IPL 2019 Final MI vs CSK : રોહિત-ધોનીની ફાઈનલમાં ફાઈટ, કોણ કોના પર ભારે

બંને ટીમો પાસે ચોથી વખત ટાઈટલ જીતવાની તક

IPL12ની ફાઈનલનો તખ્તો તૈયાર થઈ ચૂક્યો છે. દિલ્હીને હરાવી ગત ચેમ્પિયન ચેન્નઈ સુપરકિંગ્સ આઠમી વખત ફાઈનલમાં છે અને હવે તેની ટક્કર મુંબઈ ઈન્ડિયન્સ સામે થશે. બંને ટીમો પાસે ટાઈટલ જીતનો ચોગ્ગો ફટકારવાની તક છે. ગત 11 સિઝનોમાં તે બંને ટીમઓએ 3-3 ખિતાબ જીત્યા છે. ફાઈનલ મુકાબલો હૈદરાબાદના રાજીવ ગાંધી ઈન્ટરનેશનલ સ્ટેડિયમમાં રવિવારે સાંજે 7.30 વાગ્યે રમાશે.

કેપ્ટનશિપમાં રોહિતનું પલ્લું ભારે

આંકડાની વાત કરીએ તો ચેન્નઈની ટીમ રેકોર્ડ 8મી વખત ફાઈનલમાં પહોંચી છે તો મુંબઈ ઈન્ડિયન્સે પાંચમી વાર આ ઉપલબ્ધિ મેળવી. બંને ટીમો વચ્ચે અત્યાર સુધી 3 ફાઈનલ રમાઈ છે, જેમાંથી બે વાર મુંબઈ અને એકવાર ચેન્નઈએ બાજી મારી છે. જોકે, કેપ્ટન તરીકે રોહિતની જીત 100% રહી, કારણ કે, એક ફાઈનલ જેમાં મુંબઈ હારનો સામનો કરવો પડ્યો તેમાં કેપ્ટન સચિન તેંડુલકર હતો. એટલું જ નહીં, આ વખતે આ ટીમો વચ્ચે ત્રણ મેચ થઈ છે, જેમાં ત્રણેય વખત મુંબઈએ મેદાન માર્યું છે.

કેપ્ટનશિપ : રોહિત શર્મા vs એમ એસ ધોની

મુંબઈ ઈન્ડિયન્સના કેપ્ટન રોહિત શર્મા અને ચેન્નઈ સુપરકિંગ્સના કેપ્ટન એમ એસ ધોનીમાં ઘણી સમાનતાઓ છે. સૌથી મોટી સમાનતા છે તેમનો સરળ સ્વભાવ અને પોતાની ભાવનાઓ પરનો કન્ટ્રોલ. આ બંને ખેલાડીઓને મેદાન પર ખૂબ ઓછો ગુસ્સો આવે છે. રોચક વાત એ છે કે, બંને પોતાની ટીમોમાં બહુ ઓછા ફેરફાર કરે છે. આ દર્શાવે છે કે, તેમને પોતાના ખેલાડીઓ પર કેટલો વિશ્વાસ છે. એક તરફ ધોની રણનીતિમાં માહેર છે તો રોહિત પાસે મેન્ટોર સચિન તેંડુલકર અને કોચ મહેલા જયવર્ધને જેવા દિગ્ગજોનો સપોર્ટ છે.

બંને ટીમોની સ્ટ્રેન્થ

મુંબઈ ઈન્ડિયન્સ

બેટિંગ

IPLની એકમાત્ર એવી ટીમ છે, જેમાં લગભગ તમામ ખેલાડીઓ ભરોસાપાત્ર છે. ઓપનર રોહિત શર્મા અને ક્વિન્ટન ડી કૉક સિઝનમાં સારું પરફોર્મ કરી રહ્યાં છે તો મિડલ ઑર્ડરમાં સૂર્યકુમાર યાદવ, કેરોન પોલાર્ડ, હાર્દિક પંડ્યા અને કૃણાલ પંડ્યા કોઈપણ બોલર પર હાવી થવાનો દમખમ ધરાવે છે. સૌથી રોચક વાત એ છે કે, મુંબઈના તમામ બેટ્સમેનો હાર્ડ હિટર છે, પણ મેચની સ્થિતિ પ્રમાણે બેટિંગ કરી શકે છે.

બોલિંગ

બોલિંગની વાત કરીએ તો જસપ્રીત બુમરાહ (17 વિકેટ), લસિથ મલિંગા (15 વિકેટ) અને હાર્દિક પંડ્યા (14 વિકેટ) ગજબના ફોર્મમાં છે. એક તરફ મલિંગા આજે પણ બેટ્સમેનો માટે મોટો પડકાર ઊભો કરે છે તો બુમરાહ વર્તમાન સમયમાં સૌથી શ્રેષ્ઠ બોલર માનવામાં આવે છે. રાહુલ ચહર (12) અને કૃણાલ પંડ્યા (11 વિકેટ)એ મહત્વની ઘડીએ વિકેટો ઝડપી છે.

ચેન્નઈ સુપરકિંગ્સ

બેટિંગ

ટીમમાં શેન વૉટસન, ફાફ ડુ પ્લેસિસ, સુરેશ રૈના, અંબાતી રાયુડૂ અને પોતે એમ એસ ધોની જેવા ખેલાડી છે, જે ન માત્ર અનુભવ પણ પોતાના દમ પર મેચની સ્થિતિ પલટવામાં સક્ષમ છે. લોઅર ઓર્ડરમાં રવીન્દ્ર જાડેજા અને ડ્વેન બ્રાવો જેવા હિટર પણ છે.

બોલિંગ

ટીમની ફાસ્ટ બોલિંગમાં દીપક ચહર સતત સારું પ્રદર્શન કરી રહ્યો છે. તેને શાર્દુલ ઠાકુરનો સપોર્ટ મળ્યો તો ચેન્નઈ લય પકડી શકે છે. બીજી તરફ ચેન્નઈનો સ્પિન એટેક તેનો મજબૂત પક્ષ છે. હરભજન સિંહ, જે પહેલા મુંબઈ માટે રમતો હતો, તે રોહિત શર્માની નબળાઈ ખૂબ સારી રીતે જાણતો હશે. ઈમરાન તાહિર જબરદસ્ત ફોર્મમાં છે અને તેણે આ સીઝનમાં અત્યાર સુધી 24 વિકેટો ઝડપી છે.

from Cricket News in Gujarati, ક્રિકેટ સમાચાર, Cricket Updates – Page Array – I Am Gujarat http://bit.ly/2YmZX44