનો વ્યાપ હવે કંપનીના જાણીતા શેરધારકો HDFC, SBI અને ઓરિક્સ કોર્પોરેશન સુધી પહોંચવાની શક્યતા છે. કંપનીના આ શેરધારકો અને IL&FS બોર્ડના પ્રતિનિધિઓ કથળતી નાણાકીય સ્થિતિ અને કામગીરીમાં અનિયમિતતા અંગે સાવચેતી આપવામાં કેમ નિષ્ફળ રહ્યા તેનો અહેવાલ કંપની બાબતોનું મંત્રાલય તૈયાર કરી રહ્યું છે. સૂત્રોના જણાવ્યા અનુસાર IL&FSની કટોકટી પહેલાં કંપનીને ઊંચું રેટિંગ આપનારા CARE, ઇન્ડિયા રેટિંગ્સ અને ICRAની ભૂમિકાની પણ તપાસ થશે.

IL&FSના નવા બોર્ડે સમગ્ર પ્રકરણ પહેલાંના મહિનાઓમાં શેરધારકોની ભૂમિકા સામે પ્રશ્ન કર્યો હતો. બોર્ડ જાણવા માંગતું હતું કે, કામગીરી કથળવા છતાં કોઈ ચેતવણી કેમ ઉચ્ચારી નહીં? સ્થિતિથી વાકેફ એક વ્યક્તિએ જણાવ્યું હતું કે, “શેરધારકોએ ચેતવણી ઉચ્ચારી હોત તો મોટી કટોકટીને નિવારાઈ શકી હોત, પણ તેઓ મૌન રહ્યા હતા.” આ સાથે IL&FSના શેરધારકોની સમગ્ર પ્રકરણમાં પહેલી વખત તપાસ થશે. હાલ ચાલી રહેલી તપાસમાં IL&FSની અગાઉની મેનેજમેન્ટ ટીમ અને તેની વિવિધ સબસિડિયરીઝની બેદરકારી પર ધ્યાન કેન્દ્રિત કરાયું છે. LIC, SBI, HDFC, ઓરિક્સ, ICRA અને ઇન્ડિયા રેટિંગ્સે ETના પ્રશ્નનો જવાબ આપ્યો ન હતો.

CARE રેટિંગ્સે જણાવ્યું હતું કે, તે વિવિધ રેગ્યુલેટરી ઓથોરિટી અને સરકારી એજન્સીઝને સંપૂર્ણ સહકાર આપી રહી છે. LIC 25 ટકા હિસ્સા સાથે IL&FSની સૌથી
મોટી શેરધારક છે. ઓરિક્સ 23.5 ટકા હિસ્સા સાથે બીજા ક્રમે, HDFC 9 ટકા સાથે ત્રીજા અને SBI 6.42 ટકા સાથે ચોથા ક્રમે છે.

કંપની બાબતોના મંત્રાલયની નવી તપાસનો વ્યાપ વધશે. વિવિધ એજન્સીઝે ફાઇનાન્શિયલ નોન-ડિસ્ક્લોઝર, ભંડોળના રાઉન્ડ-ટ્રિપિંગ અને ગેરવહીવટ અંગે પૂછપરછ શરૂ કરી દીધી છે. સિરિયસ ફ્રોડ ઇન્વેસ્ટિગેશન ઓફિસ (SFIO) અગાઉના મેનેજમેન્ટ સામે વિસ્તૃત તપાસ કરી રહી છે અને તેણે IL&FS ફાઇનાન્શિયલ સર્વિસિસના ભૂતપૂર્વ સીઇઓ રમેશ બાવાની ધરપકડ કરી છે.

SFIO પણ ડેલોઇટ સહિત ઓડિટર્સની ભૂમિકા તપાસી રહી છે. એન્ફોર્સમેન્ટ ડાયરેક્ટરેટ (ED)એ ફેબ્રુઆરીમાં પ્રિવેન્શન ઓફ મની લોન્ડરિંગ એક (PMLA) હેઠળ ફોજદારી કેસ કર્યો છે. જેથી આરોપી દ્વારા ભંડોળનો ઉપયોગ ગેરકાયદેસર એસેટ્સ ખરીદવા માટે કરાયો છે કે નહીં એ જાણી શકાય.

તપાસ એજન્સીઓ શોધી રહી છે કે, ઘણા પક્ષકારો સામેલ હોવા છતાં IL&FSની ગેરરીતિ આટલા લાંબા સમય સુધી કેવી રીતે છુપાવવામાં આવી? ઉલ્લેખનીય છે કે, ટૂંકા ગાળાના ધિરાણદરમાં તીવ્ર વૃદ્ધિ થઈ ત્યારે IL&FSના ડિફોલ્ટનું પ્રકરણ ઓગસ્ટ 2018માં સપાટી પર આવ્યું.

from Page Array – I Am Gujarat http://bit.ly/2I8Kder