ડેટ MFની કટોકટીથી NCD, FD તરફ ઝોક

69125450

પ્રશાંત મહેશ

મુંબઈ:ડેટ મ્યુચ્યુઅલ ફંડમાં હાલમાં કટોકટીની સ્થિતિ પેદા થઈ હોવાથી રોકાણકારો વધુ ને વધુ નાણાં ફિક્સ્ડ ડિપોઝિટ અને એનસીડી (નોન કન્વર્ટિબલ ડિબેન્ચર્સ) તરફ વાળી રહ્યા છે. રોકાણ સલાહકારોએ જણાવ્યું કે ટોચનું રેટિંગ ધરાવતી એનબીએફસીની ફિક્સ્ડ ડિપોઝિટ તથા એનસીડીમાં ગયા વર્ષની સરખામણીમાં અત્યારે વધારે વળતર મળી શકે છે. બીજી તરફ સિક્યોરિટીઝના રેટિંગ ડાઉનગ્રેડ તથા ડિફોલ્ટના કારણે વિવિધ ડેટ મ્યુચ્યુઅલ ફંડ્સના વળતરમાં ઘટાડો થયો છે.

AAA રેટિંગ ધરાવતી ફિક્સ્ડ ડિપોઝિટમાં વાર્ષિક 8થી 9 ટકા સુધી વળતર મળે છે અને તે વધારે લોકપ્રિય છે. તેમાં HDFC લિ, LIC હાઉસિંગ ફાઇનાન્સ, બજાજ ફિનસર્વ, અને મહિન્દ્રા ફાઇનાન્સની એફડી સામેલ છે. સિનિયર સિટિઝન્સને 0.10 ટકાથી 0.5 ટકા જેટલું વધારે વળતર પણ મળી શકે છે. રોકાણકારોએ તાજેતરમાં એલ એન્ડ ટી ફાઇનાન્સ અને શ્રીરામ સિટી યુનિયનના એનસીડીમાં પણ રૂપિયા રોક્યા છે.

છેલ્લા એક વર્ષમાં ડેટ મ્યુચ્યુઅલ ફંડ્સે ઘણા ફટકા સહન કર્યા છે. તેમણે IL&FSમાં કરેલું રોકાણ માંડવાળ કરવું પડ્યું છે જેથી આ સ્કીમમાં એનએવી (નેટ એસેટ વેલ્યૂ)માં ઘટાડો થયો છે. સુભાષ ચંદ્રાના એસ્સેલ ગ્રૂપ દ્વારા પુન:ચુકવણીમાં વિલંબ થવાના કારણે રોકાણકારોની ચિંતા વધી છે. ગયા સપ્તાહમાં એડીએજી ગ્રૂપ કંપનીઓ દ્વારા ક્રેડિટ રેટિંગ ડાઉનગ્રેડના કારણે કેટલીક ડેટ મ્યુચ્યુઅલ ફંડ સ્કીમ્સમાં ભારે નુકસાન થયું છે.

મુંબઈ સ્થિત નાણાકીય પ્રોડક્ટ્સની વિતરક મની હની ફાઇનાન્શિયલ સર્વિસિસના એમડી અને સીઇઓ અનૂપ ભૈયાએ જણાવ્યું હતું કે રોકાણકારો ઇક્વિટીમાં રોકાણ માટે મ્યુચ્યુઅલ ફંડ્સનો ઉપયોગ કરી રહ્યા છે પરંતુ ડેટમાં તેઓ ટ્રિપલ એ રેટિંગ ધરાવતી એફડી અને સિક્યોર્ડ એનસીડીને પસંદ કરી રહ્યા છે જેથી નિશ્ચિત વળતર મળી શકે.

ભૈયાએ જણાવ્યું હતું કે રોકાણકારોનો ડેટ પોર્ટફોલિયો ઇક્વિટી કરતા અનેક ગણો મોટો છે અને રોકાણકારો મૂડીની સુરક્ષાને પ્રાધાન્ય આપી રહ્યા હોવાથી આ ટ્રેન્ડ બદલાઈ શકે છે. જીઇપીએલ કેપિટલના વડા (ડિસ્ટ્રિબ્યુશન) રૂપેશ ભણશાળીએ જણાવ્યું હતું કે, મ્યુચ્યુઅલ ફંડ્સમાં આવી રહેલા સમાચારોથી રોકાણકારો ચિંતિત છે. તે કંપની ડિપોઝિટ અને ઉચ્ચ રેટિંગ ધરાવતા એનસીડીનો સમન્વય કરીને સંપૂર્ણ સુરક્ષા ઇચ્છે છે.

છેલ્લા એક વર્ષમાં ડેટ મ્યુચ્યુઅલ ફંડ્સમાંથી વળતર અસ્થિર રહ્યું છે. IL&FSના બોન્ડ ધરાવતી ઘણી સ્કીમમાં સમગ્ર વર્ષ દરમિયાન રોકાણકારોનું વળતર ઘટ્યું છે. વેલ્યૂ રિસર્ચ પ્રમાણે લિક્વિડ કેટેગરીએ 6.92 ટકા, અલ્ટ્રા શોર્ટ ટર્મ કેટેગરીએ 6.2 ટકા, ક્રેડિટ રિસ્ક કેટેગરીએ 5.08 ટકા, ડાયનેમિક બોન્ડ કેટેગરીએ 7.02 ટકા વળતર આપ્યું છે. તેની સરખામણીમાં AAA રેટિંગ ધરાવતી કંપની ડિપોઝિટ, સિક્યોર્ડ NCDમાં ઘણું વધુ વળતર મળે છે.

from Page Array – I Am Gujarat http://bit.ly/2IVLnwC